Փաստ ինֆո

«Ձերբակալման միակ օրինական հիմքը անձի թաքնվելու վտանգն է եւ միայն այն հանգամանքը, որ Արսեն Բաբայանը առաջին իսկ կանչով պատշաճ ներկայացել է վարույթն իրականացնող մարմին, արդեն իսկ վկայում է, որ բոլոր ենթադրությունները ՝ նրա թաքնվելու վերաբերյալ սին են»,- Երեւանի ընդհանուր իրավասության դատարանի՝ Կենտրոն եւ Նորք Մարաշ նստավայրի մոտ լրագրողների հետ ճեպազրույցում քիչ առաջ հայտարարեց ԱԺ աշխատակազմի ղեկավարի նախկին տեղակալ Արսեն Բաբայանի պաշտպան Երվանդ Վարոսյանը։

Հիշեցնենք, այսօր սպասվում է Արսեն Բաբայանի ձերբակալման որոշման դեմ փաստաբանների բողոքի եւ նրան կալանավորելու միջնորդության  քննարկումը ։

Վարոսյանը շեշտեց, որ ձերբակալության ժամանակ Բաբայանի կասկածանքը վերաբերվել է պաշտոնական կեղծիք կատարելուն, ինչը համաներման տակ ընկնող մեղադրանք է եւ այս 2 հանգամանքը, ըստ փաստաբանի, բավարար է՝ պնդելու համար, որ նրա ձերբակալումը անօրինական է։

Ըստ Վարոսյանի , ակնհայտ ապօրինի որոշում կլինի, եթե դատարանը բավարարի կալանքի միջնորդությունը։
Երվանդ Վարոսյանը նաեւ ասաց, որ վարույթն իրականացնող մարմին ինքն էլ պարզել է, որ մեղադրանքում նշված փաստական հանգամանքները իրականությանը չեն համապատասխանում, մասնավորապես , ՍԴ նախկին նախագահ Գագիկ Հարությունյանի հրաժարականի դիմումի ՝ ԱԺ փաստացի մուտք գործելու եւ այն փաստաթղթավորելու օրերի տարբերություն, Վարոսյանի խոսքով, գոյություն չունի։

Բաբայանի պաշտպանները դատարանում պահանջելու են, որ վարույթ իրականացնող մարմինը ներկայացնի նաեւ այլ անձանց ցուցմունքներ՝ այդ թվում ՍԴ աշխատակազմի նախկին ղեկավարի ցուցմունքը։

Հիշեցնենք, որ ՍԴ աշխատակազմի նախկին ղեկավարը հարցազրույցում պնդել է, որ գրությունն ԱԺ ուղարկել է մարտի 2-ին, ինչի մասին հայտնել է նաեւ ցուցմունքում։ Պարզվում է՝ այդ ցուցմունքը չի ներկայացվել դատարանին։

«Մենք համոզված ենք, որ ՍԴ աշխատակազմի նախկին ղեկավարը նաև հարցաքննվել է քրեական գործով, այդ մասին կար նշում նաև իր հարցազրույցում, սակայն, ի զարմանս մեզ, այդ հարցաքննության արձանագրությունը մեզ չի տրամադրվել, դատարան էլ չի ներկայացվել»,- ասել է Վարոսյանը։

Հարցին, հաշվի առնելով այն հանգամանքը, որ այս գործը հարուցվել է իշխանության յուրացման հոդվածով արդեն իսկ հարուցված գործի շրջանակում, արդյո՞ք ՀՔԾ-ն կարող է մեղադրանք առաջադրել ՍԴ նախագահին՝ առանց ՍԴ որոշման, Վարոսյանը պատասխանեց, որ դրա համար օրինական հիմքեր չկան, բայց այսօր ամեն ինչ հնարավոր է։ Նրա խոսքով, այն հանգամանքը, որ Գագիկ Հարությունյանը ինքը նշում է, որ լինելով ԲԴԽ անդամ որոշել է չհամատեղել 2 պաշտոնները, արդեն իսկ բացառում է այս ամբողջ շղթան։

Անդրադառնալով իշխանության յուրացման մեղադրանքին, Վարոսյանը շեշտեց, որ ՍԴ լիազորություներին տիրանալու մասին խոսք չպետք է լինի. «Չի կարող Հրայր Թովմասյանը կամ որեւէ այլ անձ, ՍԴ այլ դատավոր տիրանալ ՍԴ լիազորություններին, ՍԴ-ն կոլեգիալ մարմին է։ Այս ռակուրսով ՍԴ լիազորություններին տիրանալու 2 տարբերակ կա՝ կամ փակում ենք ՍԴ-ն եւ այդ լիազորությունները փոխանցում մի իքս մարմնի, որը Սահմանադրությամբ նախատեսված չէ, կամ առնվազն , պետք է գործ ունենանք 5 դատավորի նշանակման հետ, որովհետեւ ՍԴ-ն որոշումներ կայացնում է ձայների մեծամասնությամբ, ավելին` Հրայր Թովմասյանը նախքան նախագահ ընտրվելը արդեն ՍԴ անդամ էր եւ եթե տիրանալու ինչ-որ բան կար, նա արդեն տիրացել էր վաղուց» ։

Աղբյուր` Փաստինֆո