Փաստ ինֆո

«Դատավոր Դավիթ Գրիգորյանի նկատմամբ իրականացվող քրեական հետապնդումը եւս մեկ անգամ վերահաստատեց այն փաստը, որ վերջինս գործել է բացառապես օրենքով»,- «Փաստինֆո»-ի հետ զրույցում այս կարծիքը հայտնեց փաստաբան Էրիկ Ալեքսանյանը. «Անկախ նրանից, թե մեր գործը ում կմակագրվի, մենք չենք ունենալու օրինական դատարան, քանի որ Գրիգորյանին, այսպես ասած, վարույթից հեռացնելը եղել է մեղմ ասած անօրինական»,-ասաց նա։

Հիշեցնենք, որ Դավիթ Գրիգորյանն այն դատավորն է, որը մայիսի 18-ի որոշմամբ  ՀՀ երկրորդ նախագահ Ռոբերտ Քոչարյանի նկատմամբ որպես խափանման միջոց էր ընտրել անձնական երաշխավորությունը, որպիսի միջնորդությամբ  դատարանում հանդես էին եկել Արցախի գործող եւ նախկին նախագահները, իսկ մայիսի 20-ին որոշում էր կայացրել նաեւ քրեական գործի վարույթը կասեցնելու եւ ՍԴ դիմելու մասին։ Հետագայում հայտնի դարձավ, որ դատավորի նշված որոշումներից հետո Դատախազությունը քրեական գործ է հարուցել՝ դատավորի մասնակցությամբ մեկ այլ քրեական գործով պաշտոնեական կեղծիք կատարելու հատկանիշներով, որով ավելի վաղ՝ 2018 թվականի փետրվարին,  կայացվել էր քրեական գործի հարուցումը մերժելու մասին որոշում։ Ավելի ուշ դատավորի լիազորությունները դադարեցվեցին, եւ նրան մեղադրանք առաջադրվեց ՀՀ ՔՕ-ի 314-րդ հոդվածի 1-ին մասով՝ պաշտոնեական կեղծիք կատարելու համար։

«Փաստինֆո»-ի հետ զրույցում Էրիկ Ալեքսանյանն ասաց, որ ստեղծվել է մի իրավիճակ, որը չի կարող ունենալ ոչ մի խելամիտ արդարացում. «Այն, ինչ կատարվում է, մասնավորապես՝ դատավոր Դավիթ Գրիգորյանի նկատմամբ ապօրինի հարուցված քրեական հետապնդումը, արդեն դուրս է առողջ իրականությունից։ Եթե նրա նկատմամբ նման ապօրինի հետապնդում են իրականացնում, նշանակում է, որ իշխանությունները ցանկանում են, որ գործը քննվի այնպիսի դատավորի կողմից, ով փաստացի իրենց ուզածն է անելու, ինչն էլ նշանակում է, որ մենք չենք ունենալու օրինական դատարան, հետեւաբար՝ անվստահություն ենք հայտնում այն ամենի նկատմամբ, ինչ իրականացվում է»։

Փաստաբանի խոսքով՝ Քրեական դատավարության օրենսգրքով սահմանված չէ նորմ, որը կնախատեսի դատավորի լիազորությունների  դադարեցումից հետո վարույթի իրականացման կարգը. «Կարծում եմ՝ այստեղ պետք է անալոգիա անել քրեական դատավարության այն նորմի վրա, որը սահմանում է, թե ինչպես է վարույթի կարգը իրականացվում դատավորի կողմից ինքնաբացարկ հայտնելու դեպքում, բայց այդ նորմը ուսումնասիրելով՝ նկատում ենք, որ այդտեղ եւս առկա չէ գործի փոխանցման եւ նոր դատավորի կողմից գործը վարույթ ընդունելու ժամկետներ»։

Էրիկ Ալեքսանյանի կարծիքով՝ անկախ նրանից, որ քրեադատավարական օրենքը հստակ ժամկետներ չի սահմանում, պետք է ղեկավարվել Մարդու իրավունքների եվրոպական կոնվենցիայի 6-րդ հոդվածով, որի բաղադրատարր է հանդիսանում անձի՝ ողջամիտ ժամկետում գործի քննության իրավունքի իրականացումը։

Հեղինակ` Միլենա Խաչիկյան