Փաստ ինֆո

Ես քանի տարի է որ ոչ Միքայել Մինասյանին հանդիպել եմ, ոչ հեռախոսով խոսել։ Հետևում եմ իր ասածներին, ոչ ավելին։ Այս մասին լրագրողների հետ զրույցում ասաց Հանրային խորհրդի նախկին նախագահ Վազգեն Մանուկյանը՝ պատասխանելով հարցին արդյոք Միքայել Մինասյանի կողմից աջակցություն ունի, թե ոչ։

Հարցին՝ ապագայում կձևավորի կուսակցություն, թե ոչ և որտեղից է ֆինանսավորվում՝ Վազգեն Մանուկյանն ասաց. «Սա վերկուսակցական է, բայց ես նաև ԱԺՄ կուսակցության նախագահն եմ և անպայման նորից վերականգնելու եմ ԱԺՄ կուսակցությունը։ Նախատեսում եմ երևի գարնան ամիսներին համագումար կանենք վերակառուցված և դա կնշանակի, որ մտել եմ քաղաքական դաշտ։ Եթե խոսքը գնում է ակումբի ֆինանսավորման մասին, շատ մասնակիցներ կան, որ իրենց սեփական միջոցներով են օգնում։ Ոչ մի գրասենյակ չի օգնում, անհատական է»,-նշեց Վազգեն Մանուկյանը։

Դիտարկմանը, որ իշխանական շրջանակներից քննադատում են իրենց և ասում, որ փոխկապակցված է եղել նախկին իշխանությունների հետ, Վազգեն Մանուկյանն արձագանքեց. «Ի՞նչ է նշանակում։ Այսինքն ապրելը՞ իրենց ժամանակ։ Ես նրանց հետ հանդիպում ունեցել եմ միշտ և հանդիպում ունենալու եմ միշտ։ Մենք միասին անցել ենք պատերազմ։ Ռոբերտ Քոչարյանը, որ կարճ ժամանակով դուրս եկավ, մենք էլի հանդիպեցինք ու խոսեցինք։ Ես հանդիպում եմ բոլորին։ Ես Նիկոլ Փաշինյանին էլ կհանդիպեմ, եթե ինքն է ուզում հանդիպի»,-նշեց Վազգեն Մանուկյանը՝ հորդորելով հանել այն միտքը, որ կա մի չար դաշտ և վախենան այդ դաշտին մոտենալ.

«Բոլոր մարդկանց մեջ կա սպիտակը և սևը։ Բոլոր այդ մարդիկ արել են հերոսություններ և բազմաթիվ սխալներ։ Թույլ մի տվեք, որ այդպես խաբեն»,-հավելեց Վազգեն Մանուկյանը։

Լրագրողի այն դիտարկմանը, թե ինչն էր խանգարում Հայաստանի անվտանգությանը, հասարակությանը վերաբերող օրակարգային հարցերը բարձրացնել Հանրային խորհրդում և նաև իշխանությանը ներկայացնելու այդ հարցերի հետ կապված իր մտահոգությունները՝ ՀԽ նախկին նախագահը նկատեց, որ ՀԽ-ի գործառույթները և այն, ինչ այժմ իրենք անում են, տարբեր են. «Այստեղ մենք ավելի քաղաքականացված ենք հարցերը ներկայացնում։ ՀԽ-ն ունի միսիա, որպեսզի իրենք այդ հարցերը քննարկեն վարչապետի հետ և անեն առաջարկություններ։

Օրինակ Սերժ Սարգսյանի ժամանակ էլ, երբ ՀԽ-ի նախագահ էի, մենք այսպիսի փակ քննարկումներ էինք անում և հանդիպում էինք իր հետ և բավականին մեծ, սուր վեճեր էին լինում։ Ցավոք սրտի Նիկոլ Փաշինյանի հետ չհաջողվեց այդ ձևաչափն իրականացնել»,-ասաց Վազգեն Մանուկյանը՝ ընդգծելով, որ կարևորում է՝ երկրի ղեկավարն ունենա տեսլական և հստակ ձևակերպի, թե ինչպիսի Հայաստան է ուզում կառուցել։ Վազգեն Մանուկյանը նկատեց, որ եթե Նիկոլ Փաշինյանը գար և պատմեր իր տեսլականը, կունենային կոշտ խոսակցություն, բայց չեկավ և չունեցան նման խոսակցություն։

Աղբյուր` Փաստինֆո