Փաստ ինֆո

ՀՀ զինված ուժերում մահվան հիմնական դեպքերը գրանցվում են ոչ թե հակառակորդի արձակած կրակոցների, այլ զինվորների միջեւ ոչ բարյացակամ հարաբերությունների հետեւանքով։ Այսօր նման հայտարարությամբ է հանդես եկել ԱԺ «Իմ քայլը» խմբակցության պատգամավոր Քրիստինե Պողոսյանը։

Մասնավորապես՝ ԱԺ-ում «ՀՀ Քրեական օրենսգրքում փոփոխություններ եւ լրացումներ կատարելու» եւ «Քրեական դատավարության օրենսգրքում փոփոխություններ եւ լրացումներ» կատարելու մասին օրինագծերի քննարկման ժամանակ «Իմ քայլը» խմբակցության պատգամավոր Քրիստինե Պողոսյանն ասաց, որ 2015-2019 թվականներին միջանձնային հարաբերությունների տարբեր խնդիրների պատճառով մահացել է ՀՀ Զինված ուժերի 158 զինվոր: Նա համեմատության համար նշեց, որ նույն ժամանակաշրջանում հակառակորդի զենքից զոհվել է 150 զինվոր:

«Մենք գիտենք, թե որքանով է դա ամուր մտել բանակ։ Ինչ ողբերգական հետևանքներ է թողնում բանակում՝ բոլորս տեսնում ենք։ Որպեսզի պատկերացնեք ողբերգության ամբողջ խորությունը հետաքրքրվեք յուրաքանչյուր դեպքի որտեղից ծագելն ու ուր հասնելը»,-ասաց Պողոսյանը։

Պատգամավորը նշեց՝ իրեն չի հետաքրքրում, թե ով ում կողմից է հարգված և որքան խելացի է, փոխարենը հետաքրքրում է երեխաների ապագան. «Մենք հիմա սա անում ենք, որպեսզի մեր երեխաներին զերծ պահենք այս ամենից։ Բոլորս էլ հասուն մարդիկ ենք և որևէ կերպ կարող ենք պաշտպանվել, մեր գիտակից լինելով կարող ենք զերծ և հեռու մնալ։ Այն ինչ անում ենք, անում ենք նրա համար, որ այս թվերը, որ գրանցվել են բանակում նվազեն և հասնեն զրոյի»։

Մանրամասները՝ տեսանյութում։

Հեղինակ՝ Սոնա Գեւորգյան

Աղբյուր` Փաստինֆո