Փաստ ինֆո

Պահանջում եմ, որ այս խիստ կարևոր, պետական, բնապահպանական, համազգային հնչեղություն ստացած հարցը որոշվի հանրաքվեով։ Դա կլինի Ձեր հռչակած ուղիղ ժողովրդավարության սկզբունքներին համապատասխան քայլ։ Այս մասին ֆեյսբուքյան իր էջում է գրել լուսանկարիչ Էդգար Հարությունյանը։ Նա, անդրադառնալով Ամուլսարի հարցին, դիմել է վարչապետ Նիկոլ Փաշինյանին.

«ԱՄՈՒԼՍԱՐԸ ՀԱՆՔ ՉԻ ԴԱՌՆԱԼՈՒ, ՊԱՐՈ՛Ն ՎԱՐՉԱՊԵՏ

Հասկանալով հանդերձ, որ Ամուլսարը նախորդներից ժառանգություն մնացած խնդիր է, որը ի զորու չեք լուծելու կամ էլ կաշկանդող հանգամանքներ կան, որ լայն հասարակության համար տեսանելի չեն, պնդում եմ, որ Ամուլսարը հանք չի դառնալու։

Պարո՛ն վարչապետ, դիտեցի Ձեր երկար ու ձիգ ուղիղ եթերը․ թաքուն համոզմունք եմ հայտնում, որ շատ-շատ բաներ չուզենալով կամ ոչ այնքան սրտանց ասացիք, քանի որ, ըստ օդում կախված լուրերի, Ամուլսարի հետևում կանգնած են անգլիական հանքահեններն արքայազն Չարլզի և Հայաստանում անգլիական թագուհու դեր խաղացող կոնկրետ անձնավորության հովանավորությամբ։ Եվ հասկանալով, ընդունելով, որ Ձեր ռեսուրսները միգուցե չեն բավարարում այդ ամեհի ուժերի դեմ պայքար մղելու, ինչպես նաև համարելով, որ Դուք դեռևս հավատարիմ եք մնում 2018 թ․ ապրիլ-մայիս ամիսների հեղափոխության սկզբունքներին, ՊԱՀԱՆՋՈՒՄ ԵՄ (ու ոչ միայն ես), որ այս խիստ կարևոր, պետական, բնապահպանական, համազգային հնչեղություն ստացած հարցը որոշվի ՀԱՆՐԱՔՎԵով։

Դա կլինի Ձեր հռչակած ուղիղ ժողովրդավարության սկզբունքներին համապատասխան քայլ։

Եթե հանրաքվե չլինի, ապա, համոզված եղեք, սկզբում՝ տասնյակ, քիչ անց՝ հարյուրավոր ու հազարավոր քաղաքացիներով, բանուգործ թողած, Ամուլսարում վրան կխփենք ու կմնանք այնքան ժամանակ, քանի դեռ Ձեր շուրթերից չի հնչել սույն գրառման վերնագիրը՝ ԱՄՈՒԼՍԱՐԸ ՀԱՆՔ ՉԻ ԴԱՌՆԱԼՈւ։ Հավատացնում եմ, որ դրա համար կան բավարար քաղաքացիական կամք ու հնարավորություններ։ Մարտի 1-ի 10 սպանությունների բացահայտման համար մեկ տասնամյակ կռիվ տվող վարչապետը հո՞ չի կարող 1000 մարդ գնդակահարել։ Գուցե մասշտաբները տարբեր են, բայց 2011 թվականին նման միջոցներով մի քանի տասնյակ բնապահպաններով փրկեցինք Թռչկանի ջրվեժը։ Կրկնում եմ, գիտեմ, որ մասշտաբները տարբեր են, բայց դրանից հարցի էությունը չի փոխվում։

Պարո՛ն վարչապետ, գուցե այս տարբերակը Ձեզ համար նույնպես լավագույն լուծումը լինի։

Հիմա կհայտնվեն մարդիկ, որ կասեն՝ 1000 մարդ չի գնա ու չի պայքարի Ամուլսարի համար։ Ես կպնդեմ հակառակը․ ի տարբերություն մինչ այսօր տեղի ունեցած բնապահպանական շարժումների՝ (Թեղուտ, Թռչկան և այլն), Ամուլսարի հարցը վերաբերում է Հայաստանի գրեթե յուրաքանչյուր քաղաքացու, քանի որ վտանգի գոտում Սևանա լիճն է։ Իսկ ո՞վ է այն քաղաքացին, որ գեթ մեկ անգամ չի լողացել կամ չի ցանկանում լողալ Սևանա լճում։

Պարո՛ն Փաշինյան, ասելիք շատ կա, բայց թերևս այսքանը․ որոշե՛ք՝ կամ վերջնականապես ոչնչացնում եք արդեն իսկ անկում ապրող Ձեր ու Ձեր քաղաքական թիմի վարկանիշը կամ էլ անում եք ճիշտ հակառակը՝ սրընթաց կերպով բարձրացնում եք այն՝ որոշում կայացնելով հօգուտ բնության ու, ըստ այդմ, պետության, և մեկ անգամ ևս ապացուցում եք, որ անցյալ տարվա գարնանային իրադարձություններն իզուր չէին։

Հարգանքներով՝ ՀՀ քաղաքացի Էդգար Հարությունյան»,-գրել է լուսանկարիչը։ 

Աղբյուր` Փաստինֆո