Փաստ ինֆո

ՀՀ ՊՆ Վազգեն Սարգսյանի անվան ռազմական ինստիտուտի կուրսանտ Հայկազ Բարսեղյանի սպանության գործով նշանակվել են դատագենետիկական փորձաքննություններ:

Երևան քաղաքի առաջին ատյանի ընդհանուր իրավասության դատարանում՝ նախագահությամբ դատավոր Դավիթ Հարությունյանի, այսօր կայացած հերթական դատական նիստին նման միջնորդությամբ հանդես է եկել ամբաստանյալ Գնել Թևոսյանի պաշտպան Արա Զաքարյանը: Պաշտպանի կողմից ներկայացված երկու միջնորդությունները՝ դատագենետիկական փորձաքննություն նշանակելու վերաբերյալ, առնչվում են զինվորական բաճկոնի քուղերին և ածելիին, որը հայտնաբերվել է կուրսանտի ննջարանում: Դատարանը բավարարել է ներկայացված միջնորդությունները: Ինչ վերաբերում է քննչական փորձաքննություն կատարելու արձանագրությունն անթույլատրելի ճանաչելու մասին ամբաստանյալ Մովսես Ազարյանի պաշտպան Անժելա Հոբոսյանի միջնորդությանը, ապա դրան դատարանը կանդրադառնա դատական ակտով: Նշենք, որ դատարան է ստացվել նաև մեկ այլ դատագենետիկական փորձաքննության արդյունքները, որով փաստվել է, որ Հայկազ Բարսեղյանի անկողնու մոտ հայտնաբերված արյան նմուշները, ինչպես նաև թանզիվե խծուծի վրայից վերցված արյան նմուշները համընկնում են կուրսանտ Բարսեղյանի ԴՆԹ նմուշի հետ: Ուստիև այլ անձանց ԴՆԹ-ի հետ համընկումների վերաբերյալ փորձաքննության անհրաժեշտություն չի առաջացել:

Հիշեցնենք, որ կուրսանտի դին հայտնաբերվել է 2015թ. հունվարի 29-ին՝ ՊՆ Վազգեն Սարգսյանի անվան ռազմական ինստիտուտի մարզահրապարակում պտտաձողի վրա պարանով կախված վիճակում: Ըստ գործի նյութերի՝ մի քանի զինծառայողներ բռնել են անկողնում պառկած կուրսանտի ոտքերը և ձեռքերը, փակել բերանը՝ զրկելով օգնություն կանչելու հնարավորությունից, ապա սուր կտրող-ծակող գործիքով կտրել նրա աջ նախաբազկի արմնկափոսի երակը, որին հաջորդել են հարվածներ կուրսանտի կրծքավանդակին և դեմքին, այնուհետև սեղմելով պարանոցը՝ կոտրել են կուրսանտի ենթալեզվային ոսկորը։

Ապա հագցրել են կուրսանտի հագուստները և տեղափոխել զորամասի մարզահրապարակ, որտեղ և պտտաձողից կախել են այս դաժան գործողությունների արդյունքում շնչահեղձությունից մահացած Հայկազ Բարսեղյանին: Գնել Թևոսյանին մեղադրանք է առաջադրվել ՀՀ քրեական օրենսգրքի 104-րդ հոդվածի 2-րդ մասի 5-րդ, 7-րդ և 10-րդ կետերով և 358.1-րդ հոդվածի 2-րդ մասով, Նորիկ Սահակյանին՝ 104-րդ հոդվածի 2-րդ մասի 5-րդ, 7-րդ և 10-րդ կետերով և 359-րդ հոդվածի 1-ին մասով, Վաչե Սահակյանին՝104-րդ հոդվածի 2-րդ մասի 5-րդ, 7-րդ և 10-րդ կետերով, 359-րդ հոդվածի 2-րդ մասի 2-րդ կետով և 359-րդ հոդվածի 1-ին մասով, իսկ Մովսես Ազարյանին՝104-րդ հոդվածի 2-րդ մասի 5-րդ, 7-րդ և 10-րդ կետերով, 2 դրվագով՝ 359-րդ հոդվածի 2-րդ մասի 2-րդ կետով և 2 դրվագով՝ 359-րդ հոդվածի 1-ին մասով:

Բացի այս 4 մեղադրյալներից մեղադրանք է առաջադրվել նաև նույն զորամասի կուրսանտ Վարազդատ Սաֆարյանին, ով հանդիսանալով զորամասի 1 գումարտակի 2-րդ վաշտի 1-ին մարտկոցի կուրսանտ, 2014թ. նոյեմբերի 16-ին ժամը 21.00-ի սահմաններում նույն մարտկոցի կուրսանտ Տ.Մանասերյանին շարքում խոսելու համար դիտողություն անելուց և վերջինիս կողմից հակադարձում ստանալուց հետո Վաչե Սահակյանի, Մովսես Ազարյանի հետ միասին, մի խումբ անձանցով խախտելով ՀՀ ԶՈՒ ներքին ծառայության կանոնագրքի 13, 16, 65 հոդված. ծեծի են ենթարկել Մանասերյանին, բացի այդ 2015թ. հունվարին լսարանում խոսելու համար ծեծի է ենթարկել համածառայող Արտուշ Սիմոնյանին: Վարազդատ Սաֆարյանին մեղադրանք է առաջադրվել ՀՀ քրեական օրենսգրքի 359-րդ հոդվածի 2 մասի 2 կետով և 359-րդ հոդվածի 1-ին մասով:

Էլեն Առաքելյան

Աղբյուր` Փաստինֆո