Փաստ ինֆո

Նոյեմբերյանի ավտոկայանի սպասասրահը պետք է լինի հանրային։ «Քաղաքացիական պայմանագիր» կուսակցության անդամ Սուրեն Անանյանը ցանկանում է 3 ամիս առաջ վարձակալության հանձնված Նոյեմբերյանի ավտոկայանի սպասասրահը վերադարձնել համայնքին։ «Փաստինֆո»-ի հետ զրույցում նա հավատացրեց, թե իրեն չի կաշկանդելու այն հանգամանքը, որ 24 քմ կազմող այդ տարածքը վարձակալության է տրվել իր կուսակից, Նոյեմբերյանի բժշկական կենտրոնի աշխատակազմի ղեկավար Հայկանուշ Բեգլարյանին։

«Արդեն մոտ 2 ամիս է, ինչ խնդիրը առկա է, ուղարկվել է առցանց բողոք կառավարություն, վարձակալության պայմանագրին և պայմաններին մինչ օրս ծանոթ չենք: Ըստ մեր տեղեկությունների՝ տարածքում լինելու է խանութ, այս պահին մենք նկատում ենք, որ վարձակալը կահավորում է տարածքը, հեռացվել է ավտոկայանի նշանը։ Հեռախոսազրույց ենք ունեցել Աշոտ Մնացականյանին հետ, նա խոստացավ, որ գոնե սպասասրահի հարցը կլուծվի, բայց 1 ամիսը անցավ, և որևէ դրական լուծում դեռ չկա»։

Հայավտոկայան ՓԲԸ-ի գլխավոր տնօրեն Աշոտ Մնացականյանը «Փաստինֆո»-ի հետ զրույցում ասաց, որ վարձակալի հետ փորձում են համաձայնության գալ, որ վարձակալված տարածքի մի մասը շարունակի ծառայել որպես սպասասրահ.

«Մենք վարձակալի հետ, կարծես թե, կոնսենսուսի ենք եկել, շուտով մի մասը, ամենայն հավանականությամբ, կդառնա սպասասրահ, չնայած մեր ամենօրյա մոնիթորինգի արդյունքները ցույց են տալիս, որ այդտեղ ոչ ոք տրանսպորտի չի սպասում»։

Աշոտ Մնացականյանի խոսքով Նոյեմբերյանի ավտոկայանը չի գործում, երթուղիների սեփականատերերը իրենց հետ պայմանագիր չեն կնքում, իրենք էլ ստիպված են լինում շենքի գույքահարկը և հողի հարկը վճարելու համար տարածքները վարձով տալ։

«Վարձակալությամբ տրվել է լրիվ օրինական ճանապարհով, դա մեկ, և երկրորդը ավտոկայանում մեզ հետ պայմանագիր կապած ուղևորափոխադրող չունենք, որպեսզի սպասարկենք իրենց: Որպես ավտոկայան չի ծառայում, իսկ մենք այդ շենքի համար գույքահարկ և հողի հարկ ենք վճարում, այսինքն եթե շենքը չտանք վարձակալության , ըստ էության, այն մեզ միայն վնաս կհասցնի, իսկ մենք շահույթ հետապնդող առևտրային կազմակերպություն ենք»:

ՔՊ-ական Սուրեն Անանյանը կարծում է, որ պայմանագրերի մասին խոսակցություններն ուղղակի արդարացումներ են, իսկ ուղևորներ այդտեղ միշտ էլ լինում են։
«Արդարանալ, որ երթուղիները պայմանագիր չունեն, ճիշտ չէ, ժողովուրդը տարիներ շարունակ օգտվել է այդ երթուղիներից, եթե անօրինական են, դա այդ կազմակերպության տնօրենի հարցն է, կարծում եմ, որ իրենց ոչ դրական կառավարումից չպետք է տուժի ժողովուրդը։ Իսկ ուղևորներ սպասասրահում լինում են, կարծում եմ՝ Աշոտ Մնացականյանը տեղյակ չէ, որ կան գյուղեր սպասարկող երթուղիներ (Կոթի, Բերդավան, Կողբ և այլն)»։
Սուրեն Անանյանն ասում է՝ կսպասենք ևս մի քանի օր, և եթե շուտափույթ այս հարցը չլուծվի կվերսկսենք բողոքի ակցիաները։

«Մենք բազմաթիվ ակցիաներ ենք իրականացրել՝ ի նշան բողոքի, և աննահանջ ենք լինելու մեր գործում, քանի որ մեզ համար հանրային շահը գերակա է։ Մենք մեր պայքարը շարունակելու ենք բացառապես օրենքի դաշտում»։
Մեր հարցին, թե Նոյեմբերյանի ուևորափոխադրողների հետ պայմանագիր լինելու դեպքում հնարավոր է, որ տարածքը վերադառնա իր նախկին կարգավիճակին, Հայավտոկայան ՓԲԸ-ի գլխավոր տնօրեն Աշոտ Մնացականյանը պատասխանեց, որ մեր նշած պարագայում դա ոչ թե հնարավոր է, այլ արդեն պարտադիր պայման է: Ասում է՝ օրերս գրություն պետք է ուղարկեն Քաղաքաշինության, հրդեհային անվտանգության տեսչական մարմին՝ խնդրի կարգավորմանը նպաստելու համար:

Հեղինակ` Անահիտ Հովհաննիսյան