Փաստ ինֆո

Վաղարշապատի Գարեգին Նժդեհի անվան թիվ 8 հիմնական դպրոցի բողոքի ակցիա իրականացնող ուսուցիչներին սպառնացել են աշխատավարձ չտալ։ Այս մասին կառավարության շենքի մոտ բողոքի ակցիայի ժամանակ հայտնել է ակցիայի մասնակից ուսուցիչը։ «Հաշվապահն ասում է, որ կայքերը, որոնցով պետք է աշխատի արգելափակված են։ Այսինքն՝ եթե մեր հաշվապահը պետք է գործերն անի և փոխանցի, որ մենք աշխատավարձ ստանանք, նա չունի դրա հնարավորությունը, որովհետև կայքերն արգելափակված են։ Մեր ժամանակը սահմանափակ է՝ մինչև դեկտեմբերի 25-ը։ Եթե ինքը չհասցրեց փոխանցում կատարել, մենք մնում ենք առանց աշխատավարձի։ Մենք պատասխանել ենք՝ ձեզ լինի, ձեր աշխատավարձը»,- ասաց ուսուցչուհին։

Հիշեցնենք, որ Վաղարշապատի Գարեգին Նժդեհի անվան թիվ 8 հիմնական դպրոցի աշակերտները, ուսուցիչներն ու ծնողներն արդեն երկրորդ օրն է, ինչ բողոքի ակցիա են իրականացնում։ Նրանք դժգոհում են դպրոցում անցկացված տնօրենի ընտրությունից և պահանջում մարզպետի հետ հանդիպում։ Ակցիայի մասնակիցները հայտնում են՝ կրթական հաստատությունում իրականացված տնօրենի ընտրության մրցույթին 8 քվեարկողներից 7-ն են մասնակցել, ինչի արդյունքում 4 ձայն հավաքել է նախկին տնօրեն էսթեր Գալստյանը, 3 ձայն՝ Շուշանիկ Ոսկանյանը։ Սակայն Ոսկանյանն է նշանակվել տնօրեն՝ համաձայն մարզպետ Համբարձում Մաթևոսյանի որոշման:

Նրանք հաստատակամորեն ասում են՝ համայնքը համաձայն չէ այս որոշման հետ։ Ըստ ուսուցիչների՝ նորանշանակ տնօրենը վատ համբավ ունի, նախկինում նրա ղեկավարած դպրոցում հանցավոր դեպք է գրանցվել, ինչի պատճառով հեռացվել է, իսկ հիմա իրենց դպրոցում են տնօրեն նշանակել։

Աղբյուր` Փաստինֆո