Փաստ ինֆո

Ի սկզբանե պաշտոնեական կեղծիք գոյություն չի ունեցել, հետևաբար՝ չէր կարող լինել իշխանության յուրացման օժանդակություն: Այս մասին «Արմնյուզ» հեռուստատեսության «Օրախնդիր» հաղորդման եթերում հայտարարել է ԱԺ աշխատակազմի ղեկավարի նախկին տեղակալ Արսեն Բաբայանը:

«Ըստ մեղադրանքի՝ յուրացրել է ԱԺ նախագահը, օժանդակել եմ ես, իսկ ո՞ւր է այդ իշխանությունը»,- ասաց Բաբայանը:
Նրա խոսքով՝ Քրեական օրենսգրքի 300-րդ հոդվածը գույություն չունի, որովհետև Հրայր Թովմասյանը, նշանակվելով ՍԴ նախագահ, որևէ կերպ չի կարող իրականացնել ՍԴ լիազորություններ:

«Որևէ իրավաբան չի կարող ասել, թե Հրայր Թովմասյանը ՍԴ ո՞ր լիազորությունը կարող է իրականացնել: Հետևաբար՝ ՍԴ լիազորությունները յուրացնելու կամ տիրանալու հոդված կամ արարք այստեղ գոյություն չունի, ինչի՞ մասին է խոսքը»,- ասաց Բաբայանը:

«Փաստինֆո»-ն ավելի վաղ հայտնել էր, որ Արսեն Բաբայանն այսօր ազատ է արձակվել «Վարդաշեն» ՔԿՀ-ից ՀՀ գլխավոր դատախազի խորհրդական Գոռ Աբրահամյանը տեղեկացրել էր, որ ԱԺ աշխատակազմի ղեկավարի նախկին տեղակալ Արսեն Բաբայանի խափանման միջոցը փոխելու որոշում է կայացվել

Հիշեցնենք, որ նա ձերբակալվել է հոկտեմբերի 21-ին պաշտոնեական կեղծիք կատարելու կասկածանքով։ Նույն օրը փաստաբանները դատարան են մուտքագրել բողոքը՝ ձերբակալելու որոշման դեմ, սակայն դատարանը ձգձգեց բողոքի քննարկումը։ Հոկտեմբերի 22-ի երեկոյան՝ Արսեն Բաբայանին մեղադրանք է առաջադրվել ՀՀ քրեական օրենսգրքի 38-300-րդ հոդվածի 1-ին մասով և 314-րդ հոդվածի 1-ին մասով նախատեսված հանցավոր արարքների՝ իշխանության յուրացմանը օժանդակելու և պաշտոնեական կեղծիք կատարելու հատկանիշներով։

Հոկտեմբերի 24-ին Երևանի ընդհանուր իրավասության դատարանը ոչ իրավաչափ համարեց Արսեն Բաբայանին ձերբակալությունը, սակայն բավարարեց նրա նկատմամբ որպես խափանման միջոց կալանավորումն ընտրելու մասին քննիչի միջնորդությունը։ Ընդ որում՝ ձերբակալությունը ոչ իրավաչափ ճանաչելու մասին դատարանի որոշումը դատախազության կողմից չի բողոքարկվել։

Հոկտեմբերի 29-ին իրավապաշտպան, «Հայաստանի Հելսինկյան կոմիտե» ՀԿ նախագահ Ավետիք Իշխանյանը և Արցախի Հանրապետության Մարդու իրավունքների պաշտպան Արտակ Բեգլարյանը (անձնական կարգավիճակով) գրավոր դիմել են քրեական հետապնդման մարմիններին՝ պատրաստակամություն հայտնելով իրենց խոսքով և վճարվող գումարով երաշխավորելու Արսեն Բաբայանի պատշաճ վարքագիծը քրեական գործի քննության ընթացքում։ Այսօր սակայն դատախազությունը հայտարարեց, թե երաշխավորություն է ներկայացրել իշխող ուժի պատգամավոր, սորոսական թեւի ներկայացուցիչ Սիսակ Գաբրիելյանը։ Արցախի ՄԻՊ-ի երաշխավորության քննարկման արդյունքների մասին տեղեկություն չկա։

Աղբյուր` Փաստինֆո