Փաստ ինֆո

Այսօր «Հայաստանի որսորդների և ձկնորսների միավորում» ՀԿ շենքի դիմաց բողոքի ակցիա էր: Որսորդները արդեն 10 օր է վճարել են արտոնագրի համար անհրաժեշտ գումարը, բայց արտոնագիրը չեն ստացել: «Փաստինֆո»-ի հետ զրույցում միավորման անդամ Արայիկ Սարգսյանը ասաց, որ իրենց ամեն օր ասել են՝ վաղը եկեք:

«Ավելի քան 10 օր է կանխավճարը վճարել ենք: 10 օր է՝ ասում են վաղը եկեք ձեր լիցենզիան կստանաք՝ սովորական լորի լիցենզիա: Ամեն օր ժամը 10-ին մի պատճառաբանություն հորինում են: Տնօրենը երկրում չի, կնիքը մեզ մոտ չի, հեսա կգա, նախարարությունն է թերանում, լիցենզիաները տպարանից նոր պետք է բերենք: Լրագրողներից, կարծես թե, վախենում են: Իմացան լրագրող ենք հրավիրել, նախագահը միանգամից հայտնվեց: Շատ տարօրինակ է: Զանգահարել ենք նախարարություն, ասել են՝ արտոնագրերը վաղուց պատրաստ են, միայն նախագահը պետք է գա , կնքի , գումարը մուծի ու բաժանի ժողովրդին»:

«Հայաստանի որսորդների և ձկնորսների միավորում» ՀԿ նախագահ Գագիկ Խաչատրյանը մեզ հետ զրույցում ասաց, որ որսորդների մի մասն, ովքեր մինչև օգոստոսի 22-ն են կատարել վճարումը, արդեն ստացել են արտոնագրերը, մնացածի արտոնագրերի հետևից այսօր պետք է գնա:

«Մինչև ամսի 22-ը, ովքեր վճարել են, նրանց լիցենզիաները տրվել են: Մենք ֆինանս չունենք, որ մեր հաշվին լիցենզիան բերենք, մինչև վճարումը կատարեն, վերադարձի հնարավորություն էլ չկա: Մենք հավաքագրում ենք գումարները, մեկ շաբաթվա ընթացքում հայտ ենք ներկայացնում: Մենք իրենց ասել էինք, որ չորեքշաբթի հայտը տալու ենք: Հայտը տվել ենք հինգշաբթի առավոտյան, այսօր զանգել են, գնում եմ բերեմ լիցենզիաները: Չորեքշաբթի չենք ներկայացրել, որովհետև չէր հավաքվել գումարները»:

Որսորդ Արայիկ Սարգսյանն ասում է՝ իրենք հայտերն ամեն օր պետք է տանեն, սուբյեկտիվ է, թե սպասում են գումար հավաքագրվի:
«Նախագահի բացակայության ժամանակ մեզ ասացին ինքը Վրաստանում է, եթե ինքը Հայաստանում չի լինում, բնականաբար կնիքը պետք է թողնի պատասխանատու աշխատողի մոտ, որ ինքը նույն գործողությունները անի: Գոնե բարի լինեն ասեն՝ գնացեք, 10 օրից եկեք: Մեզ ամեն օր ասում էին վաղը կլինի: Սա արհամարհական վերաբերմունք է»:

Տնօրենն ասում է՝ ինքը կնիքը ոչ մեկի մոտ չի թողնում, քանի որ երկար ժամանակով չի բացակայում, անգամ արձակուրդի ժամանակ օրը մեկ անգամ գալիս է ՀԿ:

Միայն լորի լիցենզիայի համար որսորդները 6000 դրամ են վճարում, եթե ուզում են այլ կենդանիներ էլ որսալ, ապա պետք է վճարեն մինչև 17.000 դրամ: Որսորդմիության անդամներն ասում են՝ դեռ անցած տարի կենդանիների նույն ցուցակի համար 17.000-ի փոխարեն 8000 դրամ էին վճարում: Սերոբ Ավետիսյանը արդեն 53 տարվա որսորդ է: Ասում է՝ թոշակի է անցել, թոշակն էլ 41.000 դրամ է, 6000 դրամից ավելի որսի համար վճարել չի կարող, բայց իրենց տարածքում բադերն են շատ, որոնց չի որսում, որ չասեն որսագող է:

«Իմ թոշակը 41 հազար դրամ է: 17.000 դրամ տամ որսի համար, 1500 դրամ տամ անդամավճար, չհաշված զինամթերքը: Հնարավոր չէ՞, որ նախարարությունը թոշակառուների համար զեղչեր անի: Բադերը մեզ մոտ են, Արտաշատում, հիմա , եթե ես բադ որսամ, կասեն որսագող է, բայց հեռու տեղ գնալու հնարավորություն էլ ես չունեմ: Ես ասում եմ հիմա՝ գնալու եմ բադ խփեմ, դե թող գան ինձ՝ 72 տարեկան մարդ եմ, պատժեն »:

Որսորդներն ասում են՝ վերահսկման համակարգ էլ չկա, ոչ ոք չի կարող իմանալ, թե ո՞վ, ինչքա՞ն որսաց: Ասում են՝ որսի դուրս գալու օրերն էլ կրճատել են, դա էլ որսորդների համար է վտանգավոր: Հնարավոր է իրար վրա կրակեն:

Հեղինակ` Անահիտ Հովհաննիսյան