Փաստ ինֆո

Մանվել Գրիգորյանի փաստաբանական խումբը ակտիվիստ Ջիվան Աբրահամյանի ֆեյսբուքյան ուղիղ եթերով արված հայտարարության առնչությամբ ոստիկանություն հաղորդում է ներկայացրել, ինչպես նաեւ ահազանգել ՄԻՊ-ի թեժ գծին։ «Փաստինֆո»-ի հետ զրույցում այս մասին ասաց Մանվել Գրիգորյանի պաշտպաններից Արսեն Մկրտչյանը։

«Կարծում եմ, որ այդ ուղիղ եթերը ուժային կառույցներն էլ են նայել, ոստիկանության հաղորդում տրված է, մեր գործընկերներից մեկը, եթե չեմ սխալվում պետք է տված լինի, Մարդու իրավունքների պաշտպանին եմ տեղեկացրել, ինչ վերաբերում է ընդհանուր գնահատականին, Քրեական դատավարության օրենսգրքում հոդված կա 332-րդ հոդվածը ՝ արդարադատության իրականացմանը եւ քննությանը խոչընդոտելը, որով արդարադատության իրականացմանը խոչընդոտելու նպատակով դատարանի գործունեությանը ցանկացած ձեւով միջամտելը պատժելի արարք է։ Դատարանը որոշում է կայացրել, որ Մանվել Գրիգորյանը ՀՀ տարածքում կարող է ազատ տեղաշարժվել, ավելին, որպես իր հասցե, վարույթն իրականացնող մարմնի մոտ նշված է այն հասցեն, որտեղ նա մշտական բնակվում է, իսկ տվյալ անձը ասում է, որ եթե նա հիվանդանոցում է, թող մնա, բայց եթե կգնա իր տուն, որտեղ իրավունք ունի և, ըստ էության, պարտավոր է գնալ եւ առանց դատարանին տեղյակ պահելու բնակության վայրն էլ չի կարող փոխել, այդ դեպքում մենք ակցիաներ կանենք ու կխոչընդոտենք»։
Արսեն Մկրտչյանը շեշտեց՝ ստացվում է, որ երկրում կա դատարան, որը խափանման միջոց է փոխում եւ կան մի խումբ անձինք, որոնք մտածում են, որ իրենք դատարանից ավելի կարեւոր են եւ իրենք պետք է թույլատրեն դատարանի որոշումների իրականացումը.

«Դուրս է գալիս, թե դատարանի գործունեությունը պիտի վերահսկեն փողոցից։ Ես կարծում էի, թե այդ ցուցարարները կգնան իրենց լավ ընդունած հիմնարկ՝ դատախազություն, որովհետեւ այն , ինչ եղել է, դատախազության նախաձեռնությամբ է եղել։ Մեր կարծիքը առանձնապես չեն հարցրել՝ ոչ նիստ հրավիրելու, ոչ ժամ ճշտելու, ոչ որոշումն ընդունելու հարցում։ Սա դատախազության որոշումն է եղել, իրենց հետ ընկերություն անող դատավորի ու փողոցի հետ միասին։ Հիմա, իրենք իրար մեջ լեզու չեն գտնում, Մանվել Գրիգորյանից Ի՞նչ են ուզում»։

Փաստաբանը զուգահեռներ անցկացրեց Նարեկ Մութաֆյանի ու Սարգիս Օհանջանյանի՝ դատավոր Դանիբեկյանին ուղղված հայտնի հարցադրման ու Ջիվան Աբրահամյանի հայտարարությունների միջեւ եւ նշեց, որ եթե համապատասխան արձագանք չլինի, կստացվի, որ երկակի ստանդարտներ են գործում ։
«Կստացվի, որ մեկին կարելի է, մյուսին չի կարելի։ Ըստ էության, այս արարքը ավելի ծանր է, քան նրանց արածը։ Ընդ որում, սա արվում է ոչ թե նրա համար, որ տվյալ անձը չի գիտակցում, թե ինչ է անում, այլ լավ էլ գիտակցում է, ուղղակի այն աստիճանի բարձր հովանավորչություն ունի, որ ասում են՝ դու պրոբլեմ չունես»,-ասաց փաստաբանը։

Անդրադառնալով տեղեկություններին, թե հնարավոր է՝ Մանվել Գրիգորյանին դուրս գրեն հիվանդանոցից , պաշտպանը նշեց. «Նման տեղեկություններ տարածողները առնվազն անմեղսունակ պետք է լինեն։ Մարդիկ հիվանդ չե՞ն ունեցել, վերակենդանացման բաժանմունքից ո՞վ է դուրսգրում կատարում»։
Արսեն Մկրտչյանի փոխանցմամբ, Մանվել Գրիգորյանի վիճակը շարունակում է ծանր մնալ։ «Երեկվա ու այսօրվա վիճակի մեջ կարելի է ասել, փոփոխություն չկա։ Մոնիտորի վրայի թվերը, որտեղ մեզ հետաքրքրում է 30-40-ի իջեցում, 2 է իջել, այսինքն, շատ ծանր է վիճակը»,- փոխանցեց փաստաբանը։

Հիշեցնենք,որ Արցախի նախագահ Բակո Սահակյանի հասցեին հրապարակային սպառնալիքներ հնչեցրած ակտիվիստ Ջիվան Աբրահամյանը ֆեյսբուքյան ուղիղ եթերով հայտարարել էր. «Մենք Էջմիածնից որոշեցինք փոքր խմբով գնալ Նաիրի Բ/Կ։ Եթե նա իսկապես նման խնդիրներ ունի, ուրեմն իրեն հիվանդանոցից պիտի դուրս չգրեն։ Եթե դուրս չգրեն ու իսկապես առողջական այդքան լուրջ խնդիրներ ունի, ուրեմն պետք չի ոչ մի քայլ ձեռնարկել։ Իսկ եթե պարզվի, որ Գրիգորյանը պետք է դուրս գրվի հիվանդանոցից ու ստորագրության դիմաց չբացակայելու հիմքով գնա տուն, ապա դա բացարձակապես ընդունելի չէ։ Եթե կպահեն հիվանդանոցում, դա ուրիշ»։

Աղբյուր` Փաստինֆո