Փաստ ինֆո

Ոստիկանի վրա ձեռք բարձրացնելը հավասարազոր է պետության վրա ձեռք բարձրացնելուն։ Այս մասին լրագրողների հետ զրույցում ասել է ՀՀ ոստիկանության պետի պաշտոնակատար Արման Սարգսյանը՝ մեկնաբանելով ոստիկանի սպանության դեպքը։

«Եվ խստագույնս պատժվելու են նրանք, ովքեր կփորձեն այս կամ որևէ այլ կերպ պետության վրա ձեռք բարձրացնել»,- ասաց ոստիկանության պետի պաշտոնակատարը՝ շեշտելով.« Սա նաև մեր համախմբվածության արդյունք է, որ իրավապահ մարմինները գիշերվա այս կարճ ժամանակահատվածում եղած օպերատիվ տեղեկությունների համադրմամբ, բոլոր հնարավոր միջեցների օգտագործման արդյունքում կարող են պարզել այդ անձանց ինքնությունը և նրանց բերման ենթարկել։ Սպանվել է ոստիկան, սպանվել է իր ծառայողական պարտականությունները կատարելիս, չեմ վարանի ասել՝ խիզախաբար, որովհետև նրանք կարող էին չտեսնելու տալ, չմոտենալ, չհետապնդել»։

Դեպքի մասին մանրամասներ ներկայացնելով՝ Արման Սարգսյանն ասաց. «Երբ ոստիկանները մոտեցել են նշված անձանց, նշվածներն անմիջապես դիմել են փախուստի, մեր ոստիկանները հետապնդել են նրանց և կարողացել են մեկին բռնել։ Երկրորդ անձը, որ մինչ այդ դիմել էր փախուստի, մթության մեջ անսպասելի հարձակվել է ոստիկաններից մեկի վրա և փորձել է ազատել բռնված ընկերոջը։ Որոշակի քաշքշուկի ընթացքում նա հաջողացրել է պոկել մեր ոստիկանի ատրճանակը և արձակել կրակոց։ Ենթադրաբար կենսական նշանակության օրգան է վնասվել, որովհետև նախնական տվյալներով մեկ կրակոց ունենք։ Զենքը դեռ չի հայտնաբերվել, ի ուրախություն մեզ կարճ ժամանակահատվածում կարողացել ենք պարզել,երևի, որակումներ տալը ճիշտ չէ, բայց այս դեպքում՝ այդ ստահակներին, վերջիններս արդեն մեզ մոտ են, խոստովանում են»։

Ոստիկանապետի պաշտոնակատարի խոսքով՝ քննությամբ բոլոր հարցերի պատասխանները կտրվեն, հանգամանքները կպարզվեն, քննության լրիվությունը, բազմակողմանիությունը կապահովվի։ Արման Սարգսյանն ընդգծեց, որ այդ անձինք օրինապաշտ քաղաքացիներ չեն եղել և ոստիկանության ծառայողների օպերատիվ հոտառությունը չի դավաճանել և մոտեցել են ճիշտ մարդկանց։
«Ուղղակի ցավում եմ, որ նման դեպք է տեղի ունեցել։ Նրանք հասցրել են կապ տալ, բոլորը մոտեցել են, բայց, ցավոք, մեր գործընկեր Տիգրան Առաքելյանի կյանքը հնարավոր չեղավ փրկել»,- նշեց Սարգսյանը։

Նրա խոսքով՝ վիրավորված ոստիկանը երկարամյա ծառայության փորձ չունի, բայց զոհված ոստիկանը 38 տարեկան է։

«Որքան գիտեմ լրանում էր նրա կենսաթոշակի անցնելու ժամկետը։ Նա երեխաներ ունի։ պատրաստվում ենք պետության ողջ հնարավորությունների չափով օժանդակել մեր գործընկերոջը։ Սա մեր բարոյական պարտքն է նաև խրախոսւել և փառաբանել նման անձանց։ Ես նախաձեռնելու եմ գոևծընթաց, որպեսզի նա պարգևատրվի»,- ասաց Արման Սարգսյանը։

Ավելի վաղ հայտնել ենք, որ ոստիկանների վրա հարձակման կասկածանքով բերման է ենթարկվել 2 անձ։ ՀՀ քննչական կոմիտեի տվյալների համաձայն՝ ոստիկանների վրա հարձակվողները եղբայրներ են՝ 2001թ. և 2003թ. ծնված։ Դեպքի առթիվ հարուցվել է քրեական գործ՝ ՀՀ քրեական օրենսգրքի 238-րդ հոդվածի 1-ին մասով, 316-րդ հոդվածի 2-րդ մասով և 104-րդ հոդվածի 1-ին մասով: Կազմվել է քննչական խումբ, մշակվել քննչական պլան:

«Սուրբ Գրիգոր Լուսավորիչ» ԲԿ-ից հայտնել են, որ վիրավորում ստացած 25-ամյա ոստիկանի վիճակը բավարար է և նա 2-3 օրից դուրս կգրվի։ Նշենք, որ դեպքը տեղի է ունեցել լուսադեմին։ Ոստիկանության տարածած հաղորդագրությւան համաձայն՝ հոկտեմբերի լույս 16-ի գիշերը՝ ժամը 04:20-ի սահմաններում, ոստիկանության պետական պահպանման գլխավոր վարչության Արաբկիր բաժնի ոստիկանները «Հաղթանակ» զբոսայգու մուտքի մոտ նկատել են երկու անձի։

Վերջիններս տեսնելով պարեկային մեքենան փախել են։ Ոստիկանության ծառայողները հետապնդել են նրանց և ազատության պողոտայում բռնել։ Բռնված անձինք դիմադրել են, որի ժամանակ նրանցից մեկը խլել է ոստիկաններից մեկի հաշվեցուցակային ատրճանակն ու կրակել, որի հետևանքով Արաբկիրի պահպճանության բաժնի ոստիկանը, 38-ամյա Տիգրան Առաքելյանը մահացել է։ Նույն ատրճանակով երկու անձանցից մեկը հարվածել է նաև մյուս ոստիկանին։

Հեղինակ` Իզաբել Սահակյան