Փաստ ինֆո

«Փաստինֆո»-ի հարցերին է պատասխանում ԱԺ պետաիրավական հարցերի մշտական հանձնաժողովի անդամ Տարոն Սիմոնյանը։

- Որքանո՞վ է իրավաչափ ՀՀ քրեական օրենսգրքի 314-րդ հոդվածը, որով նախատեսված հանցավոր արարք կատարելու կասկածանքով ձերբակալվել է ՀՀ ԱԺ աշխատակազմի ղեկավարի նախկին տեղակալ Արսեն Բաբայանը։

- Ես էլ հենց այդ իրադարձությունն իմացա, բացեցի և՛ քրեական օրենսգիրքը, և՛ համաներման մասին օրենքը, որն ընդունվել էր անցած տարի և այնտեղ խնդիր տեսա։ Հոդվածն իրավաչափ է, հոդվածի հետ կապված խնդիր չկա։ Խնդիրը նրանում է, որ հոդվածն ընկնում է համաներման ակտի առաջին հոդվածի 5-րդ մասի 1-ին կետի տակ։ նշանակում է, որ այն բոլոր հանցակազմերը, որոնք սահմանում են առավելագույնը 4 տարի ազատազրկում , ապա դրանք ընկնում են համաներման տակ, եթե դրանք կատարվել են մինչև 2018 թվականի հոկտեմբերի 21-ը։ Եթե ես չեմ սխալվում, երեկ հրապարկված տեղեկատվությունը հենց վերաբերում էր այն արարքներին, որոնք կատարվել էին մինչև 2018 թվականի հոկտեմբերի 21-ը և հետևաբար այստեղ խնդիր ունենք։ Այդ ձերբակալումը, որն ըստ էության քրեական հետապնդման ակտ է, պետք է շուտափույթ ավարտվի, որովհետև համաներման այդ հոդվածն ըստ էության ծածկում է վերոնշյալ հանցակազմը։

- Արսեն Բաբայանի պաշտպանները ձերբակալման որոշումը բողոքարկել են։ Ի՞նչ եք կարծում, այն կվերացվի՞։

- Եթե այն տեղեկատվությունը, որը հրապարակվել է այդքանն է, այլևս որևէ այլ տեղեկատվություն չկա, ապա, իմ կարծիքով, պետք է բավարարվի, որովհետև իրավական տեսանկյունից ամեն ինչ պարզ ու հստակ է։ Բայց ես չեմ բացառում, որ այլ տեղեկատվություն քննչական մարմինները ներկայացնեն։ Այս պահին չունեմ նման տեղեկատվություն, որը խոչընդոտ կհանդիսանա քրեական հետապնդումը դադարեցնելու համար։ Հոդվածը գործող հոդված է և եթե հիմա նման հոդվածով արարք կատարվի, անձին կենթարկեն քրեական պատասխանատվության, բայց քանի որ հոդվածով սահմանված արարքը կատարվել է մինչև 18 թվականի հոկտեմբերի 21-ը, այստեղ առաջանում է խնդիր, որ համաներման տակ է ընկնում, ինչն էլ ենթադրում է, որ քրեական հետապնդման դադարեցման հիմք է հանդիսանում։

Աղբյուր` Փաստինֆո