Փաստ ինֆո

BBC փաստացի որևէ փաստաթուղթ չի ներկայացնում։ Այս մասին լրագրողների հետ զրույցում ասաց փոխվարչապետ Տիգրան Ավինյանը։

«BBC-ն հղում է անում այն տվյալներին, որը ենթադրաբար ստացել է ՀՔԾ-ից, բայց թե որքանով է դա իրականությանը համապատասխանում, չեմ կարող մեկնաբանել», - ասաց Տիգրան Ավինյանը։

Հիշեցնենք, որ BBC ռուսական ծառայությունում օգոստոսի 7-ին հրապարակվել էր հոդված, որում նշվել էր, որ արցախյան ուժայիններն են 2008թ.-ի մարտի 1-ին ցուցարարների ուղղությամբ կրակել։ Ըստ հոդվածի՝ նախագահականում գործել է գաղտնի շտաբ, որը ֆինանսավորել են Գագիկ Ծառուկյանը և Սամվել Ալեքսանյանը։

Ավելի վաղ «Փաստինֆո»-ին ՀՔԾ լրատվական բաժնից հայտնել էին , որ BBC ռուսական ծառայությանը «Մարտի 1»-ի գործով որևէ տեղեկատվություն չի տրամադրվել։ «2019թ. հուլիսի 4-ին նրանք հարցում էին ուղարկել ՀՔԾ՝ «Մարտի 1»-ի գործով որոշ տեղեկություններ ճշտելու նպատակով, սակայն 2019թ. հուլիսի 9-ին ՀՔԾ-ից նրանց պատասխանել են, որ այդ հարցերի վերաբերյալ որևէ տեղեկություն չի կարող տրամադրվել՝ ելնելով նախաքննության շահերից», - ասել էին ՀՔԾ լրատվական բաժնից։

Իսկ գլխավոր դատախազությունն էլ հայտարարել էր, որ նման տեղեկություններ նախաքննական մարմինկ չունի։ «2008թ. մարտի 1-ին և 2-ին Երևան քաղաքում տեղի ունեցած իրադարձությունների դեպքերի առթիվ ՀՀ հատուկ քննչական ծառայությունում քննվող քրեական գործով կոնկրետ հրապարակման մեջ նշվող հանգամանքների վերաբերյալ ապացույցների բավարար համակցություն ունենալու դեպքում կկայացվեին դրանից բխող համապատասխան դատավարական որոշումներ, կհարուցվեր քրեական հետապնդում, որոնց վերաբերյալ կապահովվեր պատշաճ իրազեկում»,- ասել է գլխավոր դատախազի խորհրդական Գոռ Աբրահամյանը։

Աղբյուր` Փաստինֆո