Փաստ ինֆո

Կինդեր-սյուրպրիզի նման հանրությանը հրամցված 71 հարկանի երկնաքերը , որին շահագրգիռ անձինք «Անմոռուկ» խորհրդանշական անունն են տվել,  այդպիսով փորձելով սփյուռքահայ շրջանակներին «էստի համեցեք» անել, սոցիալական ցանցերում և մամուլում արդեն իսկ հանրության կողմից բացասական մեկնաբանությունների է արժանանում:

Շատերին զարմացրել է հատկապես այն փաստը, որ տվյալ ծրագրի գլխին կանգնածը թավշյա պաշտոնյա  է՝ փոխվարչապետի խորհրդականը, որ ավելի վաղ՝ մի կարճ շրջան  քաղաքաշինության կոմիտեի ղեկավարը եղավ և քաղաքաշինական դաշտի կանոնակարգման վերաբերյալ շատ էր սիրում լուրջ-լուրջ խոսել :

Տպավորությունն այնպիսին է, որ վերջինս պաշտոնավարման շրջանն օգտագործել է՝ հեռահար նպատակներ ունենալով՝ իր իսկ ծրագրերի իրականացման համար պարարտ հող ստեղծելով: Ի դեպ, այսպիսով նոր իշխանությունները շատ հստակ բարձրաձայնում են, որ անցյալում իրենց պայքարը քաղաքաշինական ծրագրերը բացառապես մրցութային կարգով իրականացնելու համատեքստում՝ օդի փչոց են: Առայժմ մենք և՛ աղբահանության հետ կապված, և՛ կրթութա- մշակութային ծրագրերի և նույնիսկ նախընտրական մոնիտորինգների, բախվում ենք այն փաստին, որ դրանք կամ անմրցույթ են, կամ էլ՝ 5 րոպե առաջ ստեղծված  իշխանական վերնախավի մերձավորների ԱՁ-ների ու ՍՊԸ-ների հաղթական ավարտով:

«,Անմոռուկ» անունը կրող ծրագրի վերաբերյալ  սոցցանցերում տեղ գտած՝ երիտճարտարապետների թեժ արձագանքների էլ հանդիպեցինք, որոնց հեղինակները մի կողմից անմրցույթ ծրագրի փաստն են կարևորում, մյուս կողմից էլ՝ արդեն իսկ դժգոհություններ են հնչում, թե, եղբայր, այդ ո՞նց է, որ  մենք  22 հարկանի շենքի նախագիծ ենք ներկայացնում, քաղաքապետարանում այն դարձնում են 16, իսկ ձեզ 71 հարկի թույլտվություն են տվել: Նկատենք, որ այս առումով փոխվարչապետի խորհրդականի  պատճառաբանությունը, թե՝ մերը կենտրոնում չի, համոզիչ չի հնչում ոչ միայն նրա համար, որ սույն հարցը բարձրացնող ֆբ. օգտատերը շեշտում է, թե՝ իրենցն էլ կենտրոնից դուրս է: Նախ՝ փաստենք, որ  Իսակովի պողոտայի մի զգալի հատվածը Կենտրոն վարչական տարածքում է գտնվում:

Սակայն,  տպավորությունն այնպիսին է, որ դեռ տարածքի հարցն էլ ճշտված չէ, քանի որ Երևանի քաղաքապետարանը հայտարարել է, թե նման երկնաքերի հարց քաղաքապետարանում չի քննարկվել: Այսինքն, ի՞նչ է ստացվում՝ պատասխանատու պաշտոնյան հայտարարում է Երևանում կառուցվելիք մի ծրագրի  մասին, որի շուրջ ոչ Երևանի քաղաքապետարանում, ոչ մասնագիտական շրջանակներում քննարկում չի եղել: Բնականաբար,  այն հանրային քննարկման փուլ էլ դեռ չի հասել, ինչը նշանակում է մենք խոսում ենք  բանի մասին, որն ընդամենը արաբական աշխարհի ինչ-որ ընկերություն և հայաստանյան ինչ-որ անհատներ կամ՝ ճարտարապետական  արվեստանոց ներփակ պայմանավորվել ու որոշել են:

ՈՒ դեռ առվին չհասած՝ բոբիկացել են՝ փորձելով  զարմացնել երկնաքեր չտեսած երևանցիներին: Հարգելիներս, Երևանում  նման քամիներ եկել են ու անցել՝ կինո Մոսկվային հարակից տարածքում  պարսկական երկնաքերի տեսքով, երիտասարդական պալատի տեղում՝ յոթերորդ հրաշալիքի տեսքով, ուր դարձյալ բարձրության վրա էր շեշտադրումը… Հիմա էլ՝ արաբական ներդրումներով երկնաքեր:

Սա Երևանն է, Դուբայը չէ, Իսակովի փողոցն էլ արվարձան չէ: Նախագիծն էլ ինչ-որ  զիլ  բան չէ, ավելի շատ երկար բունկեր է հիշեցնում…

ՈՒ այսօր   սփյուռքահայ գնորդին չես զարմացնի բովանդակությունից զուրկ ձևականացումներով՝  այդ փուլն այլևս   անախրոնիզմ է:

Հեղինակ` Մարինե Մինասյան