Փաստ ինֆո

«Արվել է օրենքի տառին համապատասխան, եթե օրենքի տառին համապատասխան է արվել, այդ դեպքում լրացուցիչ մեկնաբանության կարիք չկա»,- «Փաստինֆո»-ի հետ զրույցում ասաց ՀՀ վարչապետի խոսնակ Վլադիմիր Կարապետյանը՝ անդրադառնալով մեկ անձից գնման ընթացակարգով վարչապետի աշխատակազմին գովազդային ծառայություններ ձեռք բերելու նպատակով գումար հատկացնելու որոշմանը։

Ավելի վաղ «Փաստինֆո»-ն տեղեկացրել էր, որ «Հայաստանի վերափոխման ռազմավարություն 2050»-ի տեսլականի ուղերձները հանրությանը ներկայացնելու, ցուցապաստառների տպագրության, գովազդային ծառայությունների ձեռքբերման նպատակով վարչապետի աշխատակազմը պետբյուջեի պահուստային ֆոնդից 48 միլիոն 900 հազար դրամ կստանա։

48 միլիոն դրամ՝ գովազդի համար. վարչապետի աշխատակազմը մեկ անձից գնումով ծառայություն կպատվիրի

Գրել էինք, որ գնման առարկայի համար գնման ձև է սահմանվել մեկ անձից գնում կատարելու ընթացակարգը։ Որպես պատճառ կառավարության որոշման մեջ նշվում էր ժամկետի սղությունն ու մատուցվող ծառայությունների անհետաձգելիությունը։

«Փաստինֆո»-ի հարցին, թե այդուհանդերձ, ինչո՞ւ մրցույթ չի հայտարարվել եւ արդյո՞ք մեկ անձից գնումը կոռուպցիոն ռիսկեր չի պարունակում, Վլադիմիր Կարապետյանը պատասխանեց. «Դուք սովոր եք երեւի, որ վերջին 20 տարվա ընթացքում մշտապես այդպես է եղել , հիմա այդպես չէ։ Ուզում եք ասել՝ հիմա էլ այդպես է, այդպես չէ, անում ենք այնպես, ինչպես այս պահին նպատակահարմար է՝ հանրային շահից ելնելով։ Տրամաբանություն կա նրանում, որ Հայաստանի զարգացման ռազմավարության քննարկումները տեղի կունենան հնարավորինս շուտ, կարող էինք ավելի շուտ սկսել»։

Վլադիմիր Կարապետյանը խստացավ ճշտել եւ «Փաստինֆո»-ին տեղեկացնել, թե որ ընկերությանն է կառավարությունը պատվիրելու անհետաձգելի գովազդային ծառայությունները։

Ի դեպ, վարչապետ Փաշինյանը նախկինում՝ ընդդիմադիր պատգամավոր եղած ժամանակ, մշտապես քննադատում էր նախորդ կառավարություններին այս կամ այն ծառայությունը մեկ անձից գնման ընթացակարգով ստանալու համար։

Աղբյուր` Փաստինֆո