Փաստ ինֆո

Զորքի օգտագործումն ապօրինի չէ, օրինական է։ Այս մասին «Փաստինֆո»-ի հետ զրույցում ասաց Ռոբերտ Քոչարյանի պաշտպանական խմբի անդամ Արամ Օրբելյանը՝ անդրադառնալով 2008 թվականի մարտի իրադարձությունների ժամանակ զորքի կիրառմանը։

«Փորձ է կատարվում նորից խեղաթյուրել ամբողջ պաշտպանական թիմի դիրքորոշումը։ Վերջին ժամանակներում ասում են՝ դե սկզբում ասում էին զորք չկա, հետ ապացուցեցին, որ զորք կա, հետո ասում էին՝ Ղարաբաղից զորք չկա, էլի ապացուցեցին, որ զորք կա, հիմա էլ ասում են՝ դե եկել ասում են օրինական է»,- նշեց փաստաբանը։

Պաշտպանի խոսքով՝ նրանք երբևէ չեն թաքցրել և չեն հերքել, որ զորք եղել է և այն, որ Երևանում տեղակայվել էր բացառապես ՀՀ զինված ուժերի ստորաբաժանումները։ Նրա խոսքով՝ դրա հետ համաձայն է նաև Դատախազությունը։

«Եթե մեղադրող կողմը կասի, որ չէ, ՀՀ զինված ուժերից բացի ուրիշ ստորաբաժանումներ են եղել, մենք կտանք պարզաբանումներ։ Բայց այս մասով վեճ չունենք Դատախազության հետ»,- նշեց պաշտպանը։
Նրա խոսքով՝ կան այլ տարաձայնություններ, թե զորքը, որտեղ է եղել, երբ է եղել, ինչ գործառույթ է ունեցել, բայց դրա մեջ էլ շատ մեծ չէ տարբերությունը։

«Այսինքն՝ որ հիմնական գործառույթը եղել է տարբեր պետական կարևորության շենքերի պաշտպանությունը, ոնց որ թե, ընդհանուր առմամբ չի հերքում մեղադրական կողմը, որ զորքը չի օգտագործվել մարտի 1-ի առավոտյան ՝ նստացույցը ցրելու համար, կարծես թե, ընդունում է նաև մեղադրական կողմը»,- շեշտեց Օրբելյանը։

Նրա խոսքով՝ խնդիրը զորքի օգտագործման օրինականության հարցն է։

«Սահմանադրությամբ արգելված չէ։ Զինված ուժերը իրականացնում են իրենց գործառույթներից մեկը՝ դա երկրի անվտանգությունն է։ Անվտանգությունը շատ լայն կոնցեպտ է։ Դա չի ներառում միայն պաշտպանությունը, դա չի ներառում միայն սահմանների անձեռնմխելիությունը, դրանք առանձին են ներգրավված։ Անվտանգությունը ինքն ապահովում է և անցումային դրույթներում նախագահին տրված է իրավունք՝ Սահմանադրական կարգին սպառնացող անմիջական վտանգի ժամանակ ձեռնարկել իրավիճակից բխող գործողություններ։ Եթե կա զորք, զորքը կարող է անվտանգությունն ապահովել, նախագահը գնահատում է, որ կա Սահմանադրական կարգին սպառնացող անմիջական վտանգ, ինքն իրավունք ունի զորքն օգտագործել»,- նշեց պաշտպանը։

Հիշեցնենք, որ ՀՀ երկրորդ նախագահ Ռոբերտ Քոչարյանի դիմումի հիման վրա Սահմանադրական դատարանը հակասահմանադրական էր ճանաչել ՀՀ քրեական դատավարության օրենսգրքի 35-րդ հոդվածը։ ՍԴ որոշմանը հաջորդել է Ռոբերտ Քոչարյանի պաշտպանների միջնորդությունը առաջին ատյանի դատարան՝ անհապաղ դատական նիստ գումարելու եւ ՀՀ 2-րդ նախագահին ազատ արձակելու պահանջով։ Ռոբերտ Քոչարյանը մեղադրվում է ՀՀ Քրեական օրենսգրքի 300.1-րդ հոդվածի 1-ին մասով և 311-րդ հոդվածի 4-րդ մասի 2-րդ կետով՝ ՀՀ Սահմանադրական կարգը տապալելու և առանձնակի խոշոր չափերով կաշառք ստանալու մեջ:

Հեղինակ` Իզաբել Սահակյան