Փաստ ինֆո

Ադրբեջանի ռազմագերիների, պատանդների և անհայտ կորածների հարցերով պետական հանձնաժողովը նախօրեին հայտարությանը դրական արձագանքելով Հայաստանը կսպասարկի ջուր, կլցնի Ադրբեջանի ջրաղացին։ «Փաստինֆո»-ի հետ զրույցում նման կարծիք է հայտնել «Ընդդեմ իրավական կամայականությունների» ՀՀԿ նախագահ, ՄԻ նախկին պաշտպան Լարիսա Ալավերդյանը։

«Մենք դրանով միայն կսպասարկենք Ադրբեջանի լկտի կեցվածքը։ Փոխանակ դիվերսանտ մարդասպանների հարցը ամենատարբեր հարթակներում բարձրացնելու, Հայաստանն այսքան ժամանակ լռության է մատնել հարցը»,- ասել է Լարիսա Ալավերդյանը։

Հիշեցնենք, որ է Ադրբեջանի ռազմագերիների, պատանդների և անհայտ կորածների հարցերով պետական հանձնաժողովը նախօրեին հայտարարությամբ պատրաստակամություն էր հայտնել Ադրբեջանում գտնվող ՀՀ քաղաքացիներ Կարեն Ղազարյանին և Արայիկ Ղազարյանին փոխանակել ԼՂՀ-ում դատապարտված ադրբեջանցի դիվերսանտներ Դիլհամ Ասկերովի և Շահբազ Գուլիևի հետ, իսկ այսօր վարչապետ Փաշինյանի մամլո խոսնակ Վլադիմիր Կարապետյանը հայտարարել է, թե հարցի մասին տեղյակ են եւ քննարկում են այն։ «Հաշվի առնելով հարցի նրբությունը՝ դրա մասին հրապարակային կհայտնենք, երբ ինչ-որ որոշումներին մոտ լինենք», - ասել է Կարապետյանը։

Լարիսա Ալավերդյանը համոզված է, որ Հայաստանի քաղաքացիները պատահական չեն հայտնվում սահմանից այն կողմ. «Ես ունեմ հիմնավոր կասկածներ՝ ասելու, որ հայերին մշտապես առեւանգում են կամ ինչ-որ խաբեությամբ նրանք հայտնվում են Ադրբեջանում։ Որպես կանոն, առնվազն վերջին տարիներին դա լինում է որեւէ դիվերսիայից հետ, այսինքն, դա մշակված սխեմա է ։ Ընդ որում, ուզում եմ շեշտել, որ
միջազգային իրավունքում «փոխանակել» արգելված տերմին է»։

Մեր դիտարկմանը, արդյո՞ք Բաքվի այս նախաձեռնությունը կարող է տեղավորվել Ղարաբաղյան հիմնախնդրի կարգավորման բանակցային գործընթացի շրջանակում վերջին ամիսներին հնչած այն հայտարարությունների համատեքստում, որ կողմերը պետք է գործնական միջոցառումներ ձեռնարկեն հումանիտար խնդիրների լուծման ուղղությամբ հատկապես, որ Հայաստանի ու Ադրբեջանի արտգործնախարարները հնարավոր է ՝ հանդիպեն ԱՄՆ-ում, ՄԱԿ գլխավոր ասամբլեայի 74-րդ գագաթաժողովի շրջանակում, Լարիսա Ալավերդյանը պատասխանել է.«Ես ոչ միայն չեմ բացառում, այլեւ ենթադրում եմ, որ այն կարճատես ասեմ, թե ոչ հեռատես քաղաքականության եւ տեսլականների ներքո է, բայց մի կարեւոր հանգամանք կա, որը ես անպայման ուզում եմ շեշտել՝ կա տուժած կողմ ՝ Սմբատ Ցականյանի ծնողները։ Ես համոզված եմ, որ առնվազն էթիկական տեսանկյունից եւ իրավական պրակտիկայի տեսանկյունից հայկական կողմը չպետք է աներ որեւէ հայտարարություն՝ առանց համաձայնեցնելու Սմբատ Ցականյանի ծնողների հետ։ Ես անձամբ հանդիպել եմ նրա ծնողների հետ, որոնք համարում են, որ այդպիսի գործարքը պարզապես ուղղված կլինի Էրքեջ գյուղի ամբողջ բնակչության դեմ, որովհետեւ այն գյուղը սահմանապահ է եւ այնտեղ մարդիկ ապրում են ոչ նրա համար, որ իրենց երեխաներին սպանեն, ապա մարդասպաններին փոխանակեն անմեղ մարդկանց հետ։ Այս խնդիրները Հայաստանի իշխանությունը պետք է ամենաբարձր մակարդակներով բոլոր հարթակներում բարձրացնի »։

Անդրադառնալով հարցին, արդյո՞ք Հայաստանի նոր իշխանությունը չի գիտակցում այս ամենը՝ Լարիսա Ալավերդյանն արձագանքել է.«Ես անպատասխան կթողնեմ այդ հարցը, որովհետեւ վերջերս ես մի քանի անգամ հնարավորություն եմ ունեցել ասելու, որ ինձ զարմացնում է այն քաղաքականությունը, որը չիմացության կամ այլ պատճառով թույլ են տալիս իշխանության որոշ ներկայացուցիչներ։  Հետեւաբար, ես ուզում եմ շեշտը դնել տուժող կողմի վրա եւ կրկնում եմ ՝ թե հումանիտար, թե իրավական, թե բարոյական տեսանկյունից, անթույլատրելի է անել որեւէ քայլ՝ չստանալով նրանց համաձայնությունը»։

Լարիսա Ալավերդյանը շեշտեց՝ հումանիտար իրավունքի նորմերը նրա համար չեն, որ Հայաստանը սատար կանգնի Ադրբեջանի ագրեսիվ դիրքորոշմանը. «Այդ նորմերը նրա համար են, որ նման բաներ չլինեն, իսկ դրա համար հարկավոր չէ, որ հայկական կողմը սպասի, թե երբ է Ադրբեջանը «մեծահոգաբար» հայտարարելու, որ պատրաստակամ է։ Ադրբեջանի այդ պատրաստակամության մասին մենք 5 տարի շարունակ լսել ենք, ավելին, Ադրբեջանը դիմել է ՄԻԵԴ եւ այս հայտարարությունն, ըստ էության, վկայում է այն մասին, որ ՄԻԵԴ-ում Ադրբեջանն անհաջողության է մատնվել, ֆիասկո է ունեցել ապացուցելու հարցում, թե նրանք պատանդ են գտնվում չճանաչված հանրապետությունում»։

Լարիսա Ալավերդյանի համոզմամբ, պասիվ դիրքորոշման փոխարեն Հայաստանը պետք է պրոակտիվ դիրքորոշում որդեգրի։

Աղբյուր` Փաստինֆո