Փաստ ինֆո

«Դատական նիստ այսօր տեղի չի ունենալու։ Դատավորը պարտավոր էր ձերբակալման օրինաչափության հարցը քննարկման առարկա դարձնել 24 ժամվա ընթացքում։ 24 ժամն արդեն անցել է, նիստ չի եղել, Արսեն Բաբայանին դատարան չեն ներկայացրել որպեսզի նիստ լինի»,-այս մասին այսօր լրագրողների հետ ճեպազրույցում ասաց ԱԺ աշխատակազմի ղեկավարի նախկին տեղակալ Արսեն Բաբայանի փաստաբան Երվանդ Վարոսյանը։

Հիշեցնենք, որ երեկ պաշտոնեական կեղծիք կատարելու կասկածանքով ձերբակալվել է ԱԺ աշխատակազմի ղեկավարի նախկին տեղակալ Արսեն Բաբայանը։

Նա հայտնեց, որ նիստը նշանակվել է վաղը 17։40-ին. «Այսօր 18։30-ին նշանակված նիստին մեր պաշտպանյալի ներկայությունը չի ապահովվել, նա դատարան չի բերվել, ոչ էլ բերվելու է»։

Հարցին՝ ով է «մեղավոր» դրա համար, Վարոսյանը պատասխանեց, որ մեղավոր է Հայաստանում դատարանի բացակայությունը։

«Եթե ձևական նիստ է նշանակվում ու չի արվում, ի՞նչ ասեմ։ Դատավորն ու վարույթն իրականացնող մարմինը պետք է ապահովեին նրա ներկայությունը, դրա փոխարեն նոր մեղադրանք է առաջադրվել, թե ինքը  ինչ-որ անձանց կողմից ինչ-որ անհայտ միջոցներով ու մեթոդներով ինչ-որ իշխանություն է յուրացրել»,-ասաց փաստաբանը։

Վարոսյանը հայտնեց, որ Բաբայանը փաստաբանների հետ միասին կարդացել է տեքստն ու փորձել հասկանալ ինչի մասին է խոսքը, սակայն այդպես էլ չի հասկացել։

«Մեղադրանքն իրականության հետ աղերս ունենալ չի կարող, ով ինչ ցուցմունք ուզում է տա»,-ասաց փաստաբանն ու հայտնեց, որ այս պահին Բաբայանի դեմ ցուցմունք չկա։

Նրա խոսքով, ներկայացված մեղադրանքն առնչություն չունի Արսեն Բաբայանի հետ, փոխարենն այն կապված է Սահմանադրական դատարանի հետ և ՍԴ-ի շուրջ տեղի ունեցող գործընթացների հետ։

«Ամբողջ մեղադրանքը դրա մասին է։ Սա պլան «Գ»-ն է, եթե մինչ այս եղել են «Ա»-ն և «Բ»-ն, ապա սա պլան «Գ»-ն է։ Սրանից հետո լինելու է «Դ»-ն, «Ճ»-ն և այս պրոցեսը տեղի է ունենալու։ Ես որպես իրավաբան իրավական գնահատական առաջադրված տեքստին տալ չեմ կարող»,-նշեց Վարոսյանը։

Նա հայտնեց, որ փորձել է դատարանից ճշտել, ինչու իր պաշտպանյալը դատարանում չէ, սակայն դատարանը անհրաժեշտ պատասխանը չի տվել. «Ըստ էության, ոչինչ չեն ասել։ Ոչինչ չեն ասում, ասում են՝ նիստը վաղը 17։45 է»։

Փաստաբանը նշեց, որ վարույթն իրականացնող մարմինը որոշում է կայացրել Բաբայանի նկատմամբ խափանման միջոցը կալանք ընտրելու միջնորդություն ներկայացնել դատարան. «Բնականաբար, հավանաբար իմանալով, որ նման միջնորդությւոն պետք է ներկայացվի նիստը նշանակել են  վաղը, որ օրենքի խախտմամբ այդ երկու հարցը միասին քննարկեն»։

Հարցին, Բաբայանի ձերբակալությունը կապվա՞ծ է Հրայր Թովմասյանի լիազորությունների դադարեցման ու  ՍԴ կազմը ցրելու հետ, փաստաբանը պատասխանեց. «Ոչ մենք, ոչ մեր պաշտպանյալն որևէ այլ միտում տեսնելու հնարավորություն չունենք»։

Նա նաև նշեց, որ տեղի ունեցողը կապված է ՍԴ-ի վերջին զարգացումների հետ և Բաբայանը «սանիկի» կարգավիճակում է գտնվում, սակայն պատրաստ է կրել ցանկացած զրկանք, եթե դա պետք է Հայաստանի Հանրապետությանը։

Աղբյուր` Փաստինֆո