Փաստ ինֆո

Նիկոլ Փաշինյանն այսօր խորհրդարանում հայտարարել է, որ տեղյակ չի եղել ծանրամարտիկ Մելինե Դալուզյանի մասին պատմող «Մել» ֆիլմի ֆինանսավորման մասին, բայց շատ գոհ է, որ ֆիլմը ֆինանսավորվում է, որովհետեւ հակառակ դեպքում դա խարան կլիներ Հայաստանի համար։

 «Ֆիլմը մի մարդու մասին է, ով Եվրոպայի եռակի չեմպիոն է եւ որ ռեկորդը մինչեւ հիմա շարունակում է գոյություն ունենալ եւ որի պատվին ՀՀ դրոշը 3 անգամ բարձրացել է, հիմնը 3 անգամ հնչել է։ Մարդը ունեցել է պրոբլեմ, որը նորություն չէ մեր իրականության հետ»,-հայտարարեց Փաշինյանը՝ հայտարարելով, որ այդ պրոբլեմը բժշկական պարամետրեր ունի։

Հիշեցնենք, պետբյուջեից 20 միլիոն դրամ ֆինանսավորում ստացած «Մել» ֆիլմը պատմում է ծանրամարտի Մելինե Դալուզյանի սեռափոխության եւ նրա ընկերուհու սիրո պատմության մասին։

Փաշինյանն ասաց, որ այդ պրոբլեմի ու հանրության արձագանքի պատճառով նա հասել է ինքնասպանության եզրին, ապա հասկացել է, որ այն լուծելու միակ ճանապարհը Հայաստանից թողնել հեռանալն է։ «Դա բժշկական ցուցում ունեցող պրոբլեմ է, որ ժամանակակից աշխարհը հնարավորություն է տալիս, որ այդ պրոբլեմը լուծվի ինչ-որ ձեւով, չնայած, որ մարդիկ ասում են՝ եթե աստված իրեն էդպես է ստեղծել...Բայց մեզ մոտ  էրեխեք են ծնվում սրտի արատով, եկեք չբուժենք, էրեխեք կան, որ կույր են ծնվում՝ տեսողության պրոբլեմով, եկեք թողնենք՝ ոնց կա, նենց էլ մնա...»,-հայտարարեց Փաշինյանը ՝ շեշտելով, թույլ չի տա, որ ՀՀ դրոշը բարձրացրած մարդուն գցեն ոտքերի տակ։

Փաշինյանն առաջարկեց էքսպերիմենտ անել նրանց հետ, ովքեր պնդում են, թե ֆիլմի նկարահանումը կնպաստի սեռափոխության տարածմանը, ասաց՝ ամեն օր մեկ տարի, վեց ամիս ֆիմը նայի ու տեսնենք՝ կգնա՞ այդ վիրահատությանը, թե ՝ ոչ։

«Համարում եմ դա կոռուպցիոն տաշտակից, լափամանից զրկվածների պրոպագանդա», -հայտարարեց վարչապետը ու շեշտեց. «Էդ մարդը իմ պաշտպանության ներքո է, իմ անձնական պաշտպանության ներքո, իսկ էդ կոռուպցիոներներին ոչ մի բան չի փրկելու, թալանածը կոպեկ-կոպեկ բերելու են՝ կթաքնվեն կուսակցությունների անվան տակ, ազգային արժեքների անվան տակ, հանելու ենք, հատ-հատ տանենք պատասխանատվության ենթարկենք եւ ամոթ եմ համարում, որ մարդուն էսքան հեշտությամբ ՀՀ-ում ոտքերի տակ են գցում, մարդը Հայաստանից փախել է, էլի փրկություն չունի՝ ամեն օր քոռ դանակով մորթում են... Ճիշտ է արել, գոհ եմ եւ հպարտ եմ մեր մշակույթի նախարարությամբ, որ այդ որոշումը կայացրել են, կեցցեն իրենք»։

Վարչապետի հայտարարությունը ծափերով է ընդունվեց։

Աղբյուր` Փաստինֆո