Փաստ ինֆո

Սահմանադրական դատարանի դատավորների իրավունքն է օգտվել այս հնարավորությունից, համենայն դեպս սա մեր կողմից ձեռքսեղման առաջարկ էր։ Լրագրողների հետ զրույցում այս մասին ասաց «Իմ քայլը» խմբակցության ղեկավար Լիլիթ Մակունցը՝ պատասխանելով հարցին արդյոք դատավորները կհետևեն վաղ կենսաթոշակի անցնելու օրինագծին։

«Սահմանադրական դատարանը որպես ինստիտուտի կայացման համար, բարեփոխումներ իրականացնելու համար կարևոր քայլ է։ Կօգտվեն, թե չեն օգտվի, իրենց իրավունքն է»,-նշեց Լիլիթ Մակունցը։

Դիտարկմանը, որ Վրաստանի արդարադատության նախարարը նշել է՝ իրենց մոտ եղել են դատավորներ, որոնք հետևել են, եղել են դատավորներ, որոնք չեն հետևել և ընդհանուր առմամբ չհաջողված համարեց փորձը, Լիլիթ Մակունցն արձանագրեց. «Մենք ասում ենք, որ սա այն քայլերից մեկն է, որը միտված է բարեփոխումներին և այդ ինստիտուտի կայացմանը։ Չեմ կարծում, որ նման խնդիր, Արդարադատության նախարարությունը նման խնդիր չի դնում։ Ես ավելի շատ կարևորում եմ Արդարադատության նախարարության կողմից ներկայացվող այն ռազմավարական փաթեթը, որն իր մեջ ներառում է ոչ միայն գործադիրի կողմից քայլերի շարք, այլև ենթադրում է օրենսդրական նախագծերի ընդունում։ Ավելի շատ կարևորում եմ այս փաթեթը, որովհետև համապարփակ, խորքային փոփոխությունների համար այն մեծ նշանակություն է ունենալու։ Արդարադատության նախարարությունն այժմ աշխատում է նաև ոստիկանության բարեփոխումների ուղղությամբ, որը նույնպես համարում եմ դրա մի մասը»,-ասաց Լիլիթ Մակունցը։

Հարցին՝ արդյոք կարող ենք ասել, որ այս մեկ տարվա ընթացքում մարդիկ ավելի երջանիկ են դարձել, պետությունն ավելի հզոր է դարձել, Լիլիթ Մակունցը նշեց, որ մեկ տարվա ընթացքում բավականին քայլեր են կատարվել, որոնք մոտեցնելու են հենց այդ ձևակերպումներին. «Հատկապես միջազգային հարթակներում Արցախի հիմնահարցի հետ կապված մեր դիրքերն ուժեղ են ավելի քան երբևէ, և այն հեղինակությունը, որն ունի ՀՀ-ն միջազգային կառույցներում, միջազգային հարթակներում մեր գործընկերների շրջանակում, հենց դրա մասին են վկայում։ Դրանք օգնելու են ոչ միայն արտաքին քաղաքականության ուղղությամբ մեր առաջնահերթությունները, մեր շահերն առաջ տանելուն, այլև օգնելու են նաև ներքին բարեփոխումներ իրականացնելու և ժողովրդավարության կայացման համար»,-նշեց Լիլիթ Մակունցը։

Ինչ վերաբերում է երջանիկ անհատին և հոգատար հանրությանը, «Իմ քայլը» խմբակցության ղեկավարը խոսեց խորհրդարանի կողմից ընդունված նախագծերի ուղղությամբ, թե ինչ քայլեր են իրականացվել այդ ուղղությամբ. «Չի կարելի ասել, որ դրանք միակ քայլերն են, բայց օրինակ նվազագույն աշխատավարձի բարձրացումը, քրեական հեղինակությունների հետ կապված օրինագծի քննարկումը, որը միտված է երջանիկ անհատի և հոգատար հանրության կերտմանը։ Մի շարք նախագծեր կան, դրանք իհարկե բավարար չեն, մենք առաջիկայում շատ աշխատանք ունենք անելու և առաջիններից մեկը, որը հաջորդ տարի պետք է մեր բոլոր ջանքերն ուղղված լինեն այն է, որ ՀՀ քաղաքացին զգա, որ ինքն ապրում է արդարության մթնոլորտում։ Դատաիրավական համակարգի բարեփոխումների ռազմավարության փաթեթը դիտարկում եմ հենց այդ համատեքստում»,-հավելեց Լիլիթ Մակունցը։

Հեղինակ ՝ Հասմիկ Կոշկարյան

Աղբյուր` Փաստինֆո