Փաստ ինֆո

Դատավոր Աննա Դանիբեկյանի ինքնաբացարկի միջնորդությունը պետք է մերժվի։ Այս մասին Ռոբերտ Քոչարյանի և մյուսների գործով դատական նիստի ժամանակ հայտարարեց տուժողների իրավահաջորդների ներկայացուցիչ Տիգրան Եգորյանը։

«Ինքնաբացարկի փաստարկն առարկայազուրկ է և հիմնազուրկ։ Մենք չունենք որևէ փաստ, որ տեղի է գործերի համակարգչային բաշխման շրջանակներում տեղի է ունեցել այնպիսի միջամտություն, որի նպատական ի սկզբանե եղել է գործն այնպիսի դատավորի մակագրելը, որն արդար դատաքննության իրավունքի իրագործման ստանդարտներին ունենալու է կոնկրետ անհամապատասխանություն»,-ասաց Տիգրան Եգորյանը։

Վերջինս ընդգծեց, որ եթե նույնիսկ համակարգչային բաշխման գործընթացում որևէ տեսակի միջամտություն արձանագրվի, որն ուղղված է եղել օրինակ տվյալ դատարանում ընդգրկված դատավորների ծանրաբեռնվածության հաշվառմանը կամ դատավորների մոտ առկա այն իրավիճային հաշվառմանը, որոնք հետագայում պետք է նպաստեին գործի արդյունավետ և ժամանակին քննության իրավունքի ապահովմանը, այս պարագայում տուժողների իրավահաջորդներիկ ներկայացուցչի կարծիքով չի կարող դիտարկվել արդար դատաքննության իրավունքի խախտում։

Նշենք, որ դատական նիստում դատավոր Դանիբեկյանին ինքնաբացարկի միջնորդություն է ներկայացրել ՀՀ երկրորդ նախագահ Ռոբերտ Քոչարյանի պաշտպանական թիմը, որին միացել են նաեւ Սեյրան Օհանյանի, Արմեն Գեւորգյանի եւ Յուրի Խաչատուրովի պաշտպանները։

Ներկայացնելով ինքնաբացարկի միջնորդությունը՝ Ռոբերտ Քոչարյանի պաշտպան Հայկ Ալումյանը հայտարարել է, որ դատարանը ձեւավորվել է կամայականորեն․ «Առկա են մի շարք հանգամանքներ, որոնք բացառում են Ձեր մասնակցությունը սույն դատական գործին։ Առաջինն այն է, որ Դուք սույն գործը քննելու համար չեք կարող համարվել պատշաճ դատարան, երկրորդն այն է, որ Դուք ունեք կանխակալ բացասական վերաբերմունք Ռոբերտ Քոչարյանի նկատմամբ»։

Հեղինակ` Հասմիկ Կոշկարյան