Փաստ ինֆո

Արագածոտնի մարզի Կարին գյուղի տներից մեկում պայթյունի հետևանքով հիվանդանոց տեղափոխված 12-ամյա երեխայի առողջական վիճակը բավարար է։

«Փաստինֆո»-ի հետ զրույցում Արագածոտնի մարզի Սասունիկ համայնքի ղեկավար Արման Մարգարյանն ասաց, որ քիչ առաջ է խոսել բժիշկների հետ. «Երեխայի վիճակը բավարար է։ Թեթև, երկրորդ կարգի այրվածք ունի։ Հանրապետականի այրվածքաբանականում է այս պահին գտնվում։ Բժիշկների հսկողության տակ է գտնվում, բայց ամեն ինչ նորմալ է»,-ասաց համայնքապետը։

Ավելի վաղ, «Փաստինֆո»-ն հայտնել էր, որ այս գիշեր Կարին գյուղի 5-րդ փողոցի տներից մեկում խոհանոցի գազի փականից տեղի ունեցած արտահոսքի հետևանքով պայթյուն է առաջացել, ինչի հետևանքով 12-ամյա Մհեր Քեցցյանը վնասվածքներով տեղափոխվել է նախ Աշտարակի բժշկական կենտրոն, իսկ հետո Այրվածքաբանության գիտական կենտրոն։

Արման Մարգարյանը հայտնեց, որ տունն ունի վեց բնակիչ՝ երեք երեխաները, ամուսիններն ու տատիկը։ Նրանցից ոչ մեկ պայթյունի հետևանքով չի վնասվել, բացի 12-ամյա Մհեր Քեցցյանի. «Փորձագետը դեռ եզրակացություն չի տվել, բայց հավանաբար գազի արտահոսք է եղել և հենց կաթսայից։ Երեխան էլ, քանի որ խոհանոցում է պառկած եղել, վնասվել է»,-ասաց Արման Մարգարյանը։

Պայթյունը մեծ վնասներ է հասցրել Քեցցյանների ընտանիքին։ Տունն ամբողջությամբ ավիրված է. «Այս պահին հնարավոր չէ այստեղ ապրել։ Գյուղում եղբայր ունի, հավանաբար նրա տանը առայժմ կբնակվեն, մինչև տունը կարգի բերեն»,-ասաց Արման Մարգարյանը՝ հավելելով, որ արդեն դիմել է մարզպետարան և հնարավորության սահմաններում իրենք էլ համայնքային միջոցներով կօգնեն. «Բոլորս էլ պետք է օգնենք, որ կարողանան շուտ վերականգնել ինչ-որ մաս ու բնակվեն։ Դիմացը ձմեռ է, չեն կարող երկար այս վիճակում մնալ»,-նշեց համայնքապետը։

Հեղինակ՝ Հասմիկ Կոշկարյան

Աղբյուր` Փաստինֆո