Փաստ ինֆո

ԱԺ «Բարգավաճ Հայաստան» կուսակցության կողմից ԱԺ նիստի բոյկոտումը բնական քաղաքական բանավեճ է։ Այս մասին «Փաստինֆո»-ի հետ զրույցում ասաց ԱԺ անկախ պատգամավոր Արման Բաբաջանյանը։ Վերջինս նշեց, որ դեռևս «Լուսավոր Հայաստան» խմբակցության անդամ լինելու ընթացքում պարբերաբար խոսել է բիզնեսի և քաղաքականության տարանջատման անհրաժեշտության մասին և իշխանությունն ականջալուր չեղավ ժամանակին։ «Այն, ինչ տեղի է ունենում՝ բիզնեսի և քաղաքականության միահյուսված լինելու վառ արտահայտությունն է, ինչի դրսևորումը մենք տեսնում ենք խորհրդարանում»,- ասաց Բաբաջանյանը։ 

Ըստ նրա՝ այստեղ Գագիկ Ծառուկյանի անձի հարցը չէ, այլ այս բանավեճը բախումն է բիզնեսի նախկին արատավոր համակարգի և ներկա, ապագա տեսլական ունեցող թիմերի։ «Հասկանում եմ, որ ԲՀԿ գործընկերները դժվարությամբ են ադապտացվում նոր իրողություններին, այս նոր լեզվին, որ բերել են իշխանության նորաթուխ կամ նորընծա պատգամավորները և նրանց համար դժվար կլինի հասկանալ, թե ուր է ընթանում պետությունը»,- նշեց Բաբաջանյանը։ Նրա խոսքով՝ ԲՀԿ նախագահին պատկանող ընկերություններից մեկի նկատմամբ քրեական վարույթ կա և այս քաղաքական ակտիվությունն առնչվում է նաև այդ ընկերության նկատմամբ իրականացվող քրեական գործին։

Բաբաջանյանը նշեց, որ Գագիկ Ծառուկյանին պատկանող «Մուլտի Գրուպ» ընկերության տնօրեն Սեդրակ Առուստամյանն այս պահին քրեական հետապնդման ներքո է և գործը բազմամիլիարդ մսխումների մասին է։ «Վարկային միջոցները, որ պետությունը ձեռք է բերել, մսխվել են մասնավորների կողմից։ Կասկածներ կան, որ «Մուլտի Գրուպը» դրանում ներքաշված է։ գուցե քաղաքական ակտիվությունն այդ գործի շրջանակում տեղի ունեցող քննչական գործողություններին է առնչվում»,- ընդգծեց պատգամավորը։

Աղբյուր` Փաստինֆո