Փաստ ինֆո

«Հայկական սահմանների վրա կրակելու և զենքի մատակարարման հարցին Հայաստանը չի անդրադառնում, քանի որ այս պահին դրա կարիքը չունի, եթե պետք լինի Հայաստանը և՛ կխոսի, և՛ հարցեր կբարձրացնի, և՛ հարցերի լուծմանը կհասնի»,-այս մասին այսօր լրագրողների հետ ճեպազրույցում ասաց ԱԺ «Իմ քայլը» խմբակցության պատգամավոր, Պաշտպանության եւ անվտանգության հարցերի մշտական հանձնաժողովի նախագահ Անդրանիկ Քոչարյանը՝ ավելացնելով. «Չմոռանանք, որ տարիներ առաջ, երբ մեր սահմանին լարվածություն կար, Բորդյուժան հայտարարությամբ հանդես եկավ և ՀԱՊԿ-ը պատրաստ էր որոշակի ձևով արձագանքել, եթե դա վերաբերում է Հայաստանի սահմանների պաշտպանությունը»։

Նա նշեց, որ Հայաստանն առաջին հերթին պետք է վստահ լինի իր վրա և այսօրվա զինված ուժերի վիճակը թելադրում է, որ կարող է առաջնահերթ հենվել իր զինված ուժերի կարողությունների վրա։

Հարցին, այսինքն՝ կարծում եք լարվածությունն այն աստիճանի չէ, որ դրան միջամտի ՀԱՊԿ-ը, Քոչարյանը պատասխանեց. «Իսկ դուք չե՞ք տեսնում, որ լարվածությունն, այնուամենայնիվ, այդ աստիճանի չէ։ Այս տարի մեր սահմաններում կրակոցներն ավելի քիչ են, քան տարիներին, դրա բացատրությունը տարբեր ձևաչափերով, տարբեր հարթակներում կարելի է գտնել, բայց փաստը մնում է փաստ»։

Նա հայտնեց, որ համաժողովում չի բարձրացվել ՀԱՊԿ անդամների կողմից Ադրբեջանին զենք վաճառելու հարցը. «Ասեմ, որ կոորդինացիոն խորհրդի նիստին, որին ես էի մասնակցում կրկին նման հարց չի բարձրացվել, որովհետև այդ հարցը այս հարցում չէ որ պետք է բարձրացվի ու քննարկվի։ Բայց եթե դրա անհրաժեշտությունը լինի, անպայման, կբարձրացվի»։

Իսկ թե որն է նրա անձնական տեսակետն այն հարցի հարցին, որ մեր զինվորները մահանում են մեր դաշնակցի վաճառած զենքից՝ Անդրանիկ Քոչարյանը պատասխանեց, որ դա վատ բան է, սակայն պետք չէ մոռանալ, որ նմանատիպ սպառազինությամբ նաև հայկական զինված ուժերն են հագեցած և խնդիրը խաղաղության հասնելն է։

«Զենքի հավասարակշռության խնդիրը մշտական օրակարգային խնդիր է և հակառակորդը պետք է չունենա որոշակի առավելություններ զինատեսակի առումով, հիմա դա ինչպես պետք է լուծվի, շատ է քննարկվում, որ նրանց բյուջեում հատկացումներն ավելի շատ են, մերն ավելի քիչ են, բայց դուք մոռանում եք, որ Ադրբեջանի բյուջեի հատկացումներն իրենք զինված ուժերի կառուցվածքն այլ է, քան մերը։ Նրանք պահում են կովկասյան նավատորմ, որը բացարձակ չի մտնում հայ-ադրբեջանական ռազմական հակամարտության մեջ..»,-ասաց հանձնաժողովի նախագահը։

Հեղինակ՝ Սոնա Գեւորգյան

Աղբյուր` Փաստինֆո