Փաստ ինֆո

Ծաղկաձորի «Գոլդեն փելես» հյուրանոցի հանձնման-ընդունման աշխատանքները կտեւեն առնվազն երկու-երեք շաբաթ, որից հետո կքննարկվի եւ կորոշվի դրա տնօրինման ձեւը։ Այսօր Կառավարության նիստից հետո տեղի ունեցած ճեպազրույցում հայտարարել է պետական գույքի կառավարման կոմիտեի ղեկավար Նարեկ Բաբայանը՝ անդրադառնալով՝ Արմեն Ավետիսյանի «Գոլդեն փելես» հյուրանոցի՝ որպես նվիրատվություն պետության փոխանցմանը ։

Հիշեցնենք, որ այն կառավարությանը նվիրելու դիմումն Ավետիսյանի ընտանիքը ներկայացրել է դեռեւս 2018 թվականի նոյեմբերին, իսկ կառավարության համապատասխան որոշումը եղել է այսօր։
Պաշտոնյան նշեց, որ այս ընթացքում եղել են տարբեր առաջարկներ՝ թե վարձակալելու, թե գնելու։

«Գույքն անշարժ գույքի հետ միասին գնահատված է շուրջ 16.5 մլն դոլար։ Եվ, բնականաբար, եթե օրինակ՝ սակարկությունների միջոցով իրացվի, ապա սկզբնական փուլում նվազման հնարավորություն չի տրվելու։ Այսինքն՝ միայն աճողական է լինելու։ Եղել են առաջարկներ դրանից ավելի բարձր գնով գնելու։ Կարծում եմ, որ վաճառքի դեպքում ճիշտը աճուրդով տարբերակն է»,- նշեց Նարեկ Բաբայանը։

Նրա խոսքով՝ առաջարկներ եղել են և՛ Հայաստանից, և՛ Հայաստանից դուրս գտնվող հայերից։ Անդրադառնալով՝ Արմեն Ավետիսյանի ընտանիքի կողմից գույքի ձեռքբերման օրինականությանը և գույքի՝ պետությանը փոխանցման գործընթացի ձգձգմանը՝ Նարեկ Բաբայանը նշեց. «Նախ քննարկվել են տարբեր ռիսկեր, որոնք կարող են առաջանալ, որովհետև կային գույքն ընդունելու տարբեր տարբերակներ՝ թե՛ որպես գույք, թե՛ որպես ՍՊԸ։ Կային որոշակի ռիսկեր, որոնք ներկայացվել էին Արդարադատության նախարարության մեր գործընկերների կողմից և այլն։ Ինչպես նաև՝ այս ընթացքում եղել է այդ գույքի գույքագրումը և գնահատումը։ Նաև որոշակի քննարկումներ հարկազատման հետ կապված»։

Նա նաև հավելեց, որ գույքի օրինական կամ անօրինական լինելու հարց չկա։

«Գույքը օրինական է, ունի օրինական վկայական։ Այն ձեռք չի բերվել, գույքը կառուցվել է։ Իսկ կառուցման հետ կապված՝ ինչ խնդիրներ կան՝ կան, թե չկան, դա մեր տիրույթից դուրս է»,- ասաց Բաբայանը։

Նրա խոսքով՝ այս պահին գույքը տնօրինում է սեփականատերը։

«Պետության կողմից շահագործելը, իհարկե նպատակահարմար չէ, բայց հավատարմագրային կառավարման տալը, դա նույնպես պետության կողմից այդ օպերացիայի իրականացումն է ենթադրում։ Այսինքն՝ գույքը մնում է պետությանը, տրվում է հավատարմագրային կառավարման՝ ինչ-որ համապատասխան տոկոսներով և արդեն այդ պայմանագրով համապատասխանեցված, համաձայնեցված »,- նշեց Բաբայանը։

Անդրադառնալով՝ Մանվել Գրիգորյանի գույքին, նա նշեց, որ որևէ նորություն չկա, նախորդ հայտարարությունները ուժի մեջ են։ Իսկ լրագրողների այն հարցին, թե արդյո՞ք կան այլ պաշտոնյաներ, որոնք պատրաստ են գույք նվիրաբերել պետությանը՝ Նարեկ Բաբայանը նշեց, որ իրեն հայտնի չէ, սակայն հավելեց, որ շրջանառվող համապատասխան օրենքի ընդունումից և կիրառումից հետո, այդ գույքերը կբռնագանձվեն։

Հեղինակ` Իզաբել Սահակյան