Փաստ ինֆո

Այսօր ՀՀ-ում սակավագիտության և բացամտության պայքար է տեղի ունենում։ Այս մասին կառավարության այսօրվա նիստի ժամանակ հայտարարեց ՀՀ վարչապետ Նիկոլ Փաշինյանը։

«Մարդկանց անընդհատ ինչ-որ անհեթեթ վախեր են ներշնչում, օգտվում մարդկանց տեղեկացվածության պակասից, ինչ-որ կեղծ կարգախոսներ են շրջանառության մեջ դնում։ Եթե որևէ մեկին թվում է՝ մեզ դրանով պիտի վախեցնեն, իրենք սխալվում են, որովհետև նախ իրենք հանրությանը որևէ բան ներշնչելու շանս չունեն, որովհետև իրենք հանրության կողմից մերժված են և լուսանցք են մղված ու այնտեղից երբեք դուրս չեն գալու։ Շատ կարևոր է, որ այս պրոցեսի ընթացքում մենք բոլորս ՝ նախարարությունները, պաշտոնյաները, հանրության հետ լինենք մշտական երկխոսության մեջ»,-ասաց վարչապետը՝ ընդգծելով, որ պետք է ընդունեն՝ շատ դեպքերում նաև իրենց մեղքով հանրությունը գուցե ամենայն մանրամասնությամբ չընկալի, թե ինչ են անում և ինչի համար. «Մենք պետք է ապահովենք, որ թյուրըմբռնումներ, թերտեղեկացվածություններ մեր գործունեության վերաբերյալ չլինի։ Մարդիկ պետք է տեսնեն մեր մոտիվացիաները, թափանցիկ, ինչ ենք անում, ինչի համար ենք անում, ինչու է դա անհրաժեշտ և սա միակ խնդիրն է, որը պետք է լուծենք»,-հավելեց վարչապետը։

Նիկոլ Փաշինյանը նկատեց՝ հասարակության մեջ շարունակում է մնալ մի պատկերացում, որ պետք է իշխանությունից կամ իշխանությանը կցված մարդիկ լինեն, որոնք անցնեն և փողեր բաժանեն, բրինձ, ձեթ բաժանեն. «Էդ ձեթը բաժանվում էր ոչ թե մարդկանց աղքատությունը հաղթահարելու համար, այլ աղքատության մեջ պահելու համար, որպեսզի հաջորդ ընտրություններում այդ մարդկանց նույն ձեթով ու բրնձով տանեն ընտրական տեղամասեր և քվեարկել տան։ Էս պատմությունը ՀՀ-ում ավարտված է։ Հիմա երբ ասում են բա մարդն ինչ անի, ասում ենք ինչ անի՝ փողը տալիս ենք, կովը տալիս ենք, խորհրդատվությունը տալիս ենք, աշխատելու համար պայմանները ստեղծում ենք»,-նշեց վարչապետը։

Հեղինակ՝ Հասմիկ Կոշկարյան

Աղբյուր` Փաստինֆո