Փաստ ինֆո

Երևանի ընդհանուր իրավասության դատարանում ՝ դատավոր Վարդան Գրիգորյանի նախագահությամբ, սկսվել է քրեական հեղինակություն համարվող «Շալո» մականունով հայտնի Շալիկո Մանուչարյանի սպանության նախապատրաստման գործով դատավարությունը։

«Փաստինֆո»-ն ավելի վաղ հայտնել է, որ Վանաձորում բնակվող քրեական հեղինակության սպանությունը ծրագրվել էր իրականացնել 2017 թվականի գարնանը, ինչի համար Հայաստան է հրավիրվել նաև դիպուկահար, ով, լինելով ՀՀ քաղաքացի, վերջին տարիներին բնակվել է արտերկրում։ Վերջինս Հայաստան է ժամանել 2017 թվականի ապրիլի 19-ին և մի քանի օր նախ մնացել է օդանավակայանին հարակից հյուրատներից մեկում, ապա՝ հանցակցի հետ ապրիլի 24-ին տեղափոխվել Վանաձոր, որտեղ բնակվել են նախապես վարձակալված բնակարանում։ Սակայն, նախաքննության տվյալներով, մինչ դիպուկահարը կիրականացներ պատվերը ու կսպաներ քրեական հեղինակությանը, վարձակալված բնակարանում սպանվել է հենց նա։

Դիպուկահարի՝ Եվգենի Կաչակի դին հայտնաբերվել է 2017 ապրիլի 29-ին՝ Երեւանում, Սիլիկյան թաղամասում գտնվող գերեզմանատանը՝ բռնության բազմաթիվ հետքերով։ Հետագայում պարզվել էր, որ նա սպանվել է Վանաձորում՝ վարձակալված բնակարանում, իսկ հետքերը թաքցնելու համար նրա դին տեղափոխել էր Երեւան։ Ընդ որում՝ նրա մոտ չի եղել որեւէ փաստաթուղթ եւ օրեր շարունակ ոստիկանությանը չէր հաջողվում պարզել նրա ինքնությունը, թեեւ նա նախկինում եղել է ոստիկանության 6-րդ վարչության աշխատակից։

Կաչակի սպանությունն առայժմ բացահայտված չէ, սակայն դրա քննության ընթացքում բացահայտվել է քրեական հեղինակության սպանության նախապատրաստությունը, որի համար մեղադրանք է առաջադրվել Երեւանի բնակիչ Սամվել Այվազյանին։ Ընդ որում, ըստ որոշ տեղեկությունների Սամվել Այվազյանը ճանաչել է նաեւ Կաչակին եւ հենց նա էր նրան հրավիրել՝ Շ.Մանուչարյանին սպանելու համար։ Նշենք, որ նախաքննության փուլում մեղադրյալ Այվազյանի նկատմամբ որպես խափանման միջոց էր ընտրվել կալանավորումը, սակայն դատարանում այն փոխարինվել է ստորագրությամբ՝ չհեռանալու մասին։

Այսօր տեղի ունեցած առաջին դատական նիստին տուժողը՝ քրեական հեղինակություն համարվող «Շալո»-ն նիստին չէր ներկայացել. Նա իրեն տուժող չի համարում, իսկ ամբաստանյալի պաշտպանները մեղադրող դատախազ Վահան Սարգսյանին բացարկի միջնորդություն ներկայացրեցին՝ հայտարարելով, թե նա ունի կանխակալ վերաբերմունք ամբաստանյալի նկատմամբ։ Պաշտպան Աննա Ծառուկյանը նշեց, որ դատախազի գործողությունների և անգործության հետեւանքով Այվազյանի նկատմամբ ապօրինի հետապնդում է իրականացվել։

Պաշտպանն ընդգծեց, որ դատախազը պետք է վերասհկեր մինչդատական վարույթի ապօրինի, ոչ իրավաչափ գործողությունները և որպես հսկողություն իրականացնող հանրային սուբյեկտ՝ պետք է իր գործիքակազմում զսպող մեխանիզմներ գործածեր քրեական դատավարության սուբյեկտների իրավունքների ոտնահարումը կանխելու համար, ինչը դատախազի կողմից չի կատարվել։

Ծառուկյանը հայտարարեց, թե քննիչը վարույթում առկա նյութերը թաքցրել է դատարանից, մոլորեցրել է դատարանին՝ նշելով, որ կալանքի պայմանների ժամանակ հիմնավոր կասկածը շարունակվում է, մինչդեռ՝ գործում առկա է եղել ենթադրյալ տուժող Շալիկո Մանուչարյանի ցուցմունքը, ով նշել է, որ չի ճանաչում ամբաստանյալին և Կաչակին, իրեն տուժող չի ճանաչում և թշնամություն չի ունեցել նախկինում։

Փաստաբանի խոսքով՝ նախաքննության փուլում քննիչը կատարել է նաև այլ խախտումներ, այն է՝ գործով վկային նախաքննության փուլում ներկայացրել է նախաքննական տվյալներ, հաղորդակցվել նրա հետ աշխատանքային ժամից հետո, ուղարկել բնակարանի լուսանկարները, որտեղ կատարվում էր խուզարկություն։ Պաշտպանը նշեց, որ վերոնշյալ խախտման վերաբերյալ հանցագործության մասին հաղորդում են ներկայացրել ԱԱԾ, որտեղից այն հասցեագրվել է Դատախազություն։

Ներկայացված բացարկի միջնորդությանը միացավ նաև ամբաստանյալ Սամվել Այվազյանը և նրա մյուս պաշտպան Գուրգեն Հովհաննիսյանը։ Վերջինս հավելեց, թե մեղադրանքը շինծու է։

Ներկայացված միջնորդությանը առարկեց մեղադրող Վահան Սարգսյանը՝ ընդգծելով, որ ներկայացված բացարկի միջնորդությունն անհիմն է։ Դատախազը նշեց, որ միջնորդության մեծ մասը վերաբերում էր քրեական գործում առկա ապացույցների վերլուծմանը, հետազոտմանը, մինչդեռ այդ ապացույցները դատարանի կողմից պետք է դեռ հետազոտվեն։

Անդրադառնալով միջնորդության մյուս հիմքերին՝ դատախազը նշեց, որ ներկայացվել են վկայի և մեղադրյալ Սամվել Այվազյանի առերես կատարված հարցաքննությունների արձանագրությունները, իսկ ինչ վերաբերում է քննիչի կողմից ինչ-որ նյութեր չներկայացնելուն, ապա դատախազը նշեց, որ վարույթն իրականացնող մարմինն ինքն է որոշում՝ ինչ նյութ ներկայացնի, ինչը չներկայացնի՝ խափանման միջոցի հարցը քննարկելիս։

«Եթե ինչ- որ նյութ առկա է և չի ներկայացվել, դա կարող է խոսել միայն հօգուտ մեղադրյալի»,- ասաց մեղադրողը՝ հավելելով, որ պաշտպանների տրամաբանությամբ առաջնորդվելու դեպքում պետք է ինքնաբացարկի միջնորդություն ներկայացվի դատավորին, քանի որ ՀՀ քրեական դատավարության օրենսգրքի 292-րդ հոդվածը նշում է, որ վարույթն ընդունած դատավորը հետազոտում է գործի նյութերը և որոշում է քրեական գործի վարույթը կարճելու կամ քրեական հետապնդումը դադարեցնելու մասին։

Ներկայացված բացարկի միջնորդությունը քննարկելու համար դատարանը հեռացավ խորհրդակցական սենյակ։ Դատարանի որոշումը կհրապարակվի հաջորդ դատական նիստին՝ դեկտեմբերի 17-ին, ժամը՝ 11։30-ին։

Հեղինակ՝ Իզաբել Սահակյան

Աղբյուր` Փաստինֆո