Փաստ ինֆո

Հեղափոխություններին կողմ չեմ, բայց ստեղծվել էր նոր իրավիճակ, որը հույս էր տալիս՝ պետության զարգացման մեջ նոր փուլ է սկսվում։ Սակայն ինչ-որ տեղից հետո սկսեցի հիասթափվել, որովհետև այն, ինչ արվում է՝ մեզ չի տանելու զարգացման ուղղությամբ։ Այս մասին Հանրային խորհրդի նիստի ժամանակ ասաց հանրային խորհրդի նախագահ Վազգեն Մանուկյանը։

«Ինձ համար ընդունելի չէին վեթթինգի մասին քննարկումները, անցումային արդարադատության, Մարտի 1-ի դատավարությունը քաղաքականացնելը, դատավորների վրա հարձակումները։ Անհանգստացած հունիսին որոշեցի հանդիպել Նիկոլ Փաշինյանի հետ և հայտնել իմ կասկածներն ու խորհուրդները։ Երկու անգամ զանգեցի իրեն, բայց հետ չզանգեց։ Դա աննախադեպ էր, որովհետև այդպիսի բան մինչև այդ ո՛չ իր, ո՛չ Սերժ Սարգսյանի, ո՛չ Ռոբերտ Քոչարյանի, ո՛չ էլ Լևոն Տեր-Պետրոսյանի հետ չէր եղել»,-ասաց Վազգեն Մանուկյանը։

Նա հավելեց, որ դրանից հետո նաև նամակ է գրել վարչապետին՝ խնդրելով հուլիսին հանրային խորհրդի հետ միասին քննարկի կառավարությանը տեսլականը, սակայն Վազգեն Մանուկյանի խոսքով կրկին պատասխան չեղավ. «Շարունակեցի իմ խորհուրդները տարբեր հոդվածների միջոցով տալ։ Սուր էին, սուր չէին, բայց բոլորն իրենց մեջ մասնագիտական խորհրդատվություն էին պարունակում և՛ ՍԴ-ի, և՛ Արցախի հարցի մասին»,-նշեց Վազգեն Մանուկյանը։

Վերջինս կարծում է, որ այժմ շատերի մոտ առկա է որոշակի վախի մթնոլորտ, քանի որ պարզ չէ՝ ում կարող են ձերբակալել, իսկ ում՝ ոչ. «Եթե սկզբում դրված էր կոռուպցիայի դեմ պայքար, հիմա սլաքները լրիվ ուրիշ տեղ են գնում։ Հիմա տեսնում եմ, որ ապրում եմ մի երկրում, որն ավելի մոտիկ է 1937 թվականին, քան ազատության հռչակմանը, և այս վտանգը բոլորի շեմին է կանգնելու»,-ասաց Վազգեն Մանուկյանը՝ ընդգծելով, որ հասարակությունը պետք է դիմադրի և իշխանություններին բացատրի Հայաստանի համար այդ քայլերի վտանգավորությունը։

Հեղինակ՝ Հասմիկ Կոշկարյան

Աղբյուր` Փաստինֆո