Փաստ ինֆո

«Փաստինֆո»-ի հաղորդմամբ՝ Երեւանի ընդհանուր իրավասության դատարանում դատավոր Տաթեւիկ Գրիգորյանի նախագահությամբ այսօր կայացավ կաշառքի մեջ մեղադրվող դատավոր Գագիկ Հեբոյանի և փաստաբան Վահագն Դանիելյանի գործով դատական նիստը։

Նիստի ընթացքում Գագիկ Հեբոյանի պաշտպան Արմեն Նադիրյանը միջնորդություն ներկայացրեց՝ Գագիկ Հեբոյանի նկատմամբ ընտրված խափանման միջոց կալանավորումը փոփոխելու վերաբերյալ։ Իր ելույթում Արմեն Նադիրյանը նշեց, որ Գագիկ Հեբոյանը ձերբակալվել է 2019 թվականի մարտի 28-ին, իսկ մարտի 30-ին դատարանի որոշմամբ նրա նկատմամբ որպես խափանման միջոց է ընտրվել կալանավորումը։ Հետագայում՝ մայիսի 27-ին, քննարկելով ընտրված խափանման միջոցի հարցը՝ Դատարանը որոշում է կայացրել այն թողնել անփոփոխ։ Դատաքննության ընթացքում՝ հունիսի 13-ի որոշմամբ, Դատարանը մերժել է պաշտպանության կողմի միջնորդությունը՝ կալանքից ազատելու կամ կալանավորումը չհեռանալու մասին ստորագրությամբ կամ գրավով փոխարինելու մասին. «Վերջին երկու դեպքերում դատարանը, անդրադառնալով կալանավորման հիմքերին, գտել է, որ ոչ պատշաճ վարքագիծ դրսեւորելու, այդ թվում՝ վարույթն իրականացնող մարմնից թաքնվելու եւ դատավարությանը մասնակցող անձանց վրա անօրինական ազդեցություն թողնելու եւ գործի քննությանը խոչընդոտելու հավանականությունը շարունակում է մնալ բարձր»,-հիշեցրեց նա։

Պաշտպանի խոսքով՝ Դատարանը նախկինում մեծ է գնահատել նաեւ հավանականությունը, որ ամբաստանյալը, ազատության մեջ մնալով, կարող է օգտագործել իր պաշտոնական դիրքը, հեղինակությունը եւ անօրինական ազդեցություն գործադրել դեռեւս չհարցաքննված վկաների եւ ազատության մեջ գտնվող ամբաստանյալ Վահագն Դանիելյանի նկատմամբ՝ ուղղորդելով նրանց տալ իր համար բարենպաստ ցուցմունքներ. «Գտնում եմ, որ քրեական գործի ներկա փուլում ամբաստանյալ Հեբոյանի կալանքի տակ պահելու հիմքերը վերացել են, եւ նա ենթակա է կալանքից ազատման, որովհետեւ սույն քրեական գործով նրան մեղսագրվող ենթադրյալ հանցագործության կատարմանը այլ, ինքնությունը չպարզված կամ քննությունից թաքնված անձ չկա, իսկ դատաքննության ընթացքում ավարտվել է ապացույցների հետազոտման փուլը, եւ հարցաքննվել են դատակոչված բոլոր վկաները, որպիսի պայմաններում ազատության մեջ գտնվելու դեպքում վերջինիս կողմից դատավարության մասնակիցներ իվրա անօրինական ազդեցություն գործադրելու կամ գործի քննությանը խոչընդոտելու կամ քննությունից թաքնվելու վերաբերյալ մինչ այդ արված ենթադրությունները այլեւս ողջամիտ եւ իրատեսական չեն կարող համարվել»,-նշեց Արմեն Նադիրյանը։

Վերջինս նշեց, որ իր պաշտպանյալի նկատմամբ խափանման միջոց կիրառելու հիմքեր այլեւս չկան, իսկ եթե Դատարանը գտնի, որ այդպիսիք ամեն դեպքում դեռ չեն վերացել, ապա պաշտպանի խոսքով՝ կալանավորումը պետք է փոփոխվի չհեռանալու մասին ստորագրությամբ, ինչը նաեւ կբացառի նրա կողմից երկիրը լքելու հնարավորությունը։

Պաշտպանը միջնորդություն ներկայացրեց նաեւ ընտրված խափանման միջոց կալանավորումը գրավով փոխարինելու մասին։

Գործով ամբաստանյալ Վահագն Դանիելյանի պաշտպանական կողմը միացավ միջնորդությանը, իսկ գործով մեղադրող դատախազ Արթուր Չախոյանը առարկեց դրա դեմ՝ ասելով, որ պնդում է իր՝ նախկինում հայտնած դիրքորոշումը Գագիկ Հեբոյանի նկատմամբ ընտրված խափանման միջոցի փոփոխման վերաբերյալ. «Պաշտպանը նշում է, որ չեզոքացել է խոչընդոտելու վտանգը, բայց այս փուլում այդ ռիսկը չի նվազել, քանի որ դատաքննությունը դեռեսւ չի ավարտվել, եւ մինչ ավարտը կարող են միջնորդություններ ներկայացվել կամ դատարանի նախաձեռնությամբ կարող են հարցաքննվել արդեն իսկ հարցաքննված անձինք, այդ թվում՝ Վահագն Դանիելյանը, կամ նախորդ դատական նիստին Նադիրյանը միջնորդեց դատակոչել Կոտայքի մարզի ընդհանուր իրավասության դատարանի աշխատակցի, ուստի բացառված չէ, եւ մեծ է հավանականությունը, որ նա, ազատության մեջ մնալով, կարող է ինչպես թաքնվել, այդպես էլ կապ հաստատել եւ ձեռք բերել պայմանավորվածություններ քննությանը մասնակցող անձանց հետ կամ ունենալ անօրինական ազդեցություն նրանց վրա»։

Դատախազի խոսքով՝  հաշվի առնելով նրան մեղսագրված արարքի հանրային վտանգավորությունը, բնույթը՝ տվյալ դեպքում գրավը եւս չի կարող երաշխիք հանդիսանալ կալանավորման հիմքերի չեզոքացման համար։

Հայտարարությամբ հանդես եկավ նաեւ գործով ամբաստանյալ Գագիկ Հեբոյանը՝ նշելով, որ որեւէ անհատականացնող բան մեղադրողի խոսքում ինքը չլսեց. «Ինձ թվում է՝ այս առարկությունները ներկայացնում են գողերին, բռնաբարողներին, սպանություն անողներին, մնացել է մի մարդ, ում վրա ես կարող եմ ազդեցություն գործել. դա ես եմ, ես իմ վրա պետք է ազդեցություն գործե՞մ։ Այսինքն՝ ո՞ր փուլում կարելի է անդրադառնալ եւ համարել այդ վտանգները ավարտված. դատավճիռ կայացնելուց հետո»,-ասաց ամբաստանյալը։

Խորհրդակցական սենյակ հեռանալով եւ վերադառնալով՝ դատավոր Տաթեւիկ Գրիգորյանը մերժեց ներկայացված միջնորդությունը։

«Փաստինֆո»-ի հետ զրույցում Գագիկ Հեբոյանի պաշտպան Արմեն Նադիրյանը նշեց, որ որոշումը դեռ չեն ստացել եւ դատարանի հիմնավորումներին ծանոթ չեն, բայց ամեն դեպքում, այս որոշումն իրենց համար անսպասելի չէր. «Ենթադրում եմ՝ կամայական որոշում պետք է լինի, իհարկե, երբ հիմքերը տեսնեմ, ավելի կոնկրետ կասեմ, բայց այս պարագայում ես նշել էի կալանավորման բոլոր հիմքերը, որոնք այսօրվա դրությամբ իսպառ վերացել են»։

Ինչ վերաբերում է դատախազի այն հայտարարությանը, թե հնարավոր է ի հայտ գան նոր վկաներ, Արմեն Նադիրյանն ասաց, որ հենց դա հաշվի առնելով էլ  ինքը նախորդ դատական նիստին էր միջնորդել դատակոչել Գագիկ Հեբոյանի քարտուղարին, սակայն դատարանը քննության չառավ այդ միջնորդությունը՝ պատճառաբանելով, թե դա ժամանակին ներկայացված միջնորդություն չէ։

Հեղինակ` Միլենա Խաչիկյան