Փաստ ինֆո

Երևանի ընդհանուր իրավասության դատարանի Կենտրոն և Նորք Մարաշ նստավայրում դատավոր Տաթևիկ Գրիգորյանի նախագահությամբ շարունակվում է կաշառքի մեջ մեղադրվող դատավոր Գագիկ Հեբոյանի և փաստաբան Վահագն Դանիելյանի գործով դատական նիստը։

Գագիկ Հեբոյանը բերվել է դատարան։ Դատական նիստին ներկա է նաեւ գործով մյուս մեղադրյալ Վահագն Դանիելյանը։ Ներկա են պաշտպաններ Արմեն Նադիրյանը, Արմեն Անտոնյանը, Ներսես Հարությունյանը, Գագիկ Մայիլյանը, Արմեն Մաիլյանը, Գուրգեն Գրիգորյանը եւ Հենրիկ Մաղաքյանը։ Մեղադրանքը պաշտպանող դատախազն է Արմեն Չախոյանը։

Նախորդ դատական նիստին ավարտվեց վկաների հարցաքննության փուլը։ Այսօր ցուցմունք տվեց ամբաստանյալ դատավորը՝ Գագիկ Հեբոյանը։

«Փաստինֆո»-ի հաղորդմամբ՝ Գագիկ Հեբոյանը դատարանի դահլիճում հայտարարեց, որ առաջադրված մեղադրանքում իրեն մեղավոր չի համարում, որովհետեւ ըստ իրեն՝ դա անհիմն է եւ իրականության հետ որեւէ կապ չունի։ Նա պատմեց, որ Վահագն Դանիելյանին ճանաչում է 2010-12 թվականներից եւ ունեցել են նորմալ աշխատանքային հարաբերություններ․ «Շաբաթը 2-3 անգամ նիստի է եղել ինձ մոտ, զուտ մարդկային, նորմալ հարաբերություններ են եղել, հայրը մահացել է՝ ներկա եմ եղել, իմ հիսուն ամյակին նա է ներկա եղել։ Չեմ ասի, թե օրվա ընկեր ենք եղել, բայց նորմալ մարդկային հարաբերություններ են եղել»։

Ինչ վերաբերում է գործով առանցքային վկա Բենիկ Հարությունյանին, Գագիկ Հեբոյանի խոսքով՝ ինքը Բենիկ Հարությունյանին ճանաչում է 2013 թվականից, երբ ի վնաս Բենիկ Հարությունյանի վճիռ է կայացրել, որով, ըստ վերջինիս, ինքը զրկվել է ժառանգությունից, եւ վեճը լուծվել է Հարությունյանի եղբոր օգտին․ «Այդ ժամանակ նա իմ դեմ բողոք ներկայացրեց, եւ կայծակնային արագությամբ Արդարադատության խորհուրդը ինձ տույժի ենթարկեց, սակայն վերաքննության եւ վճռաբեկության կարգով բղոքը քննվեց, բայց որեէ բան իմ վճռում չփոխվեց»։

Հեբոյանի խոսքով՝ Հարությունյանի վերաբերյալ եւս երեք գործ է ունեցել․ երկուսով հայցը մերժվել է, մեկով՝ կարճվել, որովհետեւ նա հրաժարվել է իր հայցից։ Ինչ վերաբերում է այս հայցին, այն ստացել է ապրիլ ամսին․«Բենիկ Հարությունյանը նշեց, որ ամսի 2-ին ինձ մոտեցել է դահլիճում, ասել է, որ ինձ հետ խոսել է, խնդրել է, որ պետտուրքից ազատեմ, ես էլ օրենքը նայել եմ, հոդվածը ասել եմ, բայց նման բան չի եղել։ Ես երբեք պետտուրքի մասին օրենք չեմ ունեցել սեղանիս, դրա կարիքը չի եղել, դրան դատավոըները շատ հազվադեպ են անդրադառնում։ Ես չգիտեմ՝ խուզարկությամբ սեղանիս ինչ են հայտնաբերել, բայց չկա տենց բան, չի եղել»։

Հեբոյանի խոսքով՝ հայցային վաղեմություն կիրառելու միջնորդություն է ներկայացվել, եւ ինքն ընդմիջել է դատական նիստը, քանի որ փաստաբաններից մեկը ասել է, որ սխալ թղթապանակ է վերցրել․ «40 րոպե ընդմիջել եմ, բերել են միջնորդությունը, քննարկել ենք, ամսի 4-ին հենց դատաքննությունն ավարտվել է եւ ամսի 18-ին նշանակել եմ վճռի հրապարակման օր»։

Հեբոյանը նշեց, որ Բենիկ Հարությունյանն ամսի 16-ին բերել է ինչ-որ փաստաթղթեր, որոնք ինքը չի նայել, որովհետեւ հարցն արդեն լուծած է եղել․ «Ամսի 6-ից հետո ես նրան չեմ տեսել, ամսի 18-ին վճռի հրապարակում եմ նշանակել, բայց չեմ հասցրել․ դատարանների ծանրաբեռնվածությունը գիտեք․ օր է եղել՝ 40 նիստ եմ ունեցել, օրը խախտել եմ, չեմ հասցրել։ Իջել եմ դահլիճ, մարդիկ են եղել կանգնած, անկեղծ չեմ հիշում՝ նրան տեսել եմ թե չէ, գուցե այնտեղ է եղել, ասել եմ՝ վաղը 16։00-ին կլինի»։

Հեբոյանի խոսքով՝ հաջորդ օրը՝ վճիռները գրասենյակ իջեցնելուց հետո, երբ դուրս է եկել ու քայլել դահլիճ, Բենիկ Հարությունյանն իր հետեւից եկել է․ «Հետեւիցս հասել է, ասել է, որ իրավաբանական խորհրդակցութան կարիք ունի։ Ես էլ ասել եմ՝ դատավորը խորհրդակցություն չի տալիս,  գնա Վահագի մոտ, խորհրդակցությունը ստացի։ Ես այդ մարդուց զզվել եմ, հավատացնում եմ՝ եթե ինքնաթիռով միասին թռչելիս լինենք, տոմսը հետ կտամ։ Եղվարդի քննիչները նրա գերին են, ես հո խելագար չեմ, որ նրա հետ բան խոսեմ, հետը գործ բռնեմ»։

Հեբոյանի պնդմամբ՝ իր եւ Բենիկ Հարությունյանի խոսակցությունը՝ դատական նիստերից դուրս, այդքանով սահմանափակվել է։

Ինչ վերաբերում է Վահագն Դանիելյանին, Գագիկ Հեբոյանը նշեց, որ Ամանորից առաջ ինքը նրան պարտքով 3000 ԱՄՆ դոլար գումար է տվել՝ առանց հետաքրքրվելու, թե ինչի համար․ «Գնացի տուն, տղաս ասաց, որ ավտոմեքենայի գույքահարկի հետ կապված հաղորդագրություն է ստացել, մտածեցի՝ գնամ, Վահագից էդ գումարը վերցնեմ, համ էրեխու գումարը կմուծեմ, համ էլ ես էլ էի պարտք, պարտքս կտայի։ Ադպես գնացի Վահագենց տուն, ձայն տվեցի, տղան դուրս եկավ, կանչեց հորը, նա էլ եկավ, մեքենայի միջից գումարը հանեց, տվեց, դրեցի գրպանս»։

Նշենք, որ նախորդ դատական նիստին՝ Վահագն Դանիելյան հարցաքննության ժամանակ, վերջինս ժխտել է այն հանգամանքը, թե ինքը Հեբոյանից պարտքով գումար է վերցրած եղել։ Դատարանում ցուցմունք տալիս Գագիկ Հեբոյանը ասաց, որ երբ նախաքննական փուլում է նա այդպիսի բան ասել, դա հասկանալի է եղել․ «Այդ ժամանակ Վահագը խափանման միջոցը փոխելու խնդիր է ունեցել, բայց թե ինչու դատարանում էլ նա դա պնդեց, ինձ համար անհասկանալի էր»։

Գագիկ Հեբոյանը պնդեց՝ 2013 թվականից հետո Բենիկ Հարությունյանի ողջ տրամաբանությունն աշխատել է իրեն պատժելու համար․ «Ինձ մոտ տպավորությու ն է, թե էս մարդը ընկած է եղել իմ հետեւից, թե չէ նրա ներկայացրած հայցերը հիմարություններ էին, դրանք ներկայացնելու կարիք չկար, ասենք, մեկ այլ դատավորի՝ օրինական ուժի մեջ մտած դատական ակտը բերել, ինձ մոտ վիճարկել է։ Էս մարդու նպատակն ու երազանքը եղել է իմ գլխին բան սարքելը, թե ինչքանով է ստացվել, չգիտեմ»։

Գագիկ Հեբոյանի հարցաքննությունից հետո մեղադրող դատախազ Չախոյանը միջնորդեց հրապարակել վերջինիս նախաքննական ցուցմունքը՝ պատճառաբանելով, որ դրանում եւ դատարանում տված ցուցմունքում առկա են էական հակասություններ։ Արմեն Չախոյանը նշեց դրանցից առանցքայինը․ «Նախաքննական ցուցմունքում Գագիկ Հեբոյանը ասելէ, որ այդ հարցով Բենիկ Հարությունյանին խորհրդակցության չի ուղարկել որեւէ մեկի մոտ, մինչդեռ դատարանի դահլիճում ասաց, որ ուղարկել է Վահագի մոտ Վահագը ներկա չի եղել, ասել է՝ թող գնա Լիլիթ մոտ»։ Պաշտպանական կողմը առարկեց ներկայացված միջնորդության դեմ, իսկ նախագահող դատավոր Տաթեւիկ Գրիգորյանը միջնորդությունը բավարարեց նույն հիմքով։

Այժմ հրապարակվում է Գագիկ Հեբոյանի նախաքննական ցուցմունքը։

Հեղինակ` Միլենա Խաչիկյան