Փաստ ինֆո

Այսօրվա իշխանությունը մեկ տարվա ընթացքում արել է այնքան գործ, ինչքան գործ չի արել Հանրապետական իշխանությունն իր 10 տարվա ընթացքում։ Լրագրողների հետ զրույցում այս մասին ասաց ԱԺ «Իմ քայլը» խմբակցության պատգամավոր Հրաչյա Հակոբյանը՝ անդրադառնալով ՀՀԿ-ի ներկայացուցիչների քննադատություններին։

«10 տարիների ընթացքում այդքան ճանապարհ չի վերանորոգվել, որքան ճանապարհ որակով վերանորոգվեց այս մեկ տարվա ընթացքում։ Այնպես որ Հանրապետական կուսակցության նախկին իշխանության ներկայացուցիչները թող հանգիստ նստեն տեղները և վայելեն այսօրվա մեր լավ երկիրը և վայելեն մեր ճանապարհները»,-ասաց պատգամավորը։

Դիտարկմանը, որ ՀՀԿ ներկայացուցիչներն ասում են՝ իշխանությունն ապօրինի ճանապարհով է զավթվել, Հրաչյա Հակոբյանն արձագանքեց. «Իյա, իրո՞ք»։

Հարցին՝ ի՞նչ բացթողումներ ունի ներկայիս իշխանությունն այս մեկ տարվա ընթացքում, պատգամավորը նկատեց՝ միանշանակ բացթողումներ կան, բայց եթե դրանք դրվեն նժարին, ապա առավելություններն ավելի շատ են. «Միանշանակ բացթողումներ, դժգոհություններ եղել են, այդ թվում բազմիցս խոսվել են դժգոհությունների մասին, որ մարդիկ մեզանից դժգոհել են, որ ավելի կոշտ միջոցներով չենք գործել, բայց այդ դժգոհությունների մասին չեմ խոսում։ Ուսուցչի աշխատավարձը բարձրացել է, բժշկի աշխատավարձը բարձրացել է, ինձ մոտեցել են այլ ոլորտի աշխատողներ և ասել են՝ ինչու մեր աշխատավարձը չի բարձրացել և բողոքել են։ Այսպիսի հարցեր կան, բայց բոլորս էլ հասկանում ենք, որ միանգամից ամեն ինչ չի կարող լավանալ և իր տեղն ընկնել»,-նշեց պատգամավորը։

Պատգամավորը նաև տեղեկացրեց, որ ընդունելու է Աննա Հակոբյանի մարտահրավերը՝ միանալու «Հայաստան» համահայկական հիմնադրամի դրամահավաքին, պատրաստվում է հաստատել իր մասնակցությունը և մարտահրավեր նետել իր ընկերներին։ Հարցին՝ փոխանցելու է 10 հազ դրամ, թե ավելի շատ, պատգամավորն ասաց. «Երևի 10 հազ դրամ, քանի որ աշխատավարձով ենք ապրում։ Սկզբի համար 10 հազ դրամ»։

Անդրադառնալով Ամանորի տոնի համար 700 հազ դոլարի հատկացմանը՝ պատգամավորն ասաց. «Մինչև չտեսնեմ ինչ միջոցառում է կազմակերպվել, մինչև չտեսնեմ տեղին է ծախսվել այդ գումարը, թե ոչ, չեմ կարող այդ գնահատականը տալ։ Պետք է տեսնենք՝ ինչպես է զարդարվել։Պետք է գնահատենք, թե մեր ժողովուրդն ինչքանով լավ Ամանորի գիշեր անցկացրեց, եթե ստացված լինի, ժողովուրդը գոհ, ուրախ Ամանորի գիշեր անցկացնի, կարծում եմ՝ տեղին կլինի»,-ասաց պատգամավորը։

Դիտարկմանը՝ ավելի լավ չէ այդ միջոցները ծառայեցնել հասարակական, սոցիալական խնդիրներին, Հրաչյա Հակոբյանը նշեց, որ միշտ ավելի լավ է. «Կարելի է ընդհանրապես ոչինչ չանել։ Անցած տարի տեղադրվեց տոնածառը և դրա մասին էր խոսվում, թե ինչու այս գնանոց եղևնի տեղադրել Հրապարակում, այլ կարելի էր մի երկու հոգու բնակարան վերանորոգել կամ վերելակ վերանորոգել։ Միշտ կարելի է ինչ-որ բան գտնել ու ասել՝ սա մի արեք, այս հարցը լուծեք։ Եկեք ասֆալտ չանենք, ասֆալտի փոխարեն կարող էինք 5 հատ վերելակի հարց լուծեինք։ Ասֆալտն ինչ է մեքենան է փչանում ասֆալտից, իսկ վերելակը երբ պոկվում է, մարդիկ են վնասվում։ Հերթականությամբ պետք է անդրադառնանք»,-հավելեց Հրաչյա Հակոբյանը։

Աղբյուր` Փաստինֆո