Փաստ ինֆո

Այն ամենից հետո, ինչ տեսանք այս մեկ տարվա մեջ, դժվար է լավ սպասելիք ունենալ։ Բայց հույս ունենք՝ գոնե գրավը կկիրառվի։ Այս մասին լրագրողների հետ զրույցում ասաց ՀՀ երկրորդ նախագահ Ռոբերտ Քոչարյանի որդին՝ Լևոն Քոչարյանը։

«Մարդ պետք է ճղճիմ լինի, որ մտածի հայրս, ունենալով նման կենսագրություն, կարող է խուսափել կամ թաքնվել։ Թե՛ դատախազները, թե՛ դատավորները, թե՛ մյուսները վստահ են՝ այստեղ խուսափելու և թաքնվելու մասին խոսք չի կարող լինել։ Նա հինգ ամիս ազատության մեջ գտնվեց, սակայն ո՛չ խուսափեց, ո՛չ էլ խոչընդոտեց»,-ասաց Լևոն Քոչարյանը՝ ընդգծելով, որ դատը տարիներով ձգձգելու նպատակ ունեն։

Հարցին՝ որքան գրավ են պատրաստ վճարել, Լևոն Քոչարյանը ստույգ որևէ թիվ չասաց. «Այս պահին եղբորս և հորս հաշիվներն են սառեցված։ Եկեք թիվ չասեմ։ Կան ընկերներ, մարդիկ, որ միգուցե կօգնեն, երբ խնդրենք,-ասաց Լևոն Քոչարյանը՝ ընդգծելով, որ եթե գրավը չկիրառվի, վերջնականապես պարզ կդառնա, որ այստեղ իրավական ուղղակի ոչ մի պրոցես չկա. «Սա ամբողջովին տեղավորվում է քաղաքական կոնտեքստում»։

Հարցին՝ ինչպես է վերաբերում Սահմանադրական դատարանի շուրջ ստեղծված իրավիճակին, Լևոն Քոչարյանը նկատեց, որ չափազանց պարզ է՝ ինչ է կատարվում. «Այն մարդիկ, այն դատավորները, այն կառույցները, ովքեր իշխանության հարյուր տոկոսանոց ենթակայության տակ չեն, ամեն կերպ ուզում են ձերբազատվել։ Ասում են՝ նախկին են, բայց ի՞նչ Գլխավոր դատախազը նախկին չէ՞»,-ավելացրեց Լևոն Քոչարյանը։

Հեղինակ` Հասմիկ Կոշկարյան