Փաստ ինֆո

Կառավարությունն այսօրվա նիստում հավանություն տվեց «Ապօրինի ծագում ունեցող գույքի բռնագանձման մասին» օրենքի նախագծին։ 

Նախագծով նախատեսվում է Գլխավոր դատախազությունում ստեղծել մի մարմին, որի ուշադրության կենտրոնում հայտնված անձանց ծանուցում է ուղարկվելու, առաջարկվելու է ներկայացնել եկամուտների ու գույքի հայտարարագիր, որի հիման վրա էլ որոշում է կայացվելու։

Արդարադատության նախարար Ռուստամ Բադասյանն ասաց, որ գույքի արժեքը համեմատվում է անձի իրական եկամուտների հետ, և եթե առաջանում է 25 մլն կամ ավելի դրամի տարբերություն, արդեն սկսվում է ծանուցման գործընթացը։

ՀՀ վարչապետ Նիկոլ Փաշինյանն էլ ասաց, որ դատախազությունում ստեղծվող մարմինը պետք է փնտրի և գտնի ապօրինի ծագում ունեցող գույք. «Ապօրինի ծագման գույքը բնորոշվում է այսպես, որ մարդու օրինական եկամուտներից չի բխում, որ ինքը կարող էր այդպիսի գույք ունենալ»,-հավելեց վարչապետը։
Ռուստամ Բադասյանն էլ ընդգծեց, որ առաջին հերթին ազդակ են հանդիսանում կոռուպցիոն բնույթի հանցագործությունները։ Կա հոդվածների շրջանակ, որոնք ազդակ են հանդիսանում ուսումնասիրություններ սկսելու համար և դրանք հիմնականում կոռուպցիոն բնույթի հանցագործություններ են։ Նախարարի խոսքով կա վեց հիմք. «Առաջին հիմքը, եթե կա օրինական ուժի մեջ մտած մեդադրական դատավճիռ, և կան ապօրինի ծագման գույքի մասին տվյալներ։ Երկրորդ, կա հարուցված քրեական գործ, և անձը մեղադրյալ է ներգրավվել նախագծով սահմանված հանցագործություններից մեկով, երրորդ, առկա են բավարար հիմքեր՝ կասկածելու, որ առկա է ապօրինի ծագում ունեցող գույք, բայց քրեական հետապնդումն անհնար է։ Չորրորդ, առկա են բավարար հիմքեր կասկածելու՝ առկա է ապօրինի ծագման գույք, բայց քրեական գործը կասեցվել է։ Հինգերորդ, օպերատիվ հետախուզական տվյալներով՝ առկա են բավարար հիմքեր, որ բացառապես պաշտոնատար անձինք ունեն ապօրինի ծագման գույք, այս դրույթը բացառապես պաշտոնյաներին է վերաբերում, մնացածներն ավելի լայն են, և վերջին հիմքը՝ միջազգային հարցումներին պատասխանելու միջոցով»,- ասաց Բադասյանը։

ՀՀ փոխվարչապետ Մհեր Գրիգորյանը հետաքրքրվեց՝ եթե կա օտարերկրացի, որը ինչ-որ ձևով ներդրում է արել կամ գումար է տեղաբաշխել Հայաստանում, այս օրենքի ուժով պետք է իրավունք ունենանք վարույթ հարուցել. «Չեմ կարողանում նախագծում գտնել այն դիսպոզիցիան, որն ասում է՝ սա վերաբերում է միայն պետական ծառայության մեջ եղած կամ պետական ծառայության մեջ գտնվող անձին։ Մենք սա ցանկացած անձի վրա կարող ենք տարածե՞լ»,-նշեց փոխվարչապետը։ Դրան ի պատասխան նախարարը նշեց՝ ոչ.

«Հոդված 5-ը սահմանում է ուսումնասիրություն սկսելու հիմքերը։ Պատկերացնենք օտարերկրյա ներդրող, որը Հայաստանում ներդրում է կատարել, 5-րդ հիմքը նրան չի վերաբերում, դա բացառապես պաշտոնատար անձանց է վերաբերում։ Առաջինից չորրորդ հոդվածներով այդ անձը օրենքում նշված հոդվածներից որևէ մեկով կամ պետք է դատապարտված լինի կամ իրեն մեղադրանք պետք է առաջադրված լիներ։ Օտարերկրյա ներդրողի նկատմամբ, եթե տեսական նայենք, հնարավոր է կիրառվի, բայց պետք է հասկանանք՝ ինքն ինչ քրեական գործով է անցնում, այդ քրեական գործն ինչի մասին է՝ կաշառք է տվել, կաշառքի միջնորդ է հանդիսացել»,-ասաց Ռուստամ Բադասյանը։

Աղբյուր` Փաստինֆո