Փաստ ինֆո

ԱԺ «Իմ քայլը» խմբակցության պատգամավոր Անդրանիկ Քոչարյանը հաստատել է, որ որդին ներկայումս գտնվում է Լուսակերտի զորամասում, ուր տեղափոխվել է Արցախից։ Նրա պարզաբանմամբ՝ որդին ներկայումս ուսումնառություն է անցնում Լուսակերտում։ «20 օր հետո տեղափոխվելու է Արցախ»,- վստահեցրեց Ա.Քոչարյանը։

Անդրադառնալով Հայկ Սարգսյանի կողմից շրջանառության մեջ դրված վիճահարույց օրինագծին՝ Անդրանիկ Քոչարյանը ձեռնպահ մնաց այն մեկնաբանելուց՝ ասելով, որ այն դեռ քննարկումների երկար ճանապարհ պետք է անցնի։

Հիշեցնենք, որ «Արագացված զինվորական ծառայության մասին» օրինագծով պատգամավոր Հայկ Սարգսյանը առաջարկում է, որպեսզի զինծառայությունից խուսափող քաղաքացիների համար ստեղծվի հնարավորություն ՝ 10 միլիոն դրամ վճարելով ծառայություն անցնել 1 ամիս ժամկետով։

Նա նշեց, որ ինքը, Մխիթար Հայրապետյանն ու Արման Բաբաջանյանը շրջանառության մեջ են դրել մեկ այլ նախագիծ որով առաջարկվում են խստացված իրավակարգավորումներ՝ 27 տարին լրացած և ծառայություն չանցած քաղաքացիների համար։ «Առաջարկել ենք այնպիսի մեխանիզմներ, որոնք լուծելու են այնպիսի համակարգային խնդիրներ, ինչպիսին են առաջնագծի լուրջ փոփոխությունները»,-ասաց Ա.Քոչարյանը։

Հարցին, մտավախություն չկա՞, որ շատերը կվճարեն 10 մլն դրամ և չեն գնա ծառայության, Անդրանիկ Քոչարյանը պատասխանեց. «Ես չեմ քննարկում Հայկ Սարգսյանի նախագիծը, որը դեռ շրջանառության մեջ է դրված։ Պատգամավորն ուսումնասիրություններ է արել, որտեղ շատ հետաքրքիր էլեմենտներ կան, բայց դա չի նշանակում, որ դրանք ամբողջական են և պետք է մտնեն որպես օրենք, սակայն կան բավականին հետաքրքիր առաջարկներ, որոնք կարող է ներառվեն մեկ այլ օրենքի մեջ»։

Խոսելով Երևան քաղաքի վարչության նախկին պետ Աշոտ Կարապետյանի մահվան մասին՝ հանձնաժողովի նախագահն ասաց. «Ափսոսում եմ, մարդկային կյանք է գնացել, անկախ նրանից մարտի 1-ի գործով վկա է, թե ոչ։ Ի վերջո` նա կարող էր կարևոր վկայություն տալ, եթե մարտի 1-ի դատաքննությունը սկսվեր, բայց ինքներդ էլ տեսնում եք՝ Քոչարյանի և նրա փաստաբանական խմբի տակտիկական քայլերը բերում են նրան, որ դատաքննությունն ինչքան հնարավոր է հետաձգեն։ Որքան հետաձգեն, այնքան այդպիսի դժբախտ պատահարները, ինքնասպանությունները, սպանությունները...այդ քրեական գործի տիրույթից կարևոր էլեմենտներ են պակասում ևա այդ առումով, իհարկե, ափսոսանք կա։ Կոչ եմ անում դատավորին գտնել հնարավորություն դատաքննական պրոցեսն արագ սկսելու համար»։

Մանրամասները՝ տեսանյութում։

Աղբյուր` Փաստինֆո