Փաստ ինֆո

«Խոսքի ազատության պաշտպանության կոմիտե»-ի նախագահ Աշոտ Մելիքյանի գնահատմամբ Ժողովուրդ օրաթերթի խմբագրության հետ տեղի ունեցածը բիրտ ճնշում է լրատվամիջոցի նկատմամբ:

«Պահանջում ենք, որպեսզի իրավապահները բոլոր անհրաժեշտ միջոցները ձեռնարկեն մեղավորներին հայտնաբերելու եւ պատասխանատվության ենթարկելու համար»,-«Փաստինֆո»-ի հետ զրույցում ասաց նա՝ հավելելով, որ «Խոսքի ազատության պաշտպանության կոմիտե»-ն հանդես է եկել համապատասխան հայտարարությամբ:

Հիշեցնենք, որ այսօր առավոտյան «Ժողովուրդ» օրաթերթի խմբագրության աշխատակիցները խմբագրությունը հայտնաբերել են տակնուվրա արված։ Թանկարժեք իրերը՝ համակարգիչները, տեսախցիկները տեղում են մնացել, փոխարենը փաստաթղթերն են քարուքանդ են արվել։ Խմբագրությունը տեղի ունեցածը գնահատել է որպես ճնշման միջոց՝ թերթի նկատմամբ։

Աշոտ Մելիքյանի խոսքով, «ո ՞ւմ կողմից» հարցի պատասխանը պետք է տան իրավապահ մարմինները, իսկ բուն պատճառների մասին կարող ենք խոսել համապատասխան քննությունից հետո: Աշոտ Մելիքյանը չի բացառում, որ ինչ-որ մարդկանց կամ խմբի գուցե դուր չի եկել խմբագրության գործունեությունը կամ որեւէ հրապարակում:

«Խոսքի ազատության պաշտպանության կոմիտե»-ի նախագահն ասաց, որ լրատվամիջոցների դեմ ուղղված բոլոր գործողությունները իրենք գրանցում են եւ արտացոլում զեկույցներում՝ եռամսյակային եւ տարեկան, բայց Աշոտ Մելիքյանի համոզմամբ, օբյեկտիվության համար պետք է նշել, որ այս տիպի ճնշումները եւ առհասարակ, ճնշումները լրատվամիջոցների նկատմամբ նոր Հայաստանում անհամեմատ ավելի քիչ են , քան հին Հայաստանում :

Դիտարկմանն ի պատասխան, որ ե մասնագետների ու լրագրողների գնահատմամբ հիմա ճնշումներն այլ՝ առավելապես հոգեբանական եւ ոչ ֆիզիկական դրսեւորումներ են ստանում , թեեւ «Հայելի» մամուլի ակումբի ու «Ժողովուրդ» օրաթերթի խմբագրության դեպքում տեսանք ֆիզիկական գործողություն՝ ուղղված խմբագրությունների դեմ , Աշոտ Մելիքյանն ասաց, որ Ֆիզիկական գործողությունը այլ բան է: «Մենք ունենք մեր դասակարգման մեջ ֆիզիկական բռնությունները, դա լրիվ այլ բան է, դա Էլեկտրիկ Երեւանի ժամանակ էր, երբ 20-ից ավելի լրագրողների ֆիզիկական բռնության ենթարկեցին, Սարի թաղի դեպքերն էր, երբ 20-ից ավելի լրագրողներ ու օպերատորներ տուժեցին, ֆիզիկական բռնություններից, ֆիզիկական բռնություններ էին կիրառվում հեղափոխության օրերին, դրանց համեմատ այն, ինչ հիմա կատարվում է, իհարկե, շատ ցավալի է, բայց օբյեկտիվությունն այլ գնահատականներ է պահանջում»,-ասաց Աշոտ Մելիքյանը:

Նա բացառում է, որ «Ժողովուրդ» օրաթերթի խմբագրության դեմ հարձակումը իշխանության կողմից հրահանգավորված լինի: Նրա խոսքով, իշխանությունը հայտարարել է, որ ձեռնպահ է մնալու եւ բացառելու է լրատվամիջոցների գործունեությանը միջամտությունը եւ մեծ հաշվով խոստումը պահպանում է :

«Եթե անցած տարվա ապօրինի գործունեությունը ասում ենք, որ իշխանություններինն էր , նույնիսկ այդ դեպքում ես չեմ կարծում, որ քաղաքական իշխանությունն է հրահանգավորել, դա իրավապահ մարմինների ինքնագործունեությունն է, իմ գնահատմամբ, ինչը որեւէ հիմնավորում այդպես էլ չստացավ եւ ՀՔԾ-ն ու Քննչական կոմիտեն որեւէ հիմնավորում չբերեցին , թե ինչի համար էր օրինակ, այն զննումը եւ տեխնիկայի առգրավումը խմբագրությունում, բայց դրանում գտնել քաղաքական իշխանության հրահանգավորումը, նշանակում է ամեն ինչում քաղաքական ենթատեքստ տեսնել, ինչն այնքնա էլ տեղին չէ» ,-ասաց Աշոտ Մելիքյանը՝ նկատի ունենալով իրավապահների ներխուժումը Yerevan.Today.-ի խմբագրություն:

Հիշեցնենք, հոկտեմբերի 5-ին հարձակում էր եղել նաեւ «Հայելի» ակումբի վրա, 4 երիտասարդներ ձվեր էին նետել «Հայելի» ակումբի դռներին ու պաստառներ փակցրել։ Նրանցից մեկն ուղիղ եթերով հայտարարել էր, թե պահանջում է փակել լրատվամիջոցը։ Երիտասարդի խոսքով, իրենց «ակցիայի» պատճառը Hayeli.am կայքով հրապարակված «Ալիեւի ուշացած, բայց հուժկու պատասխանը Փաշինյանին» վերտառությամբ հոդվածն էր։

Աղբյուր` Փաստինֆո