Փաստ ինֆո

Դեկտեմբերի 2-ին զորամասի մարտական դիրքում սպանված պարտադիր ժամկետային Արթուր Աջամյանին մահացու հրազենայինն վնասվածքը պատճառվել է նրան իսկ ամրակցված ինքնաձիգից։ Այս մասին «Փաստինֆո»-ին հայտնել է ՀՀ ՔԿ դեպարտամենտի տեղեկատվության և հասարակայնության հետ կապերի բաժնի պետի պաշտոնակատար Նաիրա Հարությունյանը։ Իսկ թե որ զենքից է հրազենային վնասվածք պատճառվել զինծառայող Դավիթ Մելիքբեկյանին` դեռ վաղ է խոսել. ՔԿ-ից հայտնեցին, որ այդ հարցին կարող են պատասխանել միայն նշանակաված դատաձգաբանական փորձաքննության եզրակացությունն ստանալուց հետո:

Հիշեցնենք, որ զինվորն սպանվել է 2019թ. դեկտեմբերի 2-ին՝ վաղ առավոտյան։ Պաշտոնական հաղորագրության համաձայն, ժամը 06:50-ի սահմանում, ՊԲ հյուսիս-արևելյան ուղղությամբ տեղակայված զորամասերից մեկի պահպանության տեղամասում, մահացու հրազենային վիրավորում է ստացել ՊԲ զինծառայող, 1998թ. ծնված Արթուր Իշխանի Աջամյանը, իսկ զինծառայող, 1999թ. ծնված Դավիթ Հարությունի Մելիքբեկյանը վիրավորվել է: Քննչական կոմիտեն դեպքի առթիվ քրեական գործ է հարուցել սպանության հատկանիշներով՝ ՀՀ քրեական օրենսգրքի 34-104-րդ հոդվածի 2-րդ մասի 1-ին կետով /երկու կամ ավելի անձանց սպանության փորձ/։ Այսինքն՝ նպատակը եղել է երկու անձի սպանությունը։ Վիրավոր զինվորի կյանքի համար բժիշկները պայքարում են։

Մամուլում շրջանառության մեջ էր դրվել` զինվորի կողմից ծառայակցին սպանելու փորձ կատարելու, ապա ինքնասպանություն գործելու վարկածը, ինչը վրդովմունք էր առաջացրել մահացած զինծառայողի ծնողների, հարազատների մոտ, որոնք բողոքի ակցիա էին իրականացրել Աժ-ի մոտ` պահանջելով պարզել իրենց որդուն սպանողին. Նրանք հավատացած են, որ սպայական անձնակազմը շատ լավ գիտի, թե ինչ է տեղի ունեցել իրականում:

Տուժողի իրավահաջորդի ներկայացուցիչ, փաստաբան Հայարփի Սարգսյանը «Փաստինֆո»-ի հետ զրույցում նշեց, որ դեռ վաղ է ասել, թե կոնկրետ, որ ինքնաձիգից է Աջամյանին պատճառվել հրազենային վնասվածքը: Նրա փոխանցմամբ` գործով մասնակցել է քննչական որոշ գործողությունների և ծանոթացել որոշումներին, որոնցից մեկի համաձայն նշանականվել է դատաձգաբանական փորձաքննություն եւ զենքերն ուղարկվելու են փորձաքննության, ինչը նշանակում է, որ դեռևս փորձաքննության եզրակացությունն առկա չէ, հետևաբար խոսել, թե ինչ զենքից է կրակն արձակվել՝ անհիմն է։

Դիակի նկատմամբ նշանակված դատաբժշկական փորձաքննության կատարման ընթացքում դիակի վրա հայտնաբերվել են բռնության հետքեր` տարբեր վաղեմության: «Փաստինֆո»-ի ճշտող հարցին, թե արդյոք սեռական բնույթի բռնության հետքեր առկա եղել են` փաստաբանը հայտնեց, որ արտաքին զննությամբ նման հետքեր չեն հայտնաբերվել։ «Նմուշները, որոնք վերցվել են դիակից, ուղարկվել են փորձաքննության։ Վերջնական պատասխանը պաշտոնապես կստանանք` եզրակացությունն ստանալուց հետո, բայց այն, որ եղել են մարմնի վրա հին և նոր վնասվածքներ, միանշանակ է։ Ճակատին արյունազեղում է եղել, բացի՝ հրազենային վնասվածքից։ Եղել են ձեռքերի, ոտքերի, թիկունքի հատվածում վնասվածքներ»,- նշեց փաստաբանը։ Հարցին, թե ինչ հարաբերություններ են եղել վիրավորում ստացած զինծառայող Դավիթ Մելիքբեկյանի հետ, փաստաբանը պատասխանեց. «Որքանով որ ինձ հայտնի է` վատ հարաբերություններ չեն եղել։ Որևէ կերպ վիրավորի հետ լարված հարաբերություն չի եղել»։ Ինչ վերաբերում է հրամանատարի հետ խնդիրներին, Սարգսյանը պատասխանեց, որ խնդիրների հետ կապված մանրամասներին չի տիրապետում։ «Լրացուցիչ հարցաքննվել է նրա պապիկը, ով իրավահաջորդ է ճանաչված»,- ասաց Սարգսյանը՝ նշելով, որ չի կարող այս պահին հայտնել անձանց մասին, ում նախատեսվում է հարցաքննել։

Նրա խոսքով՝ վիրավորում ստացած զինծառայողի նկատմամբ եւս նշանակվել է դատաբժշկական փորձաքննություն, սակայն տեղյակ է, որ ոտքերի և ձեռքերի շրջանում եղել է հրազենային վնասվածքներ։

Հեղինակ` Իզաբել Սահակյան

Աղբյուր` Փաստինֆո