Փաստ ինֆո

Երևանի ընդհանուր իրավասության դատարանի Կենտրոնի նստավայրում դատավոր Մնացական Մարտիրոսյանի նախագահությամբ ընթացող դատական նիստի ժամանակ Մանվել Գրիգորյանի պաշտպանները միջնորդեցին դատարան հրավիրել և հարցաքննել Մանվել Գրիգորյանի նկատմամբ միջգերատեսչական փորձաքննություն իրականացրած հանձնաժողովի բոլոր փորձագետներին։

Հիշեցնենք, որ ավելի վաղ հրապարակվեց հանձնաժողովի եզրակացությունը, ըստ որի Գրիգորյանի ներկայիս առողջական վիճակը չի հանդիսանում խոչընդոտ դատական նիստերին մասնակցելու համար. «հանձնաժողովը եզրակացրել է, որ նշված հիվանդանությունները և դրանց բարդությունների արտահայտված աստիճանները չեն համապատասխանում ՀՀ կառավարության համապատասխան որոշման մեջ ներառված` պատիժը կրելուն խոճընդոտող հիվանդանությունների ցանկում ներառված որևէ կետի»,- ասել էր դատավորը։

Մանվել Գրիգորյանի պաշտպանները, սակայն, նշեցին, որ եզրակացությունն ավելի շատ հարցեր է առաջացրել, քան տվել է հարցերի պատասխաններ։ Մասնավորապես, Լևոն Բաղդասարյանը նշեց, որ հանձնաժողովին հարցաքննելու միջնորդությունը պայմանավորված է նրանով, որ հանձնաժողովի եզրակացությունը բավարար չափով պարզ չէր և ուներ բացեր. «Անհրաժեշտություն է առաջացել ճշտելու փորձագետների կողմից կիրառված մեթոդները և հասկացությունները։ Թեպետ փորձագետները նշում են, որ կալաանվորման պահից մինչ օրս Գրիգորյանի մոտ առկա է բացասական դինամիկա, և պայմանավորված շաքարային դիաբետի տևական դեկոմպենսացիայի փուլով` դա կարող է նաև պարունակել կյանքին վտանգ սպառնացող ռիսկեր, սակայն չեն նշել, թե Գրիգորյանի մոտ առկա մյուս հիվանդանությունները ևս կարող են կյանքին վտանգ սպառնալ թե ոչ, որի վերաբերյալ հանձնաժողովին արվել էր հարցում։

Նշվել է, որ ներկայիս առողջական վիճակը չի հանդիսանում խոչընդոտ դատական նիստերին մասնակցելու համար, որ նրա տեղափոխումը կարելի է ապահով կողմնակի անձանց և օժանդակող սարքավորումների միջոցով կամ բժշկի հսկողությամբ։ Անհասկանալի է, թե ում նկատի ունեն` ասելով կողմնակի անձ, և դա հակասում է բժշկական հաստատության այն կարծիքին, որով արգելում են Գրիգորյանի մասնակցությունը դատական նիստերին` առողջական վիճակով պայմանավորված։ Նշվել է նաև, որ հիվանդը կարիք ունի մաքուր օդի, ֆիզիկական ակտիվության, սակայն դարձյալ պարզ չէ, թե ինչ նկատի ունեն` ֆիզիկական ակտիվություն ասելով, և բացի այդ, դարձյալ չեն պատասխանել մեր այն հարցին, թե հիվանդություններով պայմանավորված` հիվանդը արդյոք կարիք ունի ավելի շատ գտնվելու մաքուր օդին, բնության մեջ, կատարելու ֆիզիկական ակտիվ գործողություններ, որոնք կարող են նպատասնել շնչառության, մարսողության, ոտքեր շարժողության և  բացասական դինամիկա գրանցած այլ հիվանդանությունների բուժմանը։ Փորձագետները նաև չեն պատասխանել` արդյոք բացասական դինամիկա գրանցած ծանր հիվանդությունները կարող են հիվանդին պատճառել հոգեկան տառապանք` պայմանավորված կալանքը կրելու հանգամանքով», -նշեց Լևոն Բաղդասարյանը։

Միաժամանակ մեղադրող կողմը միջնորդեց հետաձգել միջնորդության քննարկումը և իրենց տրամադրել հանձնաժողովի հիշյալ եզրակացությունը, որպեսզի իրենք ժամանակ ունենան ծանոթանալ ինչպես այդ եզրակացությանը, այնպես էլ կարծիք հայտնել թե դրա, թե միջնորդության վերաբերյալ։

Նախագահող դատավորը միջնորդության լուծումը հետաձգեց մինչ հաջորդ դատական նիստը։

Պաշտպանական կողմը նաև միջնորդեց փոխել Մանվել Գրիգորյանի խափանման միջոց կալանավորումը և նրան ազատ արձակել մինչև հինգ միլիոն գրավի դիմաց։ Մեղադրող կողմը, սակայն, ընդգծեց, որ միջնորդության մեջ ուղղակի հղում է արված հիշյալ եզրակացությանը, ուստի այս պահին դիրքորոշում հայտնելու համար դարձյալ պետք է ծանոթանալ այդ եզրակացությանը։

Այսպիսով, նախագահող դատավորը նշեց, որ խափանման միջոցը փոխելու վերաբերյալ միջնորդության լուծման համար անհրաժեշտ հանգամանքները պարզելու, այսինքն` մեղադրանքի կողմի կարծիքը լսելու նպատակով անհրաժեշտ է հետաձգել նաև այս միջնորդության լուծումը։

Հաջորդ դատական նիստը նշանակվեց նոյեմբերի 5-ին` ժամը 12-ին։

Հեղինակ` Միլենա Խաչիկյան