Փաստ ինֆո

Հայոց ցեղասպանության հարցը միշտ էլ եղել է ԱՄՆ-ի արտաքին գերատեսչությունների օրակարգում, իսկ այս քվեարկությունն ուղղակի կապ ունի Թուրքիայի՝ ԱՄՆ-ի համար ոչ այդքան ցանկալի պահվածքի հետ։ «Փաստինֆո»-ի հետ զրույցում այս մասին ասաց ԱԺ «Բարգավաճ Հայաստան» խմբակցության քարտուղար, Արտաքին հարաբերությունների մշտական հանձնաժողովի անդամ Արման Աբովյանը։

Հիշեցնենք, որ երեկ՝ հոկտեմբերի 29-ին, ԱՄՆ կոնգրեսի ներկայացուցիչների պալատում կայացած քվեարկության արդյունքում ձայների մեծամասնությամբ՝ 405 կողմ ձայնով ընդունվեց Հայոց ցեղասպանությունը ճանաչող բանաձևը։

Պատգամավորը կարծում է՝ հարցն այստեղ միայն Սիրիայում Թուրքիայի ծավալած ռազմական գործողությունները չեն. «Պետք է դիտարկել Թրամփի ադմինիստրացիայի տրամադրությունները։ Թրամփն առաջին նախագահն է, ով շատ ուղղակի է բոլոր հարցերում և հաշվի առնելով այս ամենը, իրականում սպասելի էր, որ հենց Թրամփի օրոք Միացյալ նահանգների կողմից կընդունվի Հայոց ցեղասպանությունը»,-ասաց Արման Աբովյանը։

Նա ընդգծեց, որ բացի բարոյական ասպեկտից, սա ԱՄՆ-ում բնակվող մեր հայրենակիցներին տալիս է նաև գործիքակազմ. «Նրանք ավելի են ամրապնդում իրենց դիրքերը, երբ իրավական ինչ-որ հարցեր են լուծում Թուրքիայի հետ, որոնք կապված են ցեղասպանության հետ»,-նշեց Աբովյանը։
Նրա կարծիքով ամենակարևորն այն է, որ բոլոր գերպետությունները համակարծիք են՝ այն, ինչ կատարվել է հայ ազգի հետ 1900-ականներին Թուրքիայի կողմից դա ցեղասպանություն է։

ԱԺ պատգամավորը չի կարծում՝ այս քայլի դիմաց ԱՄՆ-ն Հայաստանից մեծ սպասելիքներ ունի։ Նրա պնդմամբ խնդիրն այստեղ ոչ թե Հայաստան-ԱՄՆ հարաբերություններն են, այլ ԱՄՆ-Թուրքիա հարաբերությունները. «Մենք ԱՄՆ-ից կարևոր դիվանագիտական մեսիջ ստացանք։ Թե ինչ զարգացումներ կստանա այս ամբողջ գործընթացը, կախված է նաև մեզանից»։

Հարցին՝ արդյոք ԱՄՆ-ն այսկերպ Հայաստանից չի՞ ակնկալի ավելի սերտացնել հայ-ամերիկյան հարաբերությունները, քան հայ-ռուսականը, Արման Աբովյանն ասաց. «Չեմ կարծում, որ այդ կոնտեքստում է պետք նայել այս պարագայում։ Այստեղ խնդիրն ավելի շատ թուրք-ամերիկյան հարաբերությունների կոնտեքստում է պետք դիտարկել։ Իհարկե, դիվանագիտության մեջ հաշվի է առնվում ամեն ինչ։ ԱՄՆ-ի քաղաքականությունը Հայաստանի նկատմամբ բազմաշերտ է և այն ամբողջությամբ է պետք դիտարկել»,-ասաց Արման Աբովյանը՝ հավելելով, որ այժմ կարևոր է Միացյալ նահանգների պետդեպարտամենտի ռեակցիան.

«Հետաքրքիր զարգացումներ են, տեսնենք՝ ինչ է լինելու»,-հավելեց ԱԺ պատգամավորը։

Բանաձեւում նշվում է.

1) ոգեկոչել Հայոց ցեղասպանությունը` այն պաշտոնապես ճանաչելու և հիշատակելու միջոցով,

2) մերժել Միացյալ Նահանգների կառավարությանը՝ Հայոց ցեղասպանության կամ որևէ այլ ցեղասպանության ժխտման մեջ ներգրավելու, ներառելու կամ որևէ այլ կերպ առնչելու փորձերը, և

3) խրախուսել Հայոց ցեղասպանության փաստերի՝ ներառյալ մարդասիրական օգնության գործում Միացյալ Նահանգների դերի և մարդկության դեմ ներկայումս իրականացվող հանցագործությունների ու Հայոց ցեղասպանության միջև առնչությունների վերաբերյալ կրթությունը և հանրային իրազեկվածությունը»:

Հեղինակ` Հասմիկ Կոշկարյան