Փաստ ինֆո

Բյուրեղավան համայնքի քաղաքային պոլիկլինիկայի նախկին տնօրենի եւ էնդոկրինոլոգ բուժքույրի վերաբերյալ քրեական գործի նյութերից երկու դրվագ Դատախազությունն ուղարկել է նախաքննական մարմիններ։ Այս մասին «Փաստինֆո»-ի հարցին ի պատասխան՝ տեղեկացրեց Դատախազության հանրային կապերի բաժնի պետ Արեւիկ Խաչատրյանը։

Վերջինս նշեց, որ Քննչական կոմիտե է ուղարկվել պոլիկլինիկայի նախկին տնօրեն, ամբաստանյալ Արմեն Մոսիկյանի ցուցմունքի այն դրվագը, որով նա հայտնել է, որ Բյուրեղավան համայնքի ղեկավարը իրենից որպես կաշառք ամսական 250.000 ՀՀ դրամ գումար է պահանջել։

Միաժամանակ Հատուկ քննչական ծառայություն է ուղարկվել պոլիկլինիկայի բուժքույր, գործով ամբաստանյալ Մարինե Բաղդասարյանի ցուցմունքի այն դրվագը, ըստ որի՝ քննիչը իրեն ստիպել և սպառնացել է վարույթն իրականացնող մարմնին տրամադրել կեղծ տեղեկատվություն Արմեն Մոսիկյանի գործողությունների վերաբերյալ, որը ինքը հրաժարվել է տրամադրել:

Հիշեցնենք, որ Կոտայքի մարզի ընդհանուր իրավասության դատարանում դատավոր Գեղամ Մարգարյանի նախագահությամբ արդեն երկու տարի է՝ քննվում է Բյուրեղավան համայնքի քաղաքային պոլիկլինիկայի նախկին տնօրենի եւ էնդոկրինոլոգ բուժքույրի վերաբերյալ քրեական գործը։ Նշենք, որ ըստ մեղադրական եզրակացության՝ բուժքույր Մ. Բաղդասարյանը մեղադրվում է յուրացման մեջ։ Նախնական քննության տվյալներով՝ նա Բյուրեղավանի քաղաքային պոլիկլինիկայի տնօրեն Ա. Մոսիկյանի հետ գալով նախնական համաձայնության՝ մեկ միասնական դիտավորությամբ 2013թ-ից մինչև 2015թ առաջին կիսամյակի ընթացքում յուրացման եղանակով հափշտակել են «Բյուրեղավանի քաղաքային պոլիկլինիկա» ՓԲԸ դրամարկղ մուտքագրման ենթական իրեն 800.000 դրամ և քաղաքացիներից իր նախաձեռնությամբ հավելյալ հավաքագրված 52.000 դրամ, ինչպես նաեւ յուրացրել են դիակային տեղափոխության գնումների գումարները։ Պոլիկլինիկայի տնօրենին մեղադրանք է առաջադրվել նաեւ պաշտոնեական լիազորությունները չարաշահելու համար. ըստ նախաքննական մարմնի՝ նա սոցփաթեթի ցուցակներում ընդգրկել է այնպիսի անձանց, ովքեր չեն անցել համապատասխան հետազոտություններ եւ չէին կարող օգտվել անվճար բուժօգնության հնարավորությունից։

Մեղադրյալների պաշտպան Վահան Հովհաննիսյանը «Փաստինֆո»-ի հետ զրույցում նշել էր, որ ի սկզբանե մեղադրանքը հիմնված է եղել համայնքային ենթակայությամբ գտնվող պոլիկլինիկայի 4 բուժքույրերի ցուցմունքների վրա, եւ իր պաշտպանյալները վերջին դատական նիստին հայտնել են իրենց դիրքորոշումը, որ այդ անձանց ցուցմունքները ուղղորդված են եղել Բյուրեղավանի քաղաքապետի Հակոբ Բալասյանի կողմից, ինչի վերաբերյալ իրենք նաեւ ապացույցներ են ներկայացնելու. «Վերջին երկու դատական նիստերին իմ պաշտպանյալները ցուցմունք տվեցին եւ մեկնաբանեցին, թե ինչով է պայմանավորված իրենց այդ դիրքորոշումը։ Մասնավորապես, Մոսիկյանը նշեց, որ 2009 թվականի պոլիկլինիկայի տնօրեն նշանակվելուց հետո առանձնազրույց է ունեցել քաղաքապետի հետ, որի ժամանակ քաղաքապետը նշել է, որ ամեն ամիս իրեն պետք է վճարի 250 հազ դրամ կաշառք, ինչից նա հրաժարվել է»։

Հավելենք, որ Քննչական կոմիտեից եւ ՀՔԾ-ից «Փաստինֆո»-ին խոստացան ավելի ուշ հայտնել՝ ստացել են արդյոք ուղարկված նյութերը, եւ եթե այո, ապա ինչ որոշում է կայացվել դրանց հիման վրա։

Հեղինակ` Միլենա Խաչիկյան