Փաստ ինֆո

ԱԺ ‹‹Իմ քայլը›› խմբակցության պատգամավոր Նիկոլայ Բաղդասարյանը «Սահմանադրական դատարանի մասին» և «Դատական օրենսգիրք» սահմանադրական օրենքներում փոփոխություններ կատարելու նախագծերում խնդրահարույց կետեր է տեսնում:

Հիշեցնենք, որ Արդարադատության նախարարությունը հանրային քննարկման է ներկայացրել օրենսդրական փաթեթ, որով նախատեսվում է փոփոխություններ կատարել նաեւ «Սահմանադրական դատարանի մասին» և «Դատական օրենսգիրք» սահմանադրական օրենքներում:
Պարզվում է նախքան հանրային քննարկման ներկայացանելը դրան ոչ միայն ընդդիմադիր պատգամավորները տեղյակ չեն եղել, այլ նաեւ իշխող քաղաքական ուժը ներկայացնող պատգամավորների համար պարունակում են մի շարք անսպասելի ներածություններ։

‹‹Փաստինֆո››-ի հետ զրույցում Նիկոլայ Բաղդասարյանն ասաց, որ ինքը դեմ է մարգինալ փոփոխություններին և գտնում է, որ պետք է համակարգային փոփոխություններ տեղի ունենան:
‹‹Ես ԱԺ-ում ներկայացրել եմ իմ մոտեցումը, որ և՛ տարիքային ցենզի հետ կապված խնդիրը, և՛ աշխատանքային ցենզի հետ կապված խնդիրը պետք է լինեն միասնական: Օրինակ՝ անձը 25 տարեկանից կարող է դառնալ պատգամավոր, ընդունենք, որ առաջին ատյանի դատարանի դատավորն էլ կարող է պայմանականորեն նշանակվել 25-ից, Վերաքննիչի՝ 27-ից, Վճռաբեկի՝ 30-ից, այսինքն` տրամաբանությունը պետք է աճողական լինի, և աշխատանքային ցենզն էլ պետք է աճողական լինի››,-ասաց Բաղդասարայնն ու ավելացրեց, որ իր կողմից ներկայացված տրամաբանությունը կյանքի կոչելու համար պետք է հայեցակարգային մոտեցում լինի կամ քաղաքական ուժերի համաձայնությամբ ստեղծվի փաստաթուղթ, բոլոր օրենքում այդ փոփոխություններն արվի:

Դիտարկմանը, այդ փոփոխության համաձայն` օգոստոսի 1-ից հոկտեմբերի 31-ը հրաժարական ներկայացրած ՍԴ դատավորները մինչև իրենց պաշտոնավարման տարիքը լրանալը պահպանելու են իրենց հրաժարականի պահին ունեցած աշխատավարձը, դա պարտադրանք, շահավետ գործարքի առաջարկ չէ՞ դատավորների համար, որպեսզի հրաժարական տան, Բաղդասարյանը պատասխանեց, որ առաջարկվող այդ փոփոխությանը ծանոթ չէ, քանի որ նախագծի վերջնական տարբերակը չի ուսումնասիրել:

‹‹Ես վերջնական տարբերակը չեմ տեսել, իմ նայած տարբերակում նման բան չի եղել։ Մեզ նախագծերը տրվել են, մենք դրանց ծանոթացել ենք, բայց ինչպես հասկանում եմ շատ բաներ կան, որ ամփոփելով այդ փաստաթուղթը լրացվել է: Չեմ կարող հստակ հիշել՝ մեզ տրված նախագծում ՍԴ դատավորների հետ կապված կետը կար, թե՞ ոչ, բավական մեծ փաթեթ էր, ես չեմ հիշում, որ նման բան լինի››,-նշեց ԱԺ ‹‹Իմ քայլը›› խմբակցության պատգամավորը:

Նախագծում առկա մեկ այլ կետով առաջարկվում է, որ քաղհասարակության ներկայացուցիչները եւս ներգրավվեն դատավորների էթիկայի եւ կարգապահական հանձնաժողովի կազմում։ Ովքեր եւ ինչպես՝ Բաղդասարյանը չի հասկանում՝ ինչ տրամաբանությամբ են ընտրվելու այդ քաղհասարակության ներկայացուցիչները, որպեսզի կախում չունենան դատական համակարգից ու չսերտանան պետական մարմինների հետ.
‹‹Օրենքի նախագծում ես նշումներ եմ կատարել, որ ինձ համար անհասկանալի է այդ ընտրության սկզբունքը, որովհետև նախորդ իշխանության ժամանակ մենք պետական մարմիններ ունեինք, որ հենց քաղհասարակության ներկայացուցիչներից էին բաղկացած, սակայն ոչ մի դերակատարում չէին ունենում որոշումների վրա և այնպես էր իրականացված, որ այդ մարդիկ որոշակի կախում ունեին հենց այդ կազմակերպությունից: Հետևաբար` իրենք ձևական բնույթ էին կրում››:

Մեր այն նկատառմանը, որ փաստորեն, պատգամավորը եւս խնդրահարույց կետեր է տեսնում կառավարության մշակած օրենսդրական փաթեթում՝ Ն.Բաղդասարյանն արձագանքեց. «Չկա այդպիսի նախագիծ, որտեղ խնդրահարույց կետեր չկան։ Ես ԱԺ-ում աշխատում եմ 6 ամիս, 6 ամսվա ընթացքում ներկայացվել են բազմաթիվ նախագծեր, այդպիսի նախագիծ չկա, որում խնդրահարույց բաներ չկան, դա շատ նորմալ է, ես էլ եմ օրենքի նախագծեր հեղինակել և կառավարության քննարկումների ժամանակ հասկացել, որ իրոք շտկելու խնդիր կա»։

Հեղինակ` Սոնա Գևորգյան