Փաստ ինֆո

Վայոց Ձորի մարզում բրուցելոզի տարածման վերաբերյալ ֆերմեր Տիգրան Եղոյանի հայտարարությունները Սննդամթերքի անվտանգության տեսչական մարմնի կողմից գրանցվել են որպես ահազանգ և այժմ ուսումնասիրություններ են արվում։ Այս մասին տեղեկանում ենք Սննդամթերքի անվտանգության պետական ծառայության ղեկավար Գեորգի Ավետիսյանի ֆեյսբուքյան գրառումից։ Նա գրառման միջոցով ներկայացրել է որոշ պարզաբանումներ դրանցից մի քանիսի վերաբերյալ, որոնք ստորև ներկայացնում ենք.

«1. Հայաստանում անասնաբուժական թուրքական դեղեր չեն վաճառվում:

2. Վիետնամից խոզի միս չի ներմուծվում:

3. 50% վարակվածություն երբևէ չի եղել, վերահսկողության խոստումից հետո էլ այդ թիվը 5% չի գերազանցում:
2019թ. առաջին կիսամյակի տվյալներով՝ ստուգված խոշոր եղջերավոր 281764 գլուխ կենդանիներից միայն 1813-ի, այսինքն՝ 0,64%-ի, մոտ է հայտնաբերվել բրուցելոզ, իսկ մանր եղջերավոր կենդանիներից՝ ընդամենը 1.04%-ի (222546-ը 2318-ը): Տարվա վերջին կունենանք ավելի ամբողջական պատկեր:

4. Եղեգնաձորում կենդանու արյան փորձաքննություն չի արվում:

5. Չնայած ֆերմերի ասածների մեծ մասի արժանահավատությունը խիստ կասկածելի է, այնուամենայնիվ «Ծանոթ մսավաճառի» մասին ասվածը դիտարկում ենք որպես ահազանգ։

6. Սատկած ձիու մսի մասով նույնպես ֆերմերը հստակեցնելու խնդիր ունի: Մենք նաև հարցում կանենք բոլոր մսամթերք արտադրողներին: Հուսով ենք՝ ըմբռնումով կմոտենան մեր հարցմանը և չեն դիտարկի որպես վիրավորանք:

7. Այս պահին հանրապետության ողջ տարածքում իրականացվում է մսի շուկայի վերահսկողություն (Գյումրի, Արթիկ, Կապան, Մեղրի), և այդ խնդրին տրվում է համակարգային լուծում:

8. Օգոստոսի մեկից հանրային սննդի օբյեկտներում, իսկ հունվարի 15-ից ամբողջ շուկայում վաճառվելու է բացառապես սպանդանոցային ծագման միս, ինչը հնարավորություն կտա վերահսկել թե մսի անվտանգությունը, թե սպանդի, պահպանման, տեղափոխման և այլ պայմաններ:

9. Մամուլի համար հաղորդագրություն կհրապարակենք մեր կողմից այս պահին իրականացվող ուսումնասիրության և պետական վերահսկողության միջոցառումների ավարտից հետո», - գրել է Գեորգի Ավետիսյանը։

Նշենք, որ երեկ հրավիրված մամուլի ասուլիսի ժամանակ ֆերմեր Տիգրան Եղոյանը հայտարարել էր, որ Վայոց Ձորի և այլ տարածաշրջաններում տարածված է բրուցելոզ հիվանդությունը։ Նա մասնավորապես ասել է, որ գյուղացիները ստիպված են լինում մորթել իրենց անասուններին ու միսն իրացնել շուկաներում։

Ֆերմերի խոսքով Մարտունու շուկայում բրուցելոզով հիվանդ անասունների միս է վաճառվում։

Աղբյուր` Փաստինֆո