Փաստ ինֆո

Եկեք հանրության հետ պարզ խոսենք։ Մեր խնդիրը ոչ թե մերսման սրահների, այլ մերսման սրահների անվան տակ գործող ոչ այնքան մերսման սրահների հետ է ։ Առևտրի և ծառայությունների մասին օրենքում առաջարկվող փոփոխությունների քննարկման ժամանակ ԱԺ նիստի ժամանակ հայտարարեց «Իմ քայլը» խմբակցության պատգամավոր Սուրեն Գրիգորյանը։

Նշենք, որ օրինագծի հեղինակը ԲՀ խմբակցության պատգամավոր Սերգեյ Բագրատյանն է, որը առաջարկում է արգելել մերսման սրահների տեղակայումը բազմաբնակարան շենքի բնակելի և ոչ բնակելի տարածքում, ինչպես նաև կրթական, պատմամշակութային հաստատությունների, պետական և տեղական ինքնակառավարման մարմինների վարչական շենքերի, բժշկական հաստատությունների տարածքներում։

Իշխանական պատգամավորները, սակայն, չեն կարծում՝ սա խնդրի խորքային լուծման լավ տարբերակ է։ «Իմ քայլը» խմբակցության պատգամավոր Սուրեն Գրիգորյանը նկատեց. «Ունենք խնդիր, որ մերսման սրահի քողի տակ, ըստ էության, մատուցվում են այլ ծառայություններ։ Սակայն խնդրի լուծման փիլիսոփայությունն եմ ցանկանում հասկանալ։ Այսինքն՝ պետությունն արձանագրում է, որ չի կարողանում դա արձանագրել և դրան համարժեք մոտեցում ցուցաբերել և փոխարենը որոշում է բոլոր մերսման սրահները հանել շենքի տակից»,-ասաց պատգամավորը՝ հարցնելով ճի՞շտ է արդյոք նման տրամաբանությունը։

Նախագծի հեղինակը նկատեց, որ քաղաքացիներն ահազանգում են կուտակումների, աղմուկի մասին, բայց փաստեր չունեն.«Դրանք փակ տարածքում իրականացվող գործողություններ են, որտեղ Աստված գիտի, թե ինչեր են կատարվում»,-ասաց Սերգեյ Բագրատյանը։

Սուրեն Գրիգորյանը, չհամոզվելով, որ այսկերպ կարելի է լուծել խնդիրը, այնուամենայնիվ ընդգծեց, որ եթե այս պահին լուծումն այսպես են տեսնում, ապա ինքը դեմ չէ։

«Եթե դանակներով մարդ են սպանում, չի նշանակում՝ դանակ պետք է չունենալ։ Ըստ էության , եթե մերսման սրահները կավատության կամ այլ հանցակազմի տակ ընկնող գործողությունների վայր են հանդիսանում, միգուցե դրան պետք է քրեաիրավական գնահատական տալ»,-նշեց պատգամավորը։

Աղբյուր` Փաստինֆո