Փաստ ինֆո

ՈՒժային ղեկավարների հրաժարականներին հաջորդած վերջին երկու՝ ՀՀ կադաստրի կոմիտեի ղեկավար Սարհատ Պետրոսյանի և երեկ նաև՝ Կենտրոն վարչական շրջանի ղեկավար Վիկտոր ՄՆացականյանի հրաժարականները հետաքրքիր են և խորհելու առիթ են տալիս:

Ընդ որում, ուշագրավ է, որ նրանք երկուսն էլ մի տեսակ դեմոնստրատիվ հայտարարություններով են հրաժարականներ ներկայացրել, այսինքն, շատ ակնհայտ է, որ առանց իրենց ասածն ասելու, մի տեսակ՝ բանալի բառերի ու մտքերի՝ չէին ցանկացել հեռանալ:

Մասնագիտությամբ իրավաբան Վիկտոր Մնացականյանը, որը Կենտրոն համայնքի ղեկավար էր դարձել լինելով ՔՊ ավագանու ցուցակում, այսպիսով մի տեսակ ՔՊ-ից տարանջատվելու, զատվելու քայլ է անում: Եվ դա անում է՝ նախանշելով իր համար նախընտրելի բնագավառները: «Այս որոշումը կայացրել եմ, քանի որ ցանկանում եմ զբաղվել քաղաքային հիմնախնդիրների խորքային ուսումնասիրությամբ և ուրբանիստիկան մեր ամենօրյա կյանքի անբաժան մասը դարձնելու նպատակով։ Համոզված եմ, որ այդ կերպ կկարողանամ շատ ավելի օգտակար լինել իմ սիրելի քաղաքին և երկրին»:
Նա միաժամանակ հայտարարում է, որ իր քայլը ամենևին չի նշանակում, որ հեռանում է այն թիմից, որի մասն է եղել ու իր խոսքով՝ որի հետ աշխատելու պատիվ է ունեցել ու շնորհակալություն հայտնել Փաշինյանին, Երևանի գլխավոր ճարտարապետ Արթուր Մեսչյանին, նաև՝ Երևանի քաղաքապետ Հայկ Մարությանին:

Թե իրականում Մնացականյանն ինչ տարաձայնություններ է ունեցել քաղաքային խնդիրների լուծման հարցում՝ վերջինս նախընտրել է լռել, իսկ իշխանական շրջանակների կողմից էլ շրջանառության մեջ է դրվել,թե, իբր, նա հավակնություններ ունի կադաստրի կոմիտեի ղեկավար նշանակվել։
Հիմա, հարց է ծագում՝Կենտրոնի արդեն նախկին թաղապետ Վիկտոր Մնացականյանն ի՞նչ սպասելիքներ ունի առաջիկայում:
Մասնավորաբար, հետաքրքիր է, որտե՞ղ նա կիրացնի՝ ուրբանիստիկան մեր առօրյա կյանքի անբաժան մասը դարձնելու իր նպատակը: Կադաստրի կոմիտեու՞մ, թե՞ քաղաքականության մեջ։

Իմիջիայլոց, Վ. Մնացականյանի՝ հրաժարականից առաջ, նույն օրը մամուլը մի առիթով էլ սևեռվեց ուրբանոլորտի և այն ներկայացնող պաշտոնյայի վրա. խոսքը վերաբերում է կառավարության նիստում արված՝ ՀՀ քաղաքաշինության կոմիտեի նախագահ Վահագն Վերմիշյանին, ավելի ճիշտ՝ վարչապետ Փաշինյանի բնորոշմամբ՝ նրա ոչ կոռեկտ մի արտահայտությանը, որին շատ արագ ՖԲ որոշ օգտատերերի շրջանում ,,ռասսայական,, մոտիվ տրվեց:

Փաշինյանի դեմքի արտահայտությունը լավ բան չի խոստանում պարոն Վերմիշյանին, մանավանդ, վերջինս տվյալ պաշտոնում քպական շրջանակից դուրս հայտնված անձ է, որի նշանակման մեջ ասում են, վարչապետի կինն է եղել դերակատար…

Հեղինակ` Մանե Զաքարյան