Փաստ ինֆո

ԱԺ «Իմ քայլը» խմբակցության մի քանի պատգամավորների նախաձեռնությամբ ԱԺ Մարդու իրավունքների պաշտպանության եւ հանրային հարցերի մշտական հանձնաժողովը վաղը՝ հոկտեմբերի 8-ին արտահերթ նիստ կգումարի։

Նիստի օրակարգում 2 հարց է՝ Կանանց հարցերով խորհրդի անդամի առաջադրման և ընտրության հարցը, ինչպես նաեւ քաղաքացիական հասարակության ներկայացուցիչների հետապնդման, և նրանց շուրջ ատելության և անհանդուրժողականության մթնոլորտի հրահրման հարցը:

Նիստի հիմնական զեկուցողը ԱԺ «Իմ քայլը» խմբակցության պատգամավոր Մարիա Կարապետյանն է, որը «Փաստինֆո»-ի հետ զրույցում ասաց, որ հանձնաժողովի արտահերթ նիստ հրավիրելու առիթը վերջին շրջանում առհասարակ, քաղհասարակության նկատմամբ վերաբերմունքը եւ կոնկրետ անձանց մոտենալու, հետամտելու, նրանց նկատմամբ սպառնալիքներ հնչեցնելու գործողություններն են եղել։ «Նիստի ընթացքում մենք կխոսենք առհասարակ, քաղհասարակության, իրավապաշտպանների, լրագրողների նկատմամբ հետապնդման եւ հետամտման գործողություններից»,-ասաց Մարիա Կարապետյանը։
«Փաստինֆո»-ի հարցին՝ արդյո՞ք անդրադարձ լինելու է Սորոսի հիմնադրամի դեմ «Վետո» շարժման իրականացրած բողոքի ակցիաներին, Մարիա Կարապետյանը պատասխանեց.«Մենք մանրամասների մեջ կարծում եմ չենք խորանա, բայց, եթե ինչ-որ մեկը ցանկանա դրա մասին խոսել՝ կխոսի։ Նիստը հրավիրելու առիթը առհասարակ, որոշակի պարբերականությամբ նման գործողություններն են ՝ ակցիաները կամ ակցիաների բեմականացումը, բայց ավելի մեծ կոնտեքստում պետք է դա դիտարկել, որովհետեւ խնդիրը մի դեպք չէ, խնդիրը կրկնվող է»։

Մարիա Կարապետյանն ասաց, որ Սորոսի հիմնադրամից հրապարակային հայտարարությունններ են եղել, բայց պատգամավորին ուղղված նամակ կամ գրություն չի եղել։ «Այդ հանգամանքը էական չէ, ԱԺ պատգամավորները տեսնում են, թե ինչ է կատարվում հանրության շրջանում եւ պետք է գնահատական տան տեղի ունեցող երեւույթներին առհասարակ»,-նշեց պատգամավորը՝ հավելելով, որ «Վետո»-ի գործողությունները գնահատում է որպես ատելության, խարանի մթնոլորտի ստեղծում։

Անդրադառնալով «Հայելի» մամուլի ակումբի նկատմամբ տեղի ունեցած հարձակմանը, Մարիա Կարապետյանն ասաց՝ խուլիգանություն է տեղի ունեցել, ինչը դատապարտելի է։

Նրա փոխանցմամբ՝ վաղը կայանալիք նիստի ընթացքում անդրադարձ կլինի այն քայլերին, որոնք արդեն իսկ ձեռնարկվել են, օրինակ, հանրային քննարկման է դրվել բռնության կոչերին վերաբերող նախագիծը։ Պատգամավորները կներկայացնեն իրենց պատկերացումները վերը նշված խնդիրների կարգավորման վերաբերյալ։

Հարցին, արդյո՞ք անդրադարձ կլինի «Վետո» շարժման հիմնադիր Նարեկ Մալյանի հետ տեղի ունեցածին, երբ 2019 թվականի մարտի 4-ին, գիշերը 00։30-ի սահմաններում «Ռեստարտ» նախաձեռնության անդամները իր տան շքամուտքի մոտ հարձակվեցին նրա վրա և վերջինիս պնդմամբ, փորձել առևանգել իրեն՝ Մարիա Կարապետյանն արձագանքեց. «Դրա մասին եւս ժամանակին խոսվել է։ Կարծում եմ՝ երբ բռնություն են սադրում եւ հետո դառնում դրա զոհը, այդ սադրելու կանխամտածվածությունը եւս պետք է դատապարտվի, ինչպես եւ այն գործողությունը, որը տեղի է ունենում սադրելուց հետ»։

Աղբյուր` Փաստինֆո