Փաստ ինֆո

ՀՀԿ երիտասարդներն այսօր բողոքի ակցիա են իրականացրել ԱԳՆ շենքի առջեւ: Նրանք դատարկ ճամպրուկ էին  բերել արտգործնախարար Զոհրաբ Մնացականյանի համար՝ կոչ  անելով հաշվետու լինել հասարակությանը եւ նշել, թե որ փուլում է գտնվում Արցախը բանակցային սեղանին վերադարձնելու վարչապետի խոստման իրականացումը:

«Հայտարարեք, թե ինչ սկզբունքների շուրջ է ՀՀ կառավարությունը եւ հատկապես Դուք բանակցում, հայտարարեք, թե ինչ է նշանակում Ձեր կողմից այդքան սիրված կարգավիճակ եզրույթը, որ կարգավիճակի մասին է խոսքը», - «Փաստինֆո»-ի հաղորդմամբ՝ հայտարարել է ՀՀԿ երիտասարդական կազմակերպության ղեկավար Հայկ Մամիջանյանը՝ կոչ անելով գործադրել ջանքեր, որ ԱԳ նախարարի այսօրվա հյուրը՝ Սերգեյ Լավրովը, խոսելով բանակցային գործընթացի մասին, իր խոսքը «չնկարազարդի» Փաշինյանի հայտարարություններով:

«Տեղեկացրեք՝ Մինսկի խմբի ո՞ր համանախագահն է համաձայնել, որ «արցախյան հակամարտության լուծումը պետք է ընդունելի լինի երեք ժողովուրդների համար» բանաձևին։ Պատասխան տվեք հայ ժողովրդին, թե ինչու է իշխանափոխությունից հետո Մինսկի խմբի համանախագահների հայտարարություններից անհետացել Արցախի հիմնախնդրի համար կարևորագույն ազգերի ինքնորոշման իրավունքը։ Եվ վերջապես բացատրեք, թե ինչպես տեղի ունեցավ, որ բանակցային գործընթացից դուրս եկան Վիեննայի և Սանկտ Պետերբուրգի պայմանավորվածությունները։ Պատկերավոր ասած, պարո՛ն նախարար, Դուք ձախողակ եք», - նշել է Մամիջանյանը։

Ըստ նրա, դատարկ ճամպրուկի միջոցով ուզում են ցույց տալ, որ սա այն կառավարությունն է, որին ճամպրուկներ են բերում, և դրանք դատարկ են, ինչպես իրենց խոստումները։ «Դատարկ են, ինչպես ՀՀ արտաքին քաղաքականության օրակարգը։ Ճամպրուկներից մեկը սիրով կթողնենք Զոհրաբ Մնացականյանին, քանի որ շատ քիչ ժամանակ է մնացել, որ Զոհրաբ Մնացականյանը դառնա Գնացականյան», - հայտարարել է Հայկ Մամիջանյանը։

Աղբյուր` Փաստինֆո