Փաստ ինֆո

«Դա ոչ միայն շատ վտանգավոր է, այլեւ անթույլատրելի եւ ցավոք, առաջին դեպքը չէ, որ մենք ականատես ենք լինում նման միջադեպի»,-«Փաստինֆո»-ին ասաց «Ազգային անվտանգություն» կուսակցության նախագահ Գառնիկ Իսագուլյանը՝ անդրադառնալով Միլանի հայկական եկեղեցում վարչապետ Նիկոլ Փաշինյանի ՝ հայ համայնքի հետ հանդիպմանը արձանագրված միջադեպին։

Հիշեցնենք, հանդիպման ընթացքում բլոգեր ներկայացած ադրբեջանցին ագրեսիվ տոնայնությամբ հարցեր էր ուղղել ՀՀ վարչապետին, պահանջել «վերադարձնել Շուշին, ազատել Իլհամին ու Շահբազին» (խոսքը Արցախում պատիժը կրող ադրբեջանցի դիվերսանտների մասին է,-խմբ.) ։ Հիշեցնենք այս միջադեպից կարճ ժամանակ առաջ Փարիզում ՀՀ վարչապետին հարց էր ուղղել լրագրող ներկայացած այլ ադրբեջանցի, որի գրիչով, ի դեպ, ՀՀ վարչապետը գրառել էր իրեն ուղղված հարցերը։

Գառնիկ Իսագուլյանն ասում է՝ անկախ որեւէ մեկի անձնական վերաբերմունքից Նիկոլ Փաշինյանի նկատմամբ , տեղի ունեցած միջադեպը երկրի առաջին դեմքի անվտանգության պահպանման տեսանկյունից խնդրահարույց է։ «Երկրի առաջին դեմքի անվտանգության ապահովումը մեր անվտանգության ծառայության թիվ մեկ խնդիրներից մեկն է՝ թե ՀՀ-ում նրա շրջագայության ժամանակ, թե արտերկրում, բայց սա արդեն որերորդ դեպքն է որ պատահական մեկը կարողանում է մուտք գործել, գրպանից հանել ինչ-որ սարք, տվյալ պարագայում հեռախոս, մեկնել ու հարցեր տալ»,-ասաց Իսագուլյանը՝ հավելելով.«Այդ մարդու գրպանում կարող էր լինել ցանկացած բան՝ սկսած ամենավտանգավոր պայթուցիչներից, մինչեւ ատրճանակ եւ այլն»։

Իսագուլյանը կարծում է ՝ ՀՀ իշխանությունն ու մասնավորապես ՀՀ վարչապետը դուրս չի եկել այն մտայնությունից, որ ինքն այլեւս սովորական քաղաքաց չէ, այլ երկրի ղեկավար։

«Ասեմ, որպեսզի շատերը իմանան՝ թիկնազորը իր պաշտպանյալի պաշտպանության խնդիրներում չի ենթարկվում նրան, ում պաշտպանում է, այսինքն, այդ մարդիկ, երբ վարչապետն ասում էր՝ չէ, չէ, թույլ տվեք, թող գա, պարտավոր էին ասել՝ ներողություն, դա մեր գործն է»,-նկատեց Իսագուլյանը՝զարմանք հայտնելով, թե ինչո՞վ էին զբաղված այն մարդիկ, որոնք պարտավոր են ապահովել Փաշինյանի անվտանգությունը։

Նշենք, որ հրապարակված կադրերում երեւում է, թե ինչպես է ադրբեջանցին գրպանից հանում հեռախոսն ու զուգահեռ , հավանաբար, տեսանկարահանում Փաշինյանի խոսքը, իսկ վարչապետի խոսնակ Վլադիմիր Կարապետյանն անգամ մի պահ ձեռքով փորձում է հետ պահել վերջինիս։

Հավելենք նաեւ, որ հայկական ֆեյսբուքում լուսանկարներ հրապարակվեցին, որոնք փաստում էին, որ Փաշինյանին հարց ուղղած երիտասարդը ոչ թե բլոգեր է, այլ, հավանաբար, Ադրբեջանի ոստիկանության աշխատակից, գուցե նաեւ անվտանգության ծառայող։ Հրապարակված տեսանյութերում ու լուսանկարներում նույն անձը ընդդիմության բողոքի ցույցերի ժամանակ զբաղված է ցուցարարներին մեկուսացնելով։

«Գուցե Վլադիմիր Կարապետյա՞նն էր վարչապետի թիկնազորի պետը, ես չգիտեմ, բայց այն, ինչ հիմա անում է ազգային անվտանգությունը, եւ ոչ միայն թիկնազորային վարչությունը, ամենեւին չի տեղավորվում այն խնդիրների մեջ, որոնց համար այդ ծառայությունը կոչված է»,-նշեց Իսագուլյանը։
Դիտարկմանը, արդյո՞ք այս միջադեպը կարելի է տեղավորել այսպես ասած, ժողովուրդների միջեւ երկխոսության հաստատման քայլերի շրջանակում՝ Գառնիկ Իսագուլյանն ասաց՝ նույնիսկ այդ դեպքում մեթոդներ ու ձեւեր կան, թե ինչպես իրականացնել այդ ամենը։

Այս ամենի համատեքստում Իսագուլյանը հիշեց վարչապետի աշխատակազմի «Հանրային կապերի եւ տեղեկատվության կենտրոն» ՊՈԱԿ-ի «Օրբելի» վերլուծական-հետազոտական կենտրոնի փորձագետ Անդրանիկ Հովհաննիսյանի արտաքսումը Հայաստանից։ « Դա ԱԱԾ-ի ուղղակի ոչնչացում էր նշանակում, երբ այսօր 37 հազարից ավելի պակիստանցի է մտել Հայաստան , որոնք , չի բացառվում՝ տարբեր ահաբեկչական գործողությունների մասնակից են, նրանք հայ երիտասարդին են համարում ՀՀ-ի համար վտանգ եւ արտաքսում երկրից։ Անհասկանալի է, նրանք չեն կարող բացատրել, թե այդ մարդը պետության համար ինչ վտանգ է ներկայացնում։ Դա աբսուրդ է, այդ երիտասարդը մի քանի նամակով դիմել է վարչապետին, որ պատրաստ է գալ Հայաստան եւ իրեն ձերբակալեն, բայց ինքը վտանգ չի ներկայացնում։ Եթե Նիկոլ Փաշինյանը ուզում է լսել ժողովրդի ձայնը, թող լսի»,-եզրափակեց Իսագուլյանը։

Աղբյուր` Փաստինֆո