Փաստ ինֆո

«Սա իմ երազած Հայաստանն է, որտեղ այլեւս չի լինի պարտադիր զինվորական ծառայություն»,-այսօր լրագրողների հետ հանդիպմանը հայտարարել է ԱԺ «Իմ քայլը» խմբակցության պատգամավոր Հայկ Սարգսյանը՝ խոսելով իր նախաձեռնած օրինագծի մասին։

Հիշեցնենք, «Արագացված զինվորական ծառայության մասին» օրինագծով պատգամավոր Հայկ Սարգսյանը առաջարկում է, որպեսզի զինծառայությունից խուսափող քաղաքացիների համար ստեղծվի հնարավորություն ՝ 10 միլիոն դրամ վճարելով ծառայություն անցնել 1 ամիս ժամկետով։

«Քաղաքացին, ով այսօր խուսափում է ծառայությունից միեւնույն է չի ծառայում, մենք նրան տալիս ենք ծառայելու հնարավորություն, նախ ինքն է ծառայում եւ ընդգրկվում է պահեստազորում»,-ասաց Հայկ Սարգսյանը։

Նա ներկայացրեց միջազգային փորձը, որն ուսումնասիրել է, ասաց՝ կան մի շարք երկրներ, որտեղ արագացված ծառայությունը կիրառվում է։ «Նման կարգավորում կա Վրաստանում, որտեղ հնարավոր է 1 տարի տարեկետում ստանալ՝ ՀՀ դրամով 363 հազար դրամ, այսինքն, 9 անգամ վճարելով 363 հազար դրամ եւ ազատվել ծառայությունից։ Թուրքիայում այդ գումարը միանվագ է եւ մուծում են 1 միլիոն 300 հազարի չափով դրամ եւ ծառայում 21 օր, Հունաստանում մոտ 4 միլիոն դրամ են վճարում....Եվ մի շարք երկրներում պարտադիր զինծառայություն չկա։ Սա իմ երազած Հայաստանն է , որտեղ այլեւս չի լինի պարտադիր զինվորական ծառայություն»։

Օրինագծի կարեւորությունը, ինչպես ասաց Հայկ Սարգսյանը, պայմանավորված է նրանով, որ մենք շրջապատված ենք թշնամիներով.«Այսինքն, այս օրենքի նախագիծը հենց ուղղված է պաշտպանության նախարարության ուժեղացմանը եւ մեր դիրքերում մեր քաղաքացիների թվի աճին։ Այսինքն, այս օրենքի նախագծով զինծառայողների թիվը միայն ավելանալու է։ Մեր 18 տարեկան քաղաքացին, ով չի ծառայելու եւ վճարելու է 10 միլիոն դրամ, իր փոխարեն ծառայելու են ավելի ավագ եւ փորձառու պայմանագրային զինծառայողներ, ովքեր ավելի լավ կկատարեն իրենց առաքելությունը»,-հայտարարեց նա։
Հայկ Սարգսյանի տրամաբանությամբ, երբ զինծառայությունից խուսափող քաղաքացին բնակվում է արտերկրում, չի ծառայում ու չի ծառայելու, իսկ առաջարկած նախագծով, նախ նրան կբերենք, ապա՝ տվյալ քաղաքացու իր ֆինանսական միջոցները, որոնք կուղղվեն պայմանագրային ծառայությանը, այդպիսով նաեւ աշխատատեղ կստեղծվի։

«Այսպես նաեւ Հայաստանը լքողների դեմն ենք առնում։ Մենք նոր արտագաղթողներին ասում ենք՝ մի արտագաղթեք»։
Հայկ Սարգսյանի մոտավոր հաշվարկով առաջիկա մի քանի տարիներին օրենքից օգտվողների թիվը կլինի մի քանի հազար, իսկ մի քանի տարի հետո՝ հազար։
Սարգսյանի խոսքով, 2005 թ-ից գործող կարգավորմամբ, 27 տարին լրացած անձինք կարող են վերադառնալ ՀՀ և ծառայությունից խուսափելու համար չենթարկվել քրեական պատասխանատվության՝ վճարելով 3.6 մլն դրամ. «Մոտ 10 հազարից ավելի քաղաքացիներ օգտվել են այս հնարավորությունից։ Ես առաջարկում եմ մեր քաղաքացիներին վերադառնալ հայրենիք ավելի վաղ, քան կլրանա նրանց 27 տարեկանը, և վճարել 10 մլն դրամ ու ծառայել արագացված ընթացակարգով»։

Աղբյուր` Փաստինֆո