Փաստ ինֆո

«Իրատեսական ծրագրերը մեզ այլեւս հետաքրքիր չեն։ Այն, ինչ հնարավոր է իրականացնել, մեզ այլեւս հետաքրքիր չէ։ Մեզ հետաքրքիր է այն, ինչի իրականացումը բոլորը համարում են անհնար, որովհետեւ հայ ժողովուրդն անհնարինն իրականացնող ժողովուրդ է»-երեկ Ստեփանակերտի Վերածննդի հրապարակում այս հայտարարությունն անող ՀՀ վարչապետ Նիկոլ Փաշինյանն առայսօր կյանքի կոչված որևէ իրատեսական ծրագիր չի նշում, քանի որ դրանցից յուրաքանչյուրը ենթադրում է կոնկրետություն՝ նախահաշիվ, ֆինանսավորում, արդյունքներ և այլն:

Իսկ անհնարին համարվող ծրագրերի վերաբերյալ ոչ մի հաշվարկ չկա, ուստի նման ծրագրեր Փաշինյանը ոտքի վրա էլ կարող է հղանալ: Ասենք՝ մինչև 2050 թվականը ՀՀ բնակչության թիվը 5 միլիոնի հասցնելու ծրագիրն ինչ վատ ծրագիր է: Թե ինչի հաշվին, բնականաբար, կարիք էլ չկա բարձրաձայնելու: Նման ծրագրեր՝ ներդրումային բում, ներգաղթի բում, ծնունդների բում և այլն անցած մեկ տարվա ընթացքում հայտարարվել են, սակայն դրանցից ոչ մեկը դեռ չի իրականացել:

Բայց դե, անհնարին համարվող առնվազն մեկ իրականացված ծրագիր Նիկոլ Փաշինյանը միշտ ունի, որի մասին միշտ և ամենուր պատմում է, անգամ՝ հուղարկավորությունների և հոգեհանգստյան արարողությունների ժամանակ:

Իսկ իրատեսական ծրագրեր, որ արդյունք են տվել, ըստ էության, չկան: Հետաքրքիր է, ո՞րն է այն իրատեսական ծրագիրը, որն սկսվել և ավարտին է հասցվել իր պաշտոնավարման ժամանակ, կամ՝ սկսվել և ընթացքի մեջ է։

Հեղինակ` Ա. Ե.