Փաստ ինֆո

Սկիզբը՝ նախորդիվ

«Մարտի 1»-ի գործի նյութերին ծանոթանալիս պարզ է դառնում, որ առանցքային տեղ են զբաղեցնում 2008 թվականի իրադարձություններին ՀԱԿ-ի համակիրները, Լեւոն Տեր-Պետրոսյանի համախոհները։ Եւ հենց նրանց ցուցմունքների, ՀԱԿ-ի նամակ-տեղեկանքների վրա է հիմնականում կառուցված մեղադրանքները։ Դրանց թվին է դասվում նաեւ «Մարտի 1»-ի Հասարակական կազմակերպության համակարգող Առաքել Սեմիրջյանի ցուցմունքը։

Մասնավորաբար, Առաքել Սեմիրջյանը Հատուկ քննչական ծառայությունում որպես վկա հարցաքննվելով,   քննիչ Հր. Մուշեղյանին  տված իր ցուցմունքում անդրադառնալով գործում առկա  դրվագին, ըստ որի՝  օլիգարխների թիկնապահները զինվորական հանդերձանք են ստացել և մասնակցել մարտի 1-ի իրադարձություններին, հայտնել է.

-Բուն մարտի 1-ի գործով առկա տեսանյութերի ուսումնասիրությամբ ինձ հայտնի է դարձել, որ Մհեր Սեդրակյանի ավտոմեքենաները կայանված են եղել Հանրապետության Հրապարակում և նա գտնվել է Սերժ Սարգսյանի մոտ, ինչպես նաև՝ փաստահավաք խմբում աշխատելու ընթացքում հիշատակվում էր Մհեր Սեդրակյանի անունը՝ ՊՆ-ից զինվորական հագուստներ ստանալու և Էրեբունի թաղապետարանի դիմաց՝ նրան իսկ պատկանող բենզալցակայանում իր թիկնապահներին զինվորական շորերով հանդերձավորելու մասին: Որտեղ մանրամասն ներկայացվել են օլիգարխների թիկնապահների կողմից զինվորական հագուստներ ստանալու և զորքերի մեջ ներգրավվելու փաստերը: Այս հարցի հետ կապված՝ կարող եմ նշել նաև որ փաստահավաք խումբն Անդրանիկ Քոչարյանի գլխավորությամբ գնացել է այն զինվորական զորամասը, որտեղից ստացել են նշված զինվորական հագուստը, սակայն այդ զորամասում արհեստական խոչընդոտ են ստեղծել, որի արդյունքում փաստահավաք խումբը չի կարողացել ստուգել իր ունեցած տեղեկատվությունը:

Կապված այն խոսակցությունների հետ, թե ինչու այս խմբերի մեջ չի երևում Ռուբեն Հայրապետյանի անունը, իբր, նրա անունը ցուցակից հանել է փաստահավաք խմբի ՀԱԿ անդամ Անդրանիկ Քոչարյանը, լինելով վերջինիս ընկերը…

Նեմեց Ռուբոյից Քիթ Սամո, Զեյթունցի Քլոս ու հանցավոր աշխարհից՝  Կարոտիկ ու Կոնդիկ

Ըստ Ա. Սեմիրջյանի ցուցմունքի՝

«Անդրանիկ Քոչարյանը որևէ հնարավորություն չուներ ավելացնելու կամ պակասեցնելու ցուցակում նշված անձանց տվյալները: Ինձ հավաստի լուրեր են հասել փաստահավաք խմբից, որ Ռուբեն Հայրապետյանը գլուխ է գովացել, որ ինքը ավելի բարձր դիրքում է կանգնած Սերժ Սարգսյանի շրջապատում և իր անունը չէր էլ կարող լինել այդ ցուցակում: Սակայն նա ողջ ընթացքում եղել է կառավարության շենքում, որը կարելի է ապացուցել այդ օրը կառավարության շենքի տարածքը սպասարկող ռադիոծածկույթի ալեհավաքով, հեռախոսազանգերի տեղորոշմամբ:

Իսկ Ռուբեն Հայրապետյանի մասնակցությունը, ըստ նրա,  փաստվում է նաև այն դեպքով, որ նա զանգահարել է իր վաղամեռիկ ընկերոջը, Մասիվի ջոկատի տնօրեն Քիթ Սամոյի որդուն, նրան նույնպես հրավիրել է կառավարության շենք, որպեսզի նա հանցավոր հեղինակություններ Կարոտիկի և Կոնդիկի հետ հերթապահություններ իրականացնի Շահումյանի հրապարակում, որի համար էլ Ռուբեն Հայրապետյանից նեղացել էր իր մանկության ընկեր Զեյթունցի Քլոսը, որը բնակվում է ԱՄՆ-ում և նեղացել էր այն բանի համար, որ Նեմեց Ռուբոն իր վաղամեռիկ մանկության ընկերոջ որդուն օգտագործում էր քաղաքական նպատակներով:

Ինչ վերաբերվում է թիկնապահների տվյալներին, ապա նրանց անունները ես չգիտեմ…

Փոխարենը, պարզվում է՝ Սեմիրջյանը լավ գիտի, թե ինչու էր Գագիկ Ջահանգիրյանը այցելել գեներալ Մանվելին

Ճնշումների հետ կապված ինձ հայտնի է դարձել նաև , որ փետրվարի 23-ին, մինչև Ռոբերտ Քոչարյանի Մոսկվա մեկնելը շարժմանն էին միացել նաև երկրապահի քանի պատգամավորներ Սեյրան Սարոյանը, Յուվեցի Կարոն, Վեդի Ալկոյի Մանվելը, Աֆղանցիների Մխիկը, Հրանտ Գրիգորյանը, ևս մեկը, որի անունը չեմ հիշում, ինչպես նաև՝ ՊՆ 2 փոխնախարարներ՝ Մանվել Գրիգորյանն ու Գագիկ Մելքոնյանը, ովքեր սպառնալիքների ազդեցության տակ հրաժարվում էին շարժմանը միանալու իրենց ստորագրություններից :

Հարկ է նշել նաև, որ պարզելու համար, թե ինչու է Մանվել Գրիգորյանը հրաժարվել գալ Ազատության հրապարակ, Գագիկ Ջհանգիրյանը, որը լինելով զինվորական գլխավոր դատախազը, այդ օրերին հրաժարվել էր իր պաշտոնից և եկել էր Ազատության հրապարակ, գնացել էր Մանվել Գրիգորյանի տուն և այնտեղից վերադառնալու ճանապարհին, Արգավանդի խաչմերուկում , հարձակման է ենթարկվել, որի պատճառով էլ հրազենային վիրավորում է ստացել նրա եղբայրը՝ Վարդան Ջհանգիրյանը և այդ գործով հետագայում երկու եղբայրներն էլ կալանավորվել են:

Սեմիրջյանը չի մոռացել նաև Հովիկ Աբրահամյանին.

-Փաստահավաք խմբում աշխատելու ընթացքում ինձ  հայտնի է դարձել  Հովիկ Աբրահամյանի՝ այսպես կոչված՝ Մխչյանի մկների գործը,  որտեղ դատավճիռներով երևում ՝ արագացված կարգով ինչպես են պատիժների ենթարկվում և դատարանի դահլիճից ազատ արձակվում Ռոբերտո և Երևան Սիթի խանութների թալանի համար մեղադրված մի քանի մեղադրյալներ, ովքեր ըստ փաստահավաք խմբի և իրենց ցուցմունքների եղել են ՀՀԿ նախագահի թեկնածու Սերժ Սարգսյանի վստահված անձինք…

Բայց սա էլ ամբողջը չէ, Սեմիրջյանը հիշատակում է նաև Քեթրին տաքսին.

-Հիշեցի, ավելացնեմ նաև, որ իմ ունեցած տեսագրությունների ուսումնասիրություններով պարզել եմ, որն Մելիք-Ադանյան փողոցում, որտեղ այդ ժամանակ տեղակայված են եղել ՊՆ մեքենաներն ու զինվորները, կայանված է նրանց հարակից կայանված էր նաև Քեթրին գրառմամբ ավտոմեքենա, որից կարելի է ենթադրել, որ Միհրան Պողոսյանի ներկայացուցիչները նույնպես գտնվել են Մելիք Ադամյան փողոցում կամ կառավարության շենքում: Ավելացնելու բան չունեմ:

Քննիչ. Հարց-Դուք Ձեր ցուցմունքով հայտնեցիք 2008 թ. մարտի 1-ին նախորդած և հաջորդած օրերին Երևան քաղաքում տեղի ունեցած իրադարձությունների մասին տեղեկատվություն, որի մի մասը վերլուծական և ենթադրական բնույթ է կրում, տեղին է նշել, որ Դուք ցուցմունքով հաճախակի մեջբերել եք Յոթի գործ անվամբ քր.գործի նյութերը, իսկ մյուս մասով հայտնած տեղեկատվությունը ներկայացրել եք ըստ մեզ հասած տեղեկությունների, սակայն չներկայացնելով տեղեկատվության ստացման աղբյուրը, ուստի խնդրում եմ հայտնել, թե Ձեր կողմից նշված տեղեկատվությունների իսկությունը փաստելու համար ինչ փաստական հանգամանքներ կարող եք նշել կամ ներկայացնել քննությանը և տալ անձանց անուններ, ովքեր ձեր կողմից նշված իրադարձություններին ականատես կամ մասնակից են եղել կամ տիրապետում են տեղեկատվության:

Ա.Սեմիրջյան. Պատասխան-Ցուցմունքովս ես հայտնեցի այն ամենը, ինչ ինձ հայտնի է, տվեցի այն անձանց անունները, ովքեր մասնակցել կամ ականատես են եղել իրադարձություններին: Նշեցի նաև, որ քննությանը կներկայացնեմ նաև տեսաձայնագրություններ, որոնք կփաստեն իմ ասած խոսքերը:

Ճիշտ եք՝ ցուցմունքով  հայտնել եմ նաև ենթադրություններ, որոնք ձեզ համար պետք է վարկած լինեն դրանք ստուգելու համար: Նաև ցանկանում եմ ցուցմունքիս կցել Յոթի գործի հատորների իմ կողմից արված ուսումնասիրությունները և դուրսգրումները՝ տպագրված վիճակում, ընդամենը՝ 27 թերթ:

Գործող իշխանությունների առաջ մղած վարկածը հիմնավորող, բայց ենթադրությունների վրա կառուցված Սեմիրջյանի ցուցմունքի արժանահավատությունը գնահատելը դատարանի խնդիրն է եւ դատարանը կորոշի նա զրպարտել ու սուտ մատնություն է արել, թե ոչ։ Սակայն արձանագրենք, որ որոշ  հանգամանքների վերաբերյալ նրա հայտնած ցուցմունքները խեղաթյուրված են ներկայացնում փաստերը։ Օրինակ՝ նա նշել է, թե Ջհանգիրյան Գագիկը, լինելով զինվորական գլխավոր դատախազը, այդ օրերին հրաժարվել էր իր պաշտոնից և եկել էր Ազատության հրապարակ, իրականությանը չի համապատասխանում։ Նախ՝ 2008 թվականի փետրվարին նա այլեւս զինվորական դատախազ չէր, քանի որ այդ պաշտոնից ազատվել էր 2006 թվականի հունվարին։ Երկրորդ՝ Ջհանգիրյանը, լինելով իրավաբան եւ 2008 թվականի փետրվարին զբաղեցնելով գլխավոր դատախազի տեղակալի պաշտոնը, շտապել էր Օպերա՝ ելույթ ունենալու՝ խախտելով «Դատախազության մասին» ՀՀ օրենքը։ Նկատենք, որ օրենսդրությունը նաեւ 2008 թվականին արգելել  է  դատախազներին զբաղվել քաղաքականությամբ: Օրենքի 7-րդ հոդվածն ուղղակի սահմանում է. «Դատախազը չի կարող լինել որևէ կուսակցության անդամ կամ այլ կերպ զբաղվել քաղաքական գործունեությամբ: Դատախազը ցանկացած հանգամանքներում պարտավոր է դրuևորել քաղաքական զuպվածություն և չեզոքություն»:

Գագիկ Ջհանգիրյանը կոպտորեն խախտել  է օրենքի պահանջը, ուստիեւ  նա հեռացվել է դատախազության համակարգից։

Փաստերի նման ոչ ճիշտ ներկայացնելը արդեն իսկ կասկածի տակ են դնում նրա ցուցմունքների օբյեկտիվությունն ընդհանրապես։

Աղբյուր` Փաստինֆո